އިލެކްޓްރޯނިކް ވޯޓިން (އީ-ވޯޓިން) ނިޒާމަކަށް ދިއުމަށް ދިވެހިރާއްޖެ އަދި ތައްޔާރު ނޫންކަމަށް އިލެކްޝަންސް ކޮމިޝަން (އީސީ) ގެ ރައީސް މުޙައްމަދު ޝަކީލް ވިދާޅުވެއްޖެއެވެ.

ޕީއެސްއެމް ނިއުސްއަށް ދެއްވި އިންޓަރވިއުއެއްގައި ޝަކީލް ވިދާޅުވީ، އީ-ވޯޓިން ނިޒާމަކަށް ދިއުމުގެ ކުރިން އެކަމާމެދު ރައްޔިތުން ވަރަށް ބޮޑަށް ހޭލުންތެރިކުރުވަން ޖެހޭކަމަށެވެ. ރާއްޖެއަށް އީ-ވޯޓިން ގެނައުމަށް މާއްދީ ނުވަތަ ވަސީލަތްތަކުގެ ހުރަހެއް ނެތް ނަމަވެސް، އެފަދަ ނިޒާމެއް ބަލައިގަތުމަށް ދިވެހި މުޖުތަމަޢު އަދި ތައްޔާރު ނޫންކަން އޭނާ ފާހަގަކުރެއްވިއެވެ.

އަދި ވޯޓުލުމުގެ އިންތިޒާމްތައް އީ-ވޯޓިންއަށް ބަދަލުކުރަންވާނީ، އެ ނިޒާމަކީ ކޮބައިކަން އާންމުންނަށް އަންގައިދީ، ރައްޔިތުންގެ އިތުބާރު އެކަމަށް ލިބުމުން ކަމަށްވެސް އޭނާ ވިދާޅުވިއެވެ.

އީސީގެ ރައީސް މިފަދައިން ވިދާޅުވެފައި މިވަނީ، ރައްޔިތުންގެ މަޖިލީހަށް ހުށަހަޅާފައިވާ ޑިޖިޓަލް ޓްރާންސްފޮމޭޝަން ބިލާއެކު އީ-ވޯޓިންގެ ބަހުސް ސިޔާސީ މައިދާނުގައި ހޫނުވެފައިވާ ދަނޑިވަޅެއްގައެވެ.

މި ބިލު މެދުވެރިކޮށް އީ-ވޯޓިންއަށް މަގުފަހިކުރަނީ ކަމަށް އިދިކޮޅު ފަރާތްތަކުން ތުހުމަތުކުރި ނަމަވެސް، އެފަދަ އެއްވެސް މަސައްކަތެއް އީސީން ކުރަމުން ނުދާކަމަށާއި، އެ ބިލުގައި އީ-ވޯޓިންއާ ބެހޭ އެއްވެސް މާއްދާއެއް ނެތްކަން އީސީންނާއި ސަރުކާރު ހިންގާ ޕީއެންސީގެ މެންބަރުން ވަނީ ތަކުރާރުކޮށް ސާފުކޮށްދީފައެވެ.