މޭ މަހު ޒަކާތުގެ ގޮތުގައި 7.59 މިލިއަން ރުފިޔާ ބަލައިގަނެ، 2.7 މިލިއަން ރުފިޔާ ބަހައިފި

މިއަހަރުގެ މޭ މަހުގެ ތެރޭގައި މުދަލު ޒަކާތުގެ ގޮތުގައި ޒަކާތު ފަންޑަށް 7.59 މިލިއަން ރުފިޔާ ބަލައިގަނެ، އެ ފަންޑުން އެކި އެހީތަކަށާއި މަޝްރޫއުތަކަށް 2.7 މިލިއަނާ ގާތްކުރާ އަދަދަކަށް ފައިސާ ދޫކޮށްފިއެވެ.

މޯލްޑިވްސް ޒަކާތު ހައުސްއިން އާންމުކޮށްފައިވާ ތަފާސްހިސާބުތަކަށް ބަލާއިރު، ނިމިދިޔަ މޭ މަހުގެ ތެރޭގައި މުދަލު ޒަކާތުގެ ގޮތުގައި ޖުމުލަ 7,587,956.14 ރުފިޔާ ބަލައިގަނެފައިވާއިރު، އެކި ބޭނުންތަކަށް ޖުމުލަ 2,685,834.30 ރުފިޔާ ވަނީ ފަންޑުން ދޫކޮށްފައެވެ.

މިދިޔަ އަހަރާ އަޅާބަލާއިރު މިއަހަރު މުދަލު ޒަކާތް ދެއްކި މިންވަރަށް ވަނީ ވަރަށް ބޮޑު ކުރިއެރުމެއް ލިބިފައެވެ. އެގޮތުން 2025 ވަނަ އަހަރުގެ މޭ މަހު ޒަކާތުގެ ގޮތުގައި ލިބިފައިވަނީ 4.33 މިލިއަން ރުފިޔާ ނަމަވެސް، މިއަހަރުގެ މޭ މަހު އެ އަދަދު ވަނީ 7.59 މިލިއަނަށް އަރާފައެވެ.

މިއީ ފާއިތުވި އަހަރާ އަޅާބަލާއިރު 75.3 އިންސައްތައިގެ ބޮޑު އިތުރުވުމެއް ކަމަށްވާއިރު، މިއީ ޒަކާތުގެ މުހިންމުކަމާއި ރަސްމީ ނިޒާމުގެ ތެރެއިން ޒަކާތް ދެއްކުމަށް އާންމުންގެ މެދުގައި ހޭލުންތެރިކަން އިތުރުވަމުންދާކަމުގެ ހެއްކެކެވެ.

ޒަކާތު ފަންޑުން މިދިޔަ މަހު އެންމެ ބޮޑު ހޭދައެއް ކޮށްފައިވަނީ ފަގީރުންނާއި މިސްކީނުންގެ ބަޔަށެވެ. އެގޮތުން އެ ބަޔަށް ޖުމުލަ 1,483,960.50 ރުފިޔާ ދޫކޮށްފައިވާއިރު، މީގެ ތެރެއިން އެންމެ ބޮޑު ޢަދަދެއް ހޭދަވީ ބޭސްފަރުވާގެ އެހީއަށެވެ. ބޭސްފަރުވާގެ އެހީއަށް ބޭނުންވި ފަރާތްތަކަށް 1.45 މިލިއަނަށްވުރެ ގިނަ ރުފިޔާ ދޫކޮށްފައިވާއިރު، ދިރިއުޅުމުގެ ޒަރޫރީ ބޭނުންތައް ފުއްދުމަށް ދަތިވެފައިވާ ފަރާތްތަކަށް 31,000 ރުފިޔާ ވަނީ ދީފައެވެ. އެހެންކަމުން މޭ މަހު ދޫކުރި ޖުމުލަ ފައިސާގެ ހަތަރުބައިކުޅަ ތިންބައި ހޭދަވެފައިވަނީ ބޭސްފަރުވާގެ އެހީއަށެވެ.

ފަގީރުންގެ އިތުރުން ފީސަބީލިﷲ ބައިން ތައުލީމީ، ދީނީ އަދި އިލްމީ އެކި މަސައްކަތްތަކަށް ޖުމުލަ 1,037,236.42 ރުފިޔާ ވަނީ ހޭދަކޮށްފައެވެ. މީގެ ތެރޭގައި ގުރުއާން ހިތުދަސްކުރުމުގެ ޕްރޮގްރާމްތަކަށާއި ގުރުއާނުގެ އިލްމު ފެތުރުމަށް 7.5 ލައްކައަށްވުރެ ގިނަ ރުފިޔާ ހޭދަކޮށްފައިވާއިރު، އިސްލާމީ ފޮތްތަކާއި ތައުލީމީ ތަކެތި ތަރުޖަމާކުރުމަށް 2.4 ލައްކައަށްވުރެ ގިނަ ރުފިޔާ ވަނީ ދޫކޮށްފައެވެ. އަދި މަތީ ތައުލީމު ހާސިލުކުރާ ފަރާތްތަކަށް އެހީތެރިވުމަށް 37,008 ރުފިޔާ ހޭދަކޮށްފައިވާއިރު، މި މަސައްކަތްތަކަކީ އިސްލާމީ އިލްމު ކުރިއެރުވުމަށާއި ދީނީ މައުލޫމާތު އާންމުންނަށް ފަސޭހައިން ފޯރުކޮށްދިނުމަށް ކުރެވޭ މުހިންމު މަސައްކަތްތަކެކެވެ.