ސައިޓްތަކަށް ބިދޭސީން ރަޖިސްޓްރީކުރުމަށް ހުށެހެޅުމުގެ މުއްދަތު އިތުރުކޮށްފި

ދިވެހިރާއްޖޭގައި ބިދޭސީން ވަޒީފާ އަދާކުރުމަށް ކޯޓާ ދޫކުރާ މަސައްކަތްތަކަށް ސައިޓް ރަޖިސްޓްރީކުރުމަށް ހުށަހަޅާ ވަރކް ސައިޓް ޑިކްލަރޭޝަން ފޯމު ހުށަހެޅުމުގެ މުއްދަތު އިތުރުކޮށްފިއެވެ.

ހޯމްލޭންޑް މިނިސްޓްރީން މިދިޔަ މަހުގެ 31 ވަނަ ދުވަހު ކުރި އިއުލާނެއްގައި ވަނީ މިހާރު ދާއިމީ ކޯޓާ ދޫކުރެވި ރަޖިސްޓްރީ ކޮށްފައިވާ ސައިޓްތަކުގެ މަޢުލޫމާތު އަދާހަމަ ކުރުމަށްޓަކައި، މިމަހުގެ 31 ވަނަ ދުވަހުގެ ކުރިން "ވަރކް ސައިޓް ޑިކްލަރޭޝަން ފޯމު" އަދި އިޤުރާރު ހުށަހެޅުމަށް ވަޒީފާ ދޭ ހުރިހާ ފަރާތްތަކަށް އަންގާފައެވެ. ނަމަވެސް މިއަދު އެމިނިސްޓްރީން ކުރި އިއުލާނެއްގައި ވަނީ ކޯޓާ ދޫކުރާ މަސައްކަތްތަކަށް ސައިޓް ރަޖިސްޓްރީ ކުރުމަށް މިހާރު ހުށަހަޅަންޖެހޭ ލިޔެކިޔުންތަކުގެ އިތުރުން ނޯޓަރައިޒް ކޮށްފައިވާ "ވަރކް ސައިޓް ޑިކްލަރޭޝަން ފޯމު" އަދި އިޤްރާރު ހުށަހެޅުމަށް ދީފައިވާ މުއްދަތު އިތުރުކޮށްދިނުމަށް އެދި ގިނަ ވަޒީފާދޭ ފަރާތްތަކުން އެދެމުންދާތީ، މި ލިޔެކިއުންތައް ހުށަހެޅުމުގެ މުއްދަތު އިތުރުކުރަން ނިންމާފައިވާކަން ހާމަކޮށްފައެވެ.

މިގޮތުން ކޯޓާ ދޫކުރާ މަސައްކަތްތަކަށް ސައިޓް ރަޖިސްޓްރީ ކުރުމަށް މިހާރު ހުށަހަޅަންޖެހޭ ލިޔެކިޔުންތަކުގެ އިތުރުން ނޯޓަރައިޒް ކޮށްފައިވާ "ވަރކް ސައިޓް ޑިކްލަރޭޝަން ފޯމު" އަދި އިޤްރާރު ހުށަހެޅުމުގެ ސުންގަޑި 2026 ޖޫން 01 އާ ހަމައަށް އިތުރުކޮށްފައިވާ ކަމުގައި އެމިނިސްޓްރީން ވަނީ ހާމަކޮށްފައެވެ.

އެހެންކަމުން، 2026 ޖޫން 01 ގެ ކުރިން "ވަރކް ސައިޓް ޑިކްލަރޭޝަން ފޯމު" އަދި އިޤްރާރު، ރަޖިސްޓަރީކޮށްފައިވާ ސައިޓުގެ "ޑޮކިއުމަންޓް އަޕްޑޭޓް ރިކުއެސްޓް" ނުވަތަ "ސައިޓް ޕަރމިޓް އަޕްޑޭޓް" މެދުވެރިކޮށް ހުށަހެޅުމަށް ހުރިހާ ވަޒީފާދޭ ފަރާތްތަކަށް މިނިސްޓްރީން ވަނީ އަންގާފައި އެވެ. އަދި ކަނޑައެޅިފައިވާ މުއްދަތުގެ ތެރޭގައި ފޯމު ހުށަނާޅާ ފަރާތްތަކުގެ ސައިޓްތައް ސަސްޕެންޑް ކުރެވޭނެކަމުގެ އިންޒާރުވެސް ވަނީ ދީފައި އެވެ.

މިނިސްޓްރީން ވަނީ ފޯމު ފުރުމަށް ވަޒީފާދޭ ފަރާތްތަކަށް ފަސޭހަކޮށްދިނުމުގެ ގޮތުން، ފޯމު ފުރުމުގައި އާންމުކޮށް އަންނާނެ ސުވާލުތަކާއި ޖަވާބުތައް (FAQ) އެކްސްޕެޓް ސިސްޓަމް ހޯމްޕޭޖް އިން ލިބޭނެ ކަން ފާހަގަކޮށްފައި އެވެ.