މާލޭގެ ކެފޭއެއްގައި އަލިފާނުގެ ހާދިސާއެއް: ބިދޭސީއެއްގެ ފައި ފިހުނު!

ހެންވޭރުގައި ހުންނަ ހޮޓެލް އަލް-ޒައިކާގެ ބަދިގޭގައި ރޯވި އަލިފާން، އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލެ ފަޔަރ ސްޓޭޝަނުން ނިއްވާލައިފިއެވެ.

އެމްއެންޑީއެފުން ބުނީ މި ހާދިސާގެ ރިޕޯޓް މިއަދު 12:44 ހާއިރު އެމްއެންޑީއެފް ފަޔަރ އެންޑް ރެސްކިޔު ސަރވިސް، މާލޭ ފަޔަރ ސްޓޭޝަނަށް ލިބުމާ އެކު، އެ ފަޔަރ ސްޓޭޝަނުގެ ފަޔަރ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށެވެ.

މިގޮތުން، ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވުނީ 13:00 ހާއިރުއެވެ.

އެންޑީއެމްއޭއިން މި ހާދިސާއާއި ގުޅިގެން ބުނީ ހ.އަލްޒައިކާ ކެފޭގައި މިއަދު ހިނގި އަލިފާނުގެ ހާދިސާއައި ގުޅިގެން އެއޮތޯރިޓީއިން ހަރަކާތްތެރިވެފައިވާ ކަމަށެވެ. އަދި މި ހާދިސާގައި ބިދޭސީއެއްގެ ފައި ކޮންމެވެސް ވަރަކަށް ފިހުނު ނަމަވެސް އެއްވެސް މީހަކަށް އިންސާނީ އެހީ ބޭނުންވާ ހާލަތަކަށް ގޮސްފައި ނުވާކަމަށް ވަނީ ބުނެފައި އެވެ.