އާރް.އެސް.ޑަބްލިއު ފައިނޭންސިންގ ފެސިލިޓީއަށް އެދި ހުށަހެޅުމުގެ ފުރުސަތު އަންގާރާގައި އަލުން ހުޅުވާލަނީ

އާރް.އެސް.ޑަބްލިއު ފައިނޭންސިންގ ފެސިލިޓީއަށް އެދި ހުށަހެޅުމުގެ ފުރުސަތު އަންނަ ހަފްތާގެ ތެރޭގައި އަލުން ހުޅުވާލާނެ ކަމަށް މަސްވެރިކަމާއި ބެހޭ ވުޒާރާއިން ހާމަކޮށްފި އެވެ.

އެވުޒާރާއިން މިއަދު ބުނީ އެސް.ޑީ.އެފް.ސީ ޕޯޓަލް މެދުވެރިކޮށް އާރް.އެސް.ޑަބްލިއު ފައިނޭންސިންގ ފެސިލިޓީއަށް އެދި ހުށަހެޅުމުގެ ފުރުސަތު އަލުން ހުޅުވާލަން ނިންމާފައިވަނީ އަންނަ ހަފްތާގެ އަންގާރަ ދުވަހު ކަމަށެވެ.

ސަޕޯޓް ޕީޕަލްސް ލައިވްލިހުޑްސް އިން ދަ ފިޝަރީޒް ސެކްޓަރ އިން މޯލްޑިވްސް ތްރޫ ސަސްޓެއިނަބަލް އެނަރޖީ ޕްރޮޖެކްޓުގެ ނަމުގައި ކުރިޔަށްގެންދާ މި މަޝްރޫއަކީ ދިވެހި ސަރުކާރުން އިސްލާމިކް ޑެވެލޮޕްމަންޓު ބޭންކާއި ލައިވްސް އެންޑް ލައިވްލިހުޑް ފަންޑުގެ އެހީގައި މަސް ދޯނިފަހަރުގައި އާރް.އެސް.ޑަބްލިއު ސިސްޓަމް ގާއިމުކުރުމަށްޓަކައި އެސް.އެމް.އީ ޑެވެލޮޕްމަންޓް ފައިނޭންސް ކޯޕަރޭޝަނާއި ގުޅިގެން ހިންގާ މަޝްރޫއެކެވެ.

މި ފައިނޭންސިންގ ފެސިލިޓީގެ ދަށުން އާރްއެސްޑަބްލިޔު ސިސްޓަމް އެޅުމަށް އޮޑިވެރިން އަމިއްލައަށް ލޯނަށް އެދެވޭނެއެވެ. ނުވަތަ އާރްއެސްޑަބްލިއު އެޅުމަށް ވެންޑަރ އެއްގެ ގޮތުގައި އެސްޑީއެފްސީގައި ރަޖިސްޓްރީކޮށްފައިވާ ވެންޑަރއެއް މެދުވެރިކޮށްވެސް ލޯނަށް އެދެވޭނެއެވެ. ވެންޑަރއެއް މެދުވެރިކޮށް ލޯނަށް އެދޭނަމަ، އާރްއެސްޑަބްލިއު އެޅުމަށް ކުރަންޖެހޭ ޚަރަދާއި ހަރުކުރުމުގެ އެންމެހާ ކަމެއް ކޮށްދޭނީ ވެންޑަރއެވެ.

މި ޕްރޮޑަކްޓު އަލުން ތައާރަފު ކުރީ މަސްވެރިންނަށް ލުއިފަސޭހަތައް ހޯއްދަވައިދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން އިތުރު ލުއި ފަސޭހަތައް ހިމަނައިގެންނެވެ.

އާރު.އެސް.ޑަބްލިޔު ސިސްޓަމްގެ އިތުރުން ޕްލާންޓު ހިންގުމަށް ބޭނުންވާ ސައިޒުގެ ޖަނެރޭޓަރަކާއި އިޔާދަކުރަނިވި ހަކަތަ ހަރުކުރުމަށް ބޭނުންވާ ފައިސާ ވެސް މި ފެސިލިޓީގެ ތެރެއިން ހަމަޖެހޭނެއެވެ.

މި ޕްރޮޑަކްޓުގައި މިފަހަރު ހިމެނޭ އެންމެ ޚާއްސަ ލުއިފަސޭހަ ކަމަކީ މި ފެސިލިޓީގެ ދަށުން ނަގާ އަދަދުގެ %35 އަންބުރާ ދައްކަން ނުޖެހޭގޮތަށް ސަރުކާރުން ނިންމައިފައި ވުމެވެ. މީގެ ފައިދާތަކަކީ އޮޑިވެރިންނަށް މާލީގޮތުން ލުއިލިބިގެން ދިއުމާއި ދިގު މުއްދަތަކަށް ބަހާލައިގެން ފައިސާ ދައްކާ ގޮތަށް ހަމަޖެހިފައި އޮތުމުން މަހުންމަހަށް ދައްކަންޖެހޭ އަދަދު މަދުވެގެން ދިއުމެވެ. ލޯނު ދެއްކުމުގެ މުއްދަތުގެ ތެރެއިން އޮޑިވެރިންނަށް 6 މަސްދުވަހުގެ ގްރޭސްޕީރިއަޑެއް ލިބެއެވެ.