ހިޒްބުالله ގެ އިސް ކޮމާންޑަރަކު ޝަހީދުކޮށްލައިފި

ލުބުނާނުގެ ހިޒްބުالله ޖަމާއަތުގެ އިސް ކޮމާންޑަރަކު ޝަހީދުކޮށްލާފައިވާ ކަމަށް ނިރުބަވެރި އިޒްރޭލު އަސްކަރިއްޔާއިން ބުނެއެވެ.

މިކަން ހާމަކޮށް ނެރުނު ބަޔާނެއްގައި ނިރުބަވެރި އަސްކަރިއްޔާއިން ބުނީ ހިޒްބުاللهގެ "ގޮނޑުދޮށުގެ ސަރަހައްދުގައި ހިންގާ އޮޕަރޭޝަން ޔުނިޓް"ގެ ވެރިޔާ ޝަހީދުކޮށްލާފައިވާ ކަމަށެވެ. އެގޮތުން އޭނާ ޝަހީދުކޮށްލީ ލުބުނާނުގެ ޓަޔަރަށް ދިން ހަމަލާއެއްގައި ކަމަށް ވަނީ ބުނެފައި އެވެ.

އެގޮތުން ޝަހީދުކޮށްލި ކޮމާންޑަރަކީ އިޒްރޭލުގެ ސަރަހައްދަށް ކަނޑުމަގުން ވަދެގަތުމަށާއި ކަނޑުމަގުން ހަމަލާދިނުމުގެ ރޭވުންތައް ރޭވުމުގައި އިސް ލީޑަރު ކަމަށް ޔަހޫދީން ވަނި ތުހުމަތުކޮށްފައެވެ. އަދި އިޒްރޭލުން ހިފާފައިޥާ ފަލަސްތީނު ބިމުގެ ހުޅަނގުން ގަލީލަށް އެންޓިޓޭންކް މިސައިލް ތައް ފޮނުވާލުމުގައި ވެސް އޭނާ އިސްކޮށް އުޅުއްވި ކަމަށް ޔަހޫދީން ވަނީ ތުހުމަކޮށްފައެވެ.

އިސްރާއީލުގެ މިބަޔާނާއި ގުޅިގެން އަދި މިހާތަނަށް ހިޒްބުالله އިން ބަހެއް ބުނެފައި ނުވެއެވެ.

ދާދި ފަހުން އިސްރާއީލުން ޓަޔަރަށް ދިން ހަމަލާތަކުގައި ވެސް ލުބުނާނުގެ އާންމުން ވަނީ ޝަހީދުވެފައި އެވެ އެވެ. އަދި ހޮނިހިރު ދުވަހު އެ ސިޓީގެ އައްސޭރިފަށުގައި އިޒްރޭލުގެ ޑްރޯނަކުން ވަނީ ދެ މަސްވެރިން ޝަހީދުކޮށްލާފައި އެވެ.