ހާއްސަ އެއްބަސްވުމުގެ ދަށުން އިންޑިއާއިން ރާއްޖެއަށް ވިއްކާ ހަކުރު ޝިޕްމެންޓެއް ލަންކާއަށް ގެންދިޔަ މައްސަލައެއް ބަލަނީ!

ރާއްޖެއާ އިންޑިއާއާ ދެމެދު އޮންނަ ވިޔަފާރީގެ އެއްބަސްވުމުގެ ދަށުން ހާއްސަ އަގުގައި އެ ގައުމުން ރާއްޖެއަށް ވިއްކި ހަކުރު ޝިޕްމަންޓެއް ސްރީ ލަންކާއަށް ގެންދިޔަ މައްސަލައެއް ފެންމަތިވެއްޖެ އެވެ.

އިންޑިއާގެ އިކޮނޮމިކް މިނިސްޓްރީއާއި ހަވާލާދީ އެގައުމުގެ ނޫސްތަކުން ރިޕޯޓުކުރާ ގޮތުގައި ބައިލެޓަރަލް ޓްރީޓީއެއްގެ ދަށުން އިންޑިއާއިން ރާއްޖެއަށް ވިއްކާ ހަކުރު ސްރީލަންކާއަށް ޑައިވާޓު ކުރާ މައްސަލަ އިންޑިއާގެ ޑައިރެކްޓްރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން މިހާރު ވަނީ ބަލަން ފަށާފައި އެވެ.

އެގޮތުން ދެ ގައުމުގެ ދެމެދުގައި މިދިޔަ އަހަރުގެ އޭޕްރިލް މަހުގެ ތެރޭގައި ވެފައިވާ ބައިލެޓަރަލް އެގްރީމެންޓެއްގެ ދަށުން ރާއްޖެއަށް އެކްސްޕޯޓް ކުރުމަށް ކަނޑައަޅާފައިވާ 64،494.33 ޓަނުގެ ހަކުރު މިދިޔަ އޮކްޓޯބަރު މަހުގެ 25 ވަނަ ދުވަހު ރާއްޖެއަށް ފުރުވާލުމާއި އެކު އެކްސްޕޯޓްކުރާ ފަރާތްތަކުން ނަހަމަ ގޮތުގައި އެތަކެތި ލަންކާއަށް ޓްރާންސިޓް ކުރުމާއި ގުޅިގެން ޑީޖީއެފްޓީން ތަހުގީގެއް ފަށައި ރާއްޖެއަށް ހަކުރު އެކްސްޕޯޓް ކުރުން ވަގުތީ ގޮތުން ހުއްޓާލާފައިވާ ކަމަށްވެސް ރިޕޯޓުތައް ބުނެއެވެ.

މި މައްސަލަ ފެންމަތިވުމާއި އެކު ލަންކާއިން ވެސް ޚާއްސަ ތަހުގީގެއް ފަށައި 70 ކޮންޓެއިނަރުގެ ހަކުރު ލަންކާގެ ކަސްޓަމްސް އިން ހިފަހައްޓާފައިވާ ކަމަށްވެސް ރިޕޯޓުތައް ބުނެއެވެ. އަދި ރާއްޖެއަށް ހާއްސަ އަގުގައި ވިއްކި ހަކުރު ގަތީ ލަންކާގެ ކޮން ކުންފުނިތަކަކުންތޯ ބަލަމުންދާ ކަމަށްވެެސް ރިޕޯޓުތައް ބުނެއެވެ.

މިފަދަ ބޮޑު މައްސަލަެއެއް ފެންމަތިވެފައިވާއިރު މިކަމާއި ގުޅިގެން އަދި މިހާތަނަށް ދިވެހި ސަރުކާރުން ވަކި ބަހެއް ބުނެފައި ނުވެއެވެ.