އާ އަހަރަށް ވެމްކޯއިން އިތުރު 2 ޚިދުމަތެއް ތައާރްފްކުރަނީ!

ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އާ އަހަރާ ގުޅިގެން އިތުރު ދެ ޚިދުމަތެއް ތަޢާރަފުކުރުމަށް ނިންމައިފިއެވެ.

އެކުންފުނިން ފާއިތުވި އެއް އަހަރު ދުވަހު ކުރި މަސައްކަތްތައް ހާމަކުރެެއްވުމަށް ނޫސްވެރިންނާއި ބައްދަލުކުރައްވައި އެ ކުންފުނީގެ މެނޭޖިންގ ޑިރެކްޓަރު، މުޖުތަބާ ޖަލީލު ވިދާޅުވީ ވެމްކޯއާކީ މާލީގޮތުން ސަރުކާރަށް ބަރޯސާނުވެ, ފުދުންތެރި ކުންފުންޏަކަށް ހެދުމަށް ކުރަމުންއަންނަ މަސައްކަތުގެ ދަށުން އާ ޙިދުމަތްތަކެއް ތަޢާރަފުކުރަން ނިންމާފައިވާކަމަށެވެ.

މިގޮތުން އެ ކުންފުނިން އަލަށް ތަޢާރަފުރާ އައު ޚިދުމަތްތަކުގެ ތެރޭގައި ހިމެނެނީ:

- އިމާރާތްތައް ތަޅާ ޑިމޮލިޝްކުރުމުގެ ޚިދުމަތް

- ކޯލް އެންޑް ޕިކަޕް ސަރވިސް (ކެޕްސް) އަށް އިތުރުކުރެވޭ 'ހަލުވި' އަދި 'ރަސްހަލުވި' ޚިދުމަތް

އިމާރާތްތައް ތަޅާ ނައްތާލުމުގެ ޚިދުމަތުގެ ދަށުން، ވެމްކޯގެ ޚާއްޞަ ޓީމަކުން އިމާރާތް ތަޅައި، ސަރަޙައްދު ސާފުކޮށް، އުފެދޭ ކުނި ނަގައި، ތިމާވެއްޓާ ރައްޓެހި އަދި ރައްކާތެރި ގޮތެއްގައި ނައްތާލައިދެވޭނެއެވެ. މި ޚިދުމަތުގެ ސަބަބުން، އިމާރާތްތައް ތަޅާ ނައްތާލުމުގެ މަސައްކަތް އެއް ފަރާތަކުން ލުއިފަސޭހަކަމާއެކު ލިބިގެންދާނެއެވެ.

ވެމްކޯގެ ކޯލް އެންޑް ޕިކަޕް ސަރވިސްގެ ދަށަށް އިތުރުކުރެވޭ 'ހަލުވި' އަދި 'ރަސްހަލުވި' ޚިދުމަތުގެ ދަށުން، ގޭބިސީތަކުން އުފެދޭ އާންމު ކުނީގެ ގޮތުގައި ނުހިމެނޭ ބޮޑެތި ކުނި ނެގުމުގެ ޚިދުމަތް ފޯރުކޮށްދެވޭނެއެވެ. މިގޮތުން، ވެމްކޯގެ މުވައްޒަފުން ޚާއްޞަ ޕިކަޕް އުޅަނދުތަކާއެކު ގޭބިސީތަކަށް ޒިޔާރަތްކޮށް، އެފަދަ ކުނި އުފުލައިދޭނެއެވެ. މި ޚިދުމަތުގެ ސަބަބުން، ބަރުދަން ބޮޑު ކުނީގެ ބާވަތްތައް އުކާލުމަށް ދަތިވެފައިވާ ފަރާތްތަކަށް ޚާއްޞަ ލުއިފަސޭހަކަމެއް ލިބިގެންދާނެއެވެ.

2024ވަނަ އަހަރު ވެމްކޯގެ އިސް ލީޑަރޝިޕުގެ މަޤާމުތަކަށް އައްޔަންކުރެވުނު އައު މެނޭޖްމަންޓާއެކު، ކުންފުނީގެ ޚިދުމަތްތަކަށް ފާހަގަކޮށްލެވޭ ބަދަލުތަކެއް ގެނެވި، އައު ޚިދުމަތްތަކެއް ވަނީ ތަޢާރަފުކޮއްފައެވެ. މީގެ ތެރޭގައި، ވެމްކޯއާ ހަވާލުކުރެވުނު އައު ޓްރާންސްފަރ ސްޓޭޝަން މެދުވެރިކޮށް ކުނި ކޮންޓެއިނަރައިޒްކުރުމުގެ ޚިދުމަތް ފެށުމާއި، 'ހޮބާ' ގެ ނަމުގައި އޮފީސް ފޮޅާ ސާފުކުރުމުގެ ޚިދުމަތް ތަޢާރަފުކުރުން ހިމެނެއެވެ. މި އައު ޚިދުމަތްތަކަކީ ވެމްކޯގެ ޚިދުމަތްތައް އިތުރަށް ފުޅާކޮށް، ރައްޔިތުންނަށް ފަސޭހަކަމާއެކު ލިބިގަނެވޭނެ ގޮތަށް ފަރުމާކުރެވިފައިވާ ޚިދުމަތްތަކެކެވެ.

މީގެއިތުރުން، 'ފަތުރުވެށި' ގެ ނަމުގައި ރިސޯޓުތަކުން އުފެދޭ ކުނި އުކާލުމުގެ ޚިދުމަތް ފަށައި، މިހާތަނަށް 8 ރިސޯޓަކުން ވަނީ މި ޚިދުމަތަށް އެއްބަސްވެފައެވެ. އަދި ބަންކަރިންގ ޚިދުމަތަށް ރާއްޖެއަންނަ އުޅަނދުތަކުން ކުނި މެނޭޖްކުރުމުގެ ޚިދުމަތް ފޯރުކޮށްދިނުމަށްވެސް އެ ކުންފުނިން އަންނަނީ ތައްޔާރުވަމުންނެވެ. މި އައު ބަދަލުތަކާއެކު، ވެމްކޯގެ މާލީ ހާލަތަށް ފާހަގަކޮށްލެވޭ ކުރިއެރުންތަކެއް ލިބިފައިވާކަމަށް ވެމްކޯގެ މެނޭޖްމަންޓުން ވަނީ މަޢުލޫމާތު ދެއްވާފައެވެ.