އަމިއްލަ ދަނޑުގައި އެފްސީ ނޯއާ އަތުން ޗެލްސީއަށް ތަފާތުބޮޑު މޮޅެއް

ޔުއެފާ ކޮންފަރެންސް ލީގުގައި މިރޭ އަމިއްލަ ދަނޑުގައި އަރްމޭނިއާގެ އެފްސީ ނޯއާއި ދެކޮޅަށް ޗެލްސީ ކުޅުނު މެޗު ފަސޭހަކަމާއެކު 8-0 ގެ ނަތީޖާއަކުން ކާމިޔާބުކޮށް ޗެލްސީ އިން ލީގު ތާވަލުގެ އެއްވަނައަށް ކުރިއަށް ޖެހިލައިފިއެވެ.

މެޗުގެ ފުރަތަމަ ހާފުގައި ޗެލްސީގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ 6-0 ގެ ނަތީޖާއަކުން ޗެލްސީ ކުރީގައި އޮވެގެންނެވެ. އަދި މެޗުގެ ދެވަނަ ހާފުގައި ނޯއާ އިން އެޓީމުގެ ކުޅުން ރަނގަޅުކުރި ނަމަވެސް މިހާފުގައި ވެސް ޗެލްސީ އިން ވަނީ އިތުރު ދެލަނޑު ކާމިޔާބުކޮށްފައެވެ.

އެގޮތުން މިމެޗުގައި ޗެލްސީގެ ކްރިސްޓޮފާ އެންކުންކޫ އަދި ޖޮއާއު ފެލިކްސް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، އެކްސެލް ޑިސާސީ، ޓޯސިން އަޑަރބަޔޯ، މިޚައިލޯ މުޑްރިކް އަދި މާކް ގިއޫ މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މިނަތީޖާއެކު ކުޅުނު ތިން މެޗުން މޮޅުވެ ނުވަ ޕޮއިންޓާއެކު ލީގު ތާވަލުގެ އެއްވަނާގައި ޗެލްސީ މިވަގުތު އޮތް އިރު، މިމެޗުން ބަލިވި ނޯއާ ކުޅުނު ތިން މެޗުން ލިބުނު ތިން ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ 28 ވަނައިގައެވެ.

ޔުއެފާ ކޮންފަރެންސް ލީގުގައި މިއަހަރު ޖުމްލަ 36 ޓީމަކުން ވާދަކުރަމުން އަންނައިރު، މިއަހަރުގެ މުބާރާތް ކުރިއަށްދަނީ ފުރަތަމަ ރައުންޑުގައި ލީގު އުސޫލުން ކޮންމެ ޓީމަކުން ވެސް ތަފާތު އަށް ޓީމާއެކު ރަށުން ބޭރުގައި ހަތަރު މެޗު، އަދި އަމިއްލަ ދަނޑުގައި ހަތަރު މެޗު ކުޅުމަށްފަހު އެންމެ ރަނގަޅު ނަތީޖާއެއް ހޯދާ އަށް ޓީމަށް މުބާރާތުގެ ރައުންޑް އޮފް 16 އިން ޖާގަ ލިބޭ ގޮތަށެވެ. އަދި ލީގުބުރުގެ ގަދަ އަށް ޓީމުގެ އިތުރުން ދެން އެންމެ ނަތީޖާ ރަނގަޅު 16 ޓީމުގެ މެދުގައި ޕްލޭއޮފް މެޗުތަކެއް ކުޅެ ކުރިހޯދާ އަށް ޓީމަށް މުބާރާތުގެ ރައުންޑް އޮފް 16 ގެ ފަހު އަށް ޖާގަ ލިބިގެންދާނެއެވެ.