ދުނިޔޭގެ އެންމެ ބޮޑު އެއް އެއާލައިން ކަމަށްވާ އެމެރިޓޭސްއިން އިރާނަށް ކުރަމުންދާ ދަތުރުތައް ވަގުތީ ގޮތުން މެދުކަނޑާލައިފި އެވެ.

ޔޫއޭއީގެ ސަރުކާރު ހިއްސާވާ އެއާލައިން, އެމިރޭޓްސް އިން މިއަދު ނެރުނު ބަޔާނެއްގައި ބުނީ އީރާނަށް ކުރާ ދަތުރުތައް މިއަދަށް ކެެންސަލް ކޮށްފައިވާ ކަމަށެވެ.

އެ އެއާލައިނުން ބުނީ އެ ސަރަހައްދުގެ ހާލަތު ވަރަށް ގާތުން ބަލަމުން އަންނަ ކަމަށާއި ދަތުރުތައް ކެންސަލް ކޮށްފައިވަނީ ބަލަން ޖެހޭ ކަންކަން ބެލުމަށްފަހުގައި ކަމަށެވެ.

ނަމަވެސް ކުއްލި ގޮތަކަށް އެމެރިޓޭސްގެ ދަތުރުތައް މެދުކަނޑާލަން ނިންމި ސީދާ ސަބަބެއް ހާމަކޮށްފައެއް ނުވެއެވެ. ބައެއް ރިޕޯޓުތައް ބުނާ ގޮތުގައި މިއީ ޔަހޫދީން އިރާނަށް މިއަދު ހަމަލާއެއް ދޭނެ ކަމުގެ ސިގްނަލް ޔޫއޭއީއަށް ލިބުމާއި އެކު ނިންމި ނިންމުމެކެވެ. ނަމަވެސް އެކަން އަދި މިހާތަނަށް އެއްވެސް ފަރާތަކުން ކަށަވަރުކޮށްދީފައެއް ނުވެއެވެ.

މެދު އިރުމަތި, އަދި ވަކީން ޚާއްސަކޮށް އިރާނާއި އިޒްރޭލާއި ދެމެދު މަޝްެރަހު ހޫނުވެފައިވާ މި ދަނޑިވަޅުގައި ދުނިޔޭގެ ގިނަ އެއާލައިން ތަކަކުން ދަނީ އިރާނަށާއި އިޒްރޭލަށް ކުރަމުންދާ ދަތުރުތައް ވަގުތީ ގޮތުން މެދު ކަނޑާލަމުންނެވެ.

އިޒްރޭލުން އިރާނަށް ހަމަލާއެއް ދޭން ތައްޔާރުވެފައިމިވަނީ އިރާނުން ތާއިދު ކުރާ ޖަމާއަތްތަކުގެ ލީޑަރުން އަވަހާރަކޮށްލުމުގެ ބަދަލު ހިފުމަށް މިމަހުގެ 1 ވަނަ ދުވަހު އިރާނުން އިޒްރޭލަށް 200 އެއްހާ ބެލިސްޓިކް މިސައިލް ފޮނުވާލުމާއި ގުޅިގެންނެވެ. އެގޮތުން އިރާނުން ދިން ހަމަލާގެ ބަދަލު ހިފުމަށް އިޒްރޭލުން އަންނަނީ ބޮޑެތި ތައްޔާރީތަކެއް ވަމުންނެވެ.