އަމިއްލަ ދަނޑުގައި ޔަންގް ބޯއީސް އަތުން ބާސެލޯނާއަށް ފަސޭހަ މޮޅެއް

ޔުއެފާ ޗެމްޕިއަންސް ލީގުގައި އަންގާރަ ދުވަހުގެ ރޭ އަމިއްލަ ދަނޑުގައި ސްވިޒަލޭންޑްގެ ޔަންގް ބޯއީސް އާއި ދެކޮޅަށް ސްޕެއިންގެ ބާސެލޯނާ ކުޅުނު މެޗު ފަސޭހަކަމާއެކު 5-0 ގެ ތަފާތުބޮޑު ނަތީޖާއަކުން ކާމިޔާބުކޮށް ބާސެލޯނާ އިން ލީގު ތާވަލުގެ ނުވަ ވަނައަށް ކުރިއަށްޖެހިލައިފިއެވެ

މުބާރާތުގައި ބާސެލޯނާ ކުޅުނު ފުރަތަމަ މެޗުގައި ފްރާންސްގެ މޮނާކޯ އަތުން 2-1 ގެ ނަތީޖާއަކުން އެޓީމު ބަލިވެފައިވާއިރު، ޔަންގް ބޯއީސްގެ ފުރަތަމަ މެޗުގައި ޕްރެމިއާ ލީގުގެ އެސްޓަންވިލާ އަތުން އެޓީމު ބަލިވީ 3-0 ގެ ނަތީޖާއަކުންނެވެ.

މެޗުގެ ފުރަތަމަ ހާފުގައި ބާސެލޯނާ އިން ތިން ލަނޑުގެ ލީޑެއްހޯދިއިރު، އެޓީމުގެ ފުރަތަމަ ލަނޑު މެޗު ފެށިގެން އަށްވަނަ މިނެޓުގައި، ތަޖުރިބާކާރު ފޯވާޑް ރޮބަޓް ލެވަންޑޮސްކީ ކާމިޔާބުކުރިއިރު، ދެވަނަ ލަނޑު 34 ވަނަ މިނެޓުގައި ކާމިޔާބުކޮށްދިނީ ރަފީނިހާ އެވެ. އަދި އޭގެ ފަސް މިނެޓްފަހުން އެޓީމުގެ ތިންވަނަ ލަނޑު ކާމިޔާބުކޮށްދިނީ ޑިފެންޑަރު އިނީގޯ މާޓިނޭޒް އެވެ.

ދެވަނަ ހާފުގައި ބާސެލޯނާ އިން އިތުރު ދެލަނޑު ކާމިޔާބުކުރިއިރު، މިމެޗުގައި އެޓީމުން ކާމިޔާބުކުރި ހަތަރުވަނަ ލަނޑު ދެވަނަ ހާފުގެ 51 ވަނަ މިނެޓުގައި ކާމިޔާބުކޮށްދިނީ ލެވަންޑޮސްކީ އެވެ. އަދި މިއީ ޗެންޕިއަންސް ލީގުގައި އޭނާ ކާމިޔާބުކުރި 96 ވަނަ ލަނޑެވެ.

މީގެ އިތުރުން މިމެޗުގައި ބާސެލޯނާ އިން ކާމިޔާބުކުރި ފަސްވަނަ ލަނޑަކީ ދެވަނަ ހާފުގެ 81 ވަނަ މިނެޓުގައި ޔަންގް ބޯއީސްގެ ޑިފެންޑަރު މުހައްމަދު ކަމާރާ އަތުން ބައިކޮޅަށް ވަން ލަނޑެކެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 5-0 ގެ ނަތީޖާއަކުން ބާސެލޯނާ ކުރީގައި އޮވެގެންނެވެ.

މިނަތީޖާއެކު ކުޅުނު ދެ މެޗުން ބާސެލޯނާއަށް ތިން ޕޮއިންޓް ލިބިފައިވާއިރު، އެޓީމު މިވަގުތު އޮތީ ލީގު ތާވަލުގެ ނުވަ ވަނައިގައެވެ. އަދި މިމެޗުން ބަލިވި ޔަންގް ބޯއީސް ކުޅުނު ދެމެޗުން ވެސް ބަލިވެ ޕޮއިންޓެއް ނުލިބި އެޓީމު މިވަގުތު އޮތީ ލީގު ތާވަލުގެ ފުލުގައެވެ.

މިއަހަރުގެ ޔުއެފާ ޗެމްޕިއަންސް ލީގު ކުރިއަށްދަނީ ޔޫރަޕްގެ އެންމެ ވަރުގަދަ 36 ޓީމުގެ މެދުގައި ލީގު އުސޫލުންނެވެ. އަދި ކޮންމެ ޓީމަކުން އަށް މެޗު ކުޅެ ލީގު ބުރުގައި އެންމެ ރަނގަޅު ނަތީޖާއެއް ހޯދާ އަށް ޓީމަށް މުބާރާތުގެ ރައުންޑް އޮފް 16 އިން ފުރުސަތު ލިބިގެންދާނެއެވެ. އަދި ނުވަ ވަނައިން ފެށިގެން 24 ވަނަ އާއި ދެމެދު ނޮކްއަޓް މެޗުތަކެއް ކުޅުމަށްފަހު ކުރިހޯދާ އަށް ޓީމަށް ވެސް މުބާރާތުގެ ރައުންޑް އޮފް 16 އިން ފުރުސަތު ލިބިގެންދާނެއެވެ.