80 އިންސައްތަަ މިސައިލް އަމާޒުތަކަށް ފޯރި - އިރާން

އިރާނުން މިރޭ އިޒްރޭލަށް ފޮނުވާލި އެތައް ސަތޭކަ މިސައިލްތަކުގެ ތެރެއިން 80 އިންސައްތަ މިސައިލް އެ މިސައިލްތަކުގެ އަމާޒަށް ފޯރާފައިވާ ކަމަށް އިރާނުން ބުނެފި އެވެ.

އިރާނުގެ ދައުލަތުގެ މީޑިއާއިން ރިޕޯޓުކުރާ ގޮތުގައި އިޒްރޭލަށް ފޮނުވާލި ގާތްގަނޑަކަށް 200 މިސައިލްގެ ތެރެއިން 80 އިންސައްތަ މިސައިލް މިރޭ އެމިސައިލްތަކުހެ އަމާޒުތަކަށް ވަނީ ފޯރާފައި އެވެ. ނަމަވެސް އެއީ ކޮން އަމާޒުތަކެއް ކަމެއް އިރާނުން ހާމައެއް ނުކުރެއެވެ.

ޔަހޫދީއިސްރާއީލުގެ ދިފާއީ ބާރުތަކުން ބުނެފައިވަނީ ފާއިތުވި ގަޑިއިރުތަކުގެ ތެރޭގައި ދިން މި ހަމަލާގައި އެއްވެސް މީހަކަށް ސީރިއަސް އަނިޔާތަކެއް ލިބުނު ކަމެއް އަދި މިހާތަނަށް މައުލޫމާތު ލިބިފައި ނުވާ ކަމަށެވެ. ނަމަވެސް މިސައިލްތައް އިންޓަސެޕްޓްކޮށް ވައްޓާލުމުގެ ތެރޭގައި އިޒްރޭލުގެ ބައެއް ސަރަހައްދުތަކަށް މިސައިލްގެ ކުނިތައް ވެއްޓިފައިވާކަން ޔަހޫދީ އަސްކަރިއްޔާއިން ހާމަކުރެއެވެ.

އިރާނުން އިޒްރޭލަށް އަމާޒުކޮށް ގިނަ އަދަދެއްގެ މިސައިލްތައް ފޮނުވާލީ އިޒްރޭލުން އަވަހާރަކޮށްލި ހަމާސްގެ ލީޑަރު އިސްމާއީލް ހަނިއްޔާ, ހިޒްބުاللهގެ ލީޑަރު ހަސަން ނަސްރަالله އާއި ގުދުސް ފޯސްގެ ކޮމާންޑަރު ނިލްފޯރުޝާންގެ މަރުގެ ބަދަލުހިފުމަށް ކަމަށް އިރާނުން މިރޭ ވަނީ ބުނެފައި އެވެ.

ނަމަވެސް ބަދަލު ހިފުމުގެ ގޮތުން މިސައިލްތަކުން އިޒްރޭލަށް ދޭން ނިންމީ ކޮން ގެއްލުންތަކެއް ހާމަކޮށްފައި ނުވާއިރު ހަމަލާތައް ހުއްޓާލި އިރުވެސް އިޒްރޭލަށް މި ހަމަލާގައި ބޮޑު އެއްވެސް ގެއްލުމެއް ލިބިފައި ނުވާކަމަށް ރިޕޯޓުތައް ބުނެއެވެ.

އަދި މިއީ އިޒްރޭލަށް ބިރު ދެއްކުމަށް އިރާނުން ފޮނުވާލި މިސައިލްތަކެއް ކަމަށްވެސް މަޝްރަހު ދިރާސާ ކުރާ ފަރާތްތަކުން ބުނެއެވެ.

އިރާނުގެ މި މިސައިލްތަކުން އިޒްރޭލު ސަލާމާތްކޮށްދިނުމަށް އުރުދުންގެ ސަލާމަތީ ބާރާއި އެމެރިކާގެ އަސްކަރިއްޔާއިން ވެސް ވަނީ މިރޭ ގިނަ މަސައްކަތްތަކެއް ކޮށްފައެވެ, އެކަން އެދެގައުމުން ވެސް ވަނީ ރަސްމީކޮށް ހާމަކޮށްފައެވެ.