އިރާނުގެ ހަމަލާތަކުގެ އަމާޒުހުރީ ތެލް އަވީވް އަށާއި އިޒްރާލުން ހިފާފައިވާ ގުދުސްއަށް!

އިރާނުން މިއަދު އިޒްރޭލަށް ހަމަލާދިނުމަށް ފޮނުވާލި މިސައިލްތައް އަމާޒުކޮށްފައިވަނީ ވެރިރަށް ތެލް އަވީވް އާއި އިޒްރޭލުން ހިފާފައިވާ ގުދުސްއަށް ކަމަށް ރިޕޯޓުތައް ބުނެފި އެވެ.

ރިޕޯޓުތައް ބުނާ ގޮތުގައި އިރާނުގެ ބައެއް މިސައިލްތައް މިހާރު ވަނީ އަމާޒަށް ވާސިލްވާން ފަށާފައި އެވެ. އަދި މީގެ އިރުކޮޅެއް ކުރިން ގުދުސްއިން ބާރު ގަދަ ގޮވުމެއްގެ އަޑު އިވިފައިވާކަންވެސް ބައެއް ނޫސްތަކުން ދަނި ރިޕޯޓުކުރަމުންނެވެ.

ނަމަވެސް މި ހަމަލާތަކުގައި މިހާތަނަށް އިޒްރޭލުން އެއްވެސް މީހަކު މަރުވި ކަމެއް ނުވަތަ ޒަހަމްވި ކަމެއްވެސް އަދި މިހާތަނަށް ރިޕޯޓުކޮށްފައެއް ނުވެއެވެ.

އިރާނުން އިޒްރޭލަށް ހަމަލާދޭން ފަށާނެ ކަން މީގެ ގަޑިއިރުތަކެއް ކުރިން އެމެރިކާއިން ވެސް ވަނީ ހާމަކޮށްފައެވެ. އަދި އެމެރިކާގެ އިންޓެލިޖެންސަށް ލިބުނު މި މައުލޫމާތުތައް އިޒްރޭލާއި ހިއްސާކޮށް ހަމަލާތައް ފެށުނު އިރު އިޒްރޭލުވެސް އޮތީ ވަރަށް ބޮޑަށް ތައްޔާރަށެވެ.

އިރާނުން 200 އަށްވުރެ މިސައިލް އުދުއްސާލި އިރު މި މިސައިލްތަކުގެ އަމާޒަކަށް ވާނި އިޒްރޭލު ސަރުކާރުގެ އަދި އަސްކަރިއްޔާގެ މަރުކަޒުތައް ކަމަށް މީގެ ކުރިން ރޮއިޓާސްއިންވެސް ވަނީ ރިޕޯޓުކޮށްފައެވެ. ތެލް އަވީވް އާއި ގުދުސްގައި ވެސް އިޒްރޭލުގެ ގިނަ އަސްކަރީ މަރުކަޒުތަކެއް ހުރެއެވެ.