ނަސޫހްގެ ދެލަނޑާއެކު މާމިގިލި ބަލިކޮށް، އަތޮޅު ފުޓުބޯޅަ މުބާރާތު ގެ ތަށި، 9 ވަނަ ފަހަރަށް މަހިބަދޫ އިން ކާމިޔާބުކޮށްފި

މާމިމިގިލީގައި ކުރިއަށްދިޔަ، އދ.އަތޮޅުގެ 13 ވަނަ އަތޮޅު ފުޓްބޯޅަ މުބާރާތުގެ ފައިނަލުގައި 4-2 ގެ ނަތީޖާއަކުން މާމިގިލީ ބަލިކޮށް އެންމެ ފަހުގެ ޗެންޕިއަން މަހިބަދޫ އިން މުބާރާތުގެ ތަށި ދިފާއުކޮށްފިއެވެ.

މިނިވަންދުވަސް އަތޮޅު ފެންވަރުގައި ފާހަގަކުރުމުގެ ގޮތުން އދ. މާމިގިލީގައި ބޭއްވުނު ކުޅިވަރުތަކުގެ ތެރެއިން، ޒުވާނުންގެ ފުޓްބޯޅަ މުބާރާތުގެ ނަމުގައި އދ. އަތޮޅަށް ހުޅުވާލައިގެން ބޭއްވުނު މިއަހަރުގެ މުބާރާތުގައި ޖުމްލަ ފަސް ޓީމަކުން ބައިވެރިވެފައިވެއެވެ.

19 ޖުލައި 2024 އިން 05 އޮގަސްޓް 2024ގެ ނިޔަލަށް މާމިގިލީގައި މުބާރާތް ކުރިއަށް ގެންގޮސްފައިވަނީ ބައިވެރިވި ފަސްޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއްމެޗު ކުޅެ އެންމެ ރަނގަޅު ނަތީޖައެއް ހޯދާ ޓީމެއް ފައިނަލަށް ހޮވޭގޮތަށެވެ. އަދި ފައިނަލުގެ ދެވަނަ ޖާގަ ހޯދުމަށް ލީގުބުރުގެ ދެވަނަ ޓީމާއި ތިންވަނަ ޓީމުގެ މެދުގައި ވަނީ ޕްލޭއޮފް މެޗެއް ކުޅެފައެވެ.

އެގޮތުން ލީގުބުރުގެ އެއްވަނަ ޓީމުގެ ގޮތުގައި މާމިގިލި ފައިނަލުން ޖާގަހޯދިއިރު، މަހިބަދޫ ފައިނަލުން ޖާގަހޯދީ ލީގު ބުރުގެ ދެވަނަ ޓީމާއި ތިންވަނަ ޓީމުގެ މެދުގައި ކުޅެވުނު ޕްލޭއޮފް މެޗުގައި ފަސޭހަކަމާއެކު 4-0 ގެ ނަތީޖާއަކުން މަނަދޫ ބަލިކުރުމަށްފަހުއެވެ. އަދި މިދެޓީމު ލީގުބުރުގައި ކުޅުނު މެޗު ވާދަވެރި ކުޅުމަކަށްފަހު 2-1 ގެ ނަތީޖާއަކުން ކާމިޔާބުކުރީ މާމިގިލީގެ ޓީމެވެ.

މިއަދު ހަވީރު މާމިގީލީ ފުޓްބޯޅަ ދަނޑުގައި ކުރިއަށްދިޔަ ފައިނަލް މެޗުގެ ފުރަތަމަ ހާފުގައި ޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ މަހިބަދޫ ޓީމުންނެވެ. މިލަނޑު ފުރަތަމަ ހާފުގެ 20 ވަނަ މިނެޓުގައި އެޓީމަށް ކާމިޔާބު ކޮށްދިނީ ކެޕްޓަން ސަމޫހު އެވެ. މިއީ އެޓީމަށް ލިބުނު ކޯނަރެއްގައި މިދުހަތު ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައި އޭނާ ކާމިޔާބުކޮށްދިން ލަނޑެކެވެ.

ނަމަވެސް ފުރަތަމަ ހާފު ނިމުމުގެ ކުރިން މާމިގިލިން ވަނީ ލަނޑެއް ކާމިޔާބުކޮށް މެޗުގެ ނަތީޖާއެއްވަރުކޮށްފައެވެ. މިލަނޑު ފުރަތަމަ ހާފުގެ އިތުރު ވަގުތުގެ ތެރޭގައި އެޓީމަށް ލިބުނު ޕެނަލްޓީއެއްގައި ކާމިޔާބުކޮށްދިނީ ޔަސްފާދު ހަބީބު، (މުލަކޭ) އެވެ. އަދި މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-1 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި މަހިބަދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ފެށިގެން ހަތްވަނަ މިނެޓުގައި އެޓީމުގެ އަލީ ނަސޫހް ރަޝީދު ވަނީ ލަނޑެއް ކާމިޔާބުކޮށް އެޓީމަށް މިމެޗުގައި ދެވަނަ ފަހަރަށް ލީޑު ހޯދައިދީފައެވެ. އަދި އެޓީމުން ލީޑު ފުޅާކުރި ލަނޑު ދެވަނަ ހާފުގެ 61 ވަނަ މިނެޓުގައި އާދަމް ނާއިމް ކާމިޔާބުކުރިއިރު، އެޓީމުގެ ހަތަރުވަނަ ލަނޑު ފަހުހާފުގެ 77 ވަނަ މިނެޓުގައި ކާމިޔާބުކޮށްދިނީ ނަސޫހް އެވެ.

މާމިގިލިން ނަތީޖާގެ ފަރަގު ކުޑަކުރި ލަނޑު ދެވަނަ ހާފުގެ އިތުރު ވަގުތުގެތެރޭގައި ކާމިޔާބުކޮށްދިނީ އިބްރާހިމް މަހުދީ އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 4-2 ގެ ނަތީޖާއަކުން މަހިބަދޫ ކުރީގައި އޮވެގެންނެވެ. އަދި މިއީ މިމުބާރާތުގެ ޗެންޕިއަންކަން މަހިބަދޫއިން ހޯދި 9 ވަނަ ފަހަރެވެ.