ތުރުކީގައި މިހާރު ކުރިޔަށްދާ ގައިދީން ބަދަލުކުރުމުގެ އޮޕަރޭޝަން: ފިނި ހަނގުރާމައަށްފަހު ކުރިޔަށްދާ މިފަދަ އެންމެ ބޮޑު އޮޕަރޭޝަން!

ރަޝިއާ އާއި އެމެރިކާ އާއި ހުޅަނގުގެ ބައިވެރިންނާ ދެމެދު މިހާރު ތުރުކީގެ ވެރިރަށް އަންކަރާގައި ކުރިޔަށްދާ ގައިދީން ބަދަލުކުރުމުގެ އޮަޕަރޭޝަނަކީ ފިނި ހަނގުރާމައަށްފަހު ކުރިޔަށްދާ މިފަދަ އެންމެ ބޮޑު އޮޕަރޭޝަނެވެ.

އެގޮތުން މި އޮޕަރޭޝަންގައި ރަޝިޔާ އާއި އެމެރިކާގެ އިތުރުން ޔޫރަޕުގެ 4 ގައުމެއްގެ ގައިދީން ބަދަލުކުރުމަށް ހަމަޖެހިފައިވާ ކަމަށް މި އޮޕަރޭޝަންގެ މައުލޫމާތު އިނގޭ މަސްދަރުތަކާއި ހަވާލާދީ ސީއެންއެންއިން އަންނަނީ ރިޕޯޓުކުރަމުންނެވެ. ޔޫރަޕުގެ ގައުމުތަކުގެ ތެރެއިން މިހާތަނަށް ކަށަވަރުވެފައިވަނީ ޖަރުމަނުގެ ބައިވެރިވުން އެކަންޏެވެ.

ތާރީހަށް ބަލާއިރު މިފަދަ ބޮޑު ގައިދީން ބަދަލުކުރުމުގެ އޮޕަރޭޝަނެއް އެންމެ ފަހުން މިހާ ފުޅާދާއިރާއެއްގައި ކުރިޔަށް ގެންގޮސްފައިވަނި 1991 ވަނަ އަހަރު ހިނގި ފިނި ހަނގުރާމައިގެ ތެރޭގައި އެވެ.

އަލްޖަޒީރާއިން ބުނާ ގޮތުގައި ހަތް ގައުމެއް ހިމެނޭ މި ގައިދީން ބަދަލުކުރުމުގެ އޮޕަރޭޝަންގައި ދެ ކުޑަކުދިން ހިމެނޭހެން 26މީހަކު ހިމެނެއެވެ.

އޭގެ ތެރޭގައި ރަޝިޔާގެ ހައްޔަރުގައި ހުރި އެމެރިކާގެ ނޫސްވެރިޔާ އީވާން ގަރްޝްކޮވިޗް އާއި އެމެރިކާގެ ކުރީގެ މެރިން އޮަފިސަރެއް ކަމަށްވާ ޕޯލް ވެލަން ވެސް ހިމެނޭ ކަމަށް ރިޕޯޓުތައް ބުނެއެވެ. އަދި އޭގެ އިތުރުންވެސް ރަޝިޔާގެ ހައްޔަރުގައި ތިބި އެމެރިކާގެ އިތުރު ނޫސްވެރިންތަކެއްވެސް ހިމެނޭ ކަމަށް ރިޕޯޓުތައް ބުނެއެވެ.

މީގެ އިތުރުން ޖަރުމަނުގެ ނޫސް މަޖައްލާ "ޑާ ސްޕީގަލް" އިން ރިޕޯޓްކުރާ ގޮތުގައި ރަޝިއާއާ އެކު ގައިދީން ބަދަލުކުރުމުގެ ބޮޑު މުއާމަލާތެއްގެ ދަށުން ރަޝިއާގެ އެފްއެސްބީ އިންޓެލިޖެންސް ސާވިސްގެ ކާނަލްއެއްގެ ގޮތުގައި ޖަރުމަނުގެ އޮފިޝަލުން ފާހަގަކޮށްފައިވާ ވަޑިމް ކްރަސިކޯވް ތުރުކީގެ އަންކާރާއަށް ދާ މަތިންދާ ބޯޓެއްގައި ދަތުރު ކުރަމުން އެބަދެ އެވެ. އޭނާ އަކީ 2019 ވަނަ އަހަރު ބާލިންގެ ޕާކެއްގައި ކްރެމްލިންގެ ވާދަވެރިއެއް މަރާލި މައްސަލާގައި އުމުރު ދުވަހުގެ ޖަލު ހުކުމެއް ތަންފީޒު ކުރަމުން ދިޔަ މީހެކެވެ. ޖަރުމަނުން އޭނާ ސިފަ ކުރަނީ ރަޝިޔާގެ ހިޓްމޭންގެ ގޮތުގައި އެވެ.