ރޮސެންބާގް އަތުން ފަހުވަގުތު މެންޗެސްޓާ ޔުނައިޓެޑް ބަލިވެއްޖެ

ކުރިއަށް އޮތް ސީޒަނަށް ތައްޔާރުވުމުގެ ގޮތުން ޕްރެމިއާ ލީގުގެ މެންޗެސްޓާރ ޔުނައިޓެޑާއި ނޯވޭގެ ރޮސެންބާގް ވާދަކުރި މެޗުގެ އިތުރު ވަގުތުގެ ތެރޭގައި ކާމިޔާބުކުރި ލަނޑާއެކު 1-0 ގެ ނަތީޖާއަކުން ރޮސެންބާގް މޮޅުވެއްޖެއެވެ.

މިދިޔަ ސީޒަނުގައި ޕްރެމިއާ ލީގުގެ އަށް ވަނަ ހޯދި މެންޗެސްޓާ ޔުނައިޓެޑުން ލީގުގައި އެންމެ އެދޭވޭ ނަތީޖާތަކެއް ނުހޯދުނު ނަމަވެސް އެފްއޭ ކަޕްގެ ފައިނަލުގައި ޕްރެމިއާ ލީގުގެ ޗެންޕިއަން މެންޗެސްޓާ ސިޓީ ބަލިކޮށް އެޓީމުން ވަނީ ކުރިއަށް އޮތް ސީޒަނުގެ ޔުއެފާ ޔުރޮޕާ ލީގުން ޖާގައެއް ކަށަވަރުކޮށްފަ އެވެ.

ރޮސެންބާގާއި ދެކޮޅަށް ޔުނައިޓެޑުން ވަރުގަދަ ޓީމެއް ނެރުނުއިރު، ފުރަތަމަ އެގާރައިގައި ބުރެޒިލްގެ ތަޖުރިބާކާރު މިޑްފީލްޑަރު ކަސަމީރޯ، މައުޓް، ރަޝްފޯޑް، އިވަންގެ އިތުރުން ވެމްބިސާކާ ކުޅެފައިވާއިރު، މިމެޗުގައި ޔުނައިޓެޑްގެ ފަރާތުން ފެނިގެންދިޔައީ ވަރަށް އާދައިގެ ކުޅުމެކެވެ. އެގޮތުން މުޅި މެޗުގައި ވެސް ރޮސެންބާގް ގެ ގޯލާއި އަމާޒުކޮށް ޔުނައިޓެޑަށް ފޮނުވާލެވިފައި ވަނީ އެންމެ ދެ ހަމަލާއެވެ.

މީގެ އިތުރުން މިމެޗުގައި ގިނަވަގުތު ބޯޅަ ހިފަހައްޓައިގެން މޮޅަ ކުޅެ ރޮސެންބާގުން ވަނީ ޔުނައިޓެޑިގެ ގޯލަށް 12 ހަމަލާއެއް ފޮނުވާލާފައެވެ. އަދި އޭގެ ތެރެއިން ހަ ހަމަލާއެއް ގޯލާއި އަމާޒުވިއިރު، މިމެޗުން އެޓީމު މޮޅުވި ލަނޑު ދެވަނަ ހާފުގެ އިތުރު ވަގުތުގެ ތެރޭގައި ކާމިޔާބުކޮށްދިނީ އެޓީމުގެ ޒުވާން ފޯވާޑް ނޯއާ ހޯލްމް އެވެ.

އަންނަ މަހުގެ 10 ވަނަ ދުވަހު ކުޅޭ ކޮމިއުނިޓީ ޝީލް މެޗުގެ ކުރިން މެންޗެސްޓާ ޔުނައިޓެޑުން އެކުވެރިކަމުގެ އިތުރު ހަތަރު މެޗު ކުޅުމަށް ހަބަޖެހިފައިވާއިރު، މިމަހުގެ 20 ވަނަ ދުވަހު އެޓީމުން ނުކުންނާނީ ސްކޮޓްލޭންޑްގެ ރޭންޖާސް އާއި ދެކޮޅަށެވެ.