ފުލުހުންނާއި ޔުނިސެފް ގުޅިގެން ގައުމީ ކުޑަކުދިންގެ ދުވަސް ކުޑަހުވަދޫގައި ކުލަގަދަކޮށް ފާހަގަކޮށްފި

ދިވެހި ފުލުހުންގެ ޚިދުމަތުގެ ފެމިލީ އެންޑް ޗައިލްޑް ޕްރޮޓެކްޝަނާއި ޔުނިސެފް މޯލްޑިވްސް އަދި ކުޑަހުވަދޫ ޕޮލިސް ސްޓޭޝަނާއި ކުޑަހުވަދޫގެ މުއައްސަސާތައް ގުޅިގެން ގައުމީ ކުޑަކުދިންގެ ދުވަސް ފާހަގަކުރުމުގެ ހަރަކާތްތަކެއް ކުރިއަށް ގެންގޮސްފިއެވެ.

މެއި 8 އިން 11 އަށް ކުރިއަށް ގެންދިޔަ މި ހަރަކާތްތަކުގައި ބެލެނިވެރިންނަށް މައުލޫމާތު ދިނުމުގެ ހަރަކާތްތަކާއި ކުޑަކުދިންނަށް ހާއްސަކޮށްގެން ކުޅިވަރުގެ ހަރަކާތްތައް ކުރިއަށް ގެންގޮސްފައިވެއެވެ.

އެގޮތުން، މުޖުތަމައުގައި އާންމުވަމުންދާ ހަނގާކުރުމުގެ މައްސަލަތަކާ ގުޅޭގޮތުން ބެލެނިވެރިން ހޭލުންތެރިކުރުވުމަށް ”ސައިބަރ ސޭފްޓީ އެންޑް ބުލީންގ” ގެ ނަމުގައި މައުލޫމާތުދިނުމުގެ ސެޝަނެއް ކުރިއަށް ގެންގޮސްފައިވެއެވެ. އަދި ދަރިން ތަރުބިއްޔަތުކުރުމުގައި ބައްޕައިންގެ ޒިންމާއާ ގުޅޭގޮތުން ދީނީ މައުލޫމާތު ދިނުމުގެ ސެޝަންތަކެއް ކުރިއަށް ގެންގޮސްފައިވެއެވެ. މި ސެޝަންތައް ކުރިއަށް ގެންގޮސްފައިވަނީ ކުޑަހުވަދޫ ޔުނައިޓެޑް އިސްލާމިކް ސޮސައިޓީގެ ފަރާތުންނެވެ. ކުޑަހުވަދޫގެ ތިން މިސްކިތެއްގައި މި ސެޝަންތައް ކުރިއަށް ގެންގޮސްފައިވާއިރު ގިނަ އަދަދެއްގެ މީހުން ބައިވެރިވިއެވެ.

އޭގެ އިތުރުން، މެއި 10 ވަނަ ދުވަހުގެ ހެނދުނު ކުޑަހުވަދޫގެ ސުވިމިންގ ޓްރެކް ސަރަހައްދުގައި ކުޑަކުދިންނަށް ހާއްސަ މޫދު ކުޅިވަރުތަކެއް ކުރިއަށް ގެންގޮސްފައިވެއެވެ. މި ހަރަކާތުގައި ފަތަން ދަސްކޮށްދިނުމާއި، ރޭސް ޖެހުން އަދި ކުޑަކުދިން ޝައުގުވެރިވާނެ ފަދަ ތަފާތު ކުޅިވަރުތައް ކުރިއަށް ގެންގޮސްފައިވެއެވެ. މި ހަރަކާތްތައް ކުރިއަށް ގެންދިއުމުގައި ސުވިމިންގ އެސޯސިއޭޝަންގެ ފަރާތުން އެހީތެރިކަން ލިބިފައިވެއެވެ.

އަދިވެސް އޭގެ އިތުރުން، ކުޑަކުދިންގެ ދުވަހާ ގުޅިގެން ތައްޔާރުކުރެވިފައިވާ އެެވެއާނެސް ބިލްބޯޑް ހުޅުވުމުގެ ރަސްމިއްޔާތު މެއި 11 ވަނަ ދުވަހު ކުރިއަށް ގެންގޮސްފައިވެއެވެ. ބިލް ބޯޑު ހުޅުވައިދެއްވީ އެސިސްޓެންޓް ކޮމިޝަނަރ އޮފް ޕޮލިސް ޙުސައިން ރަޝީދު އަދި ކުޑަހުވަދޫ ކައުންސިލުގެ ނައިބު ރައީސް ޠާޤާ އަޙްމަދުއެވެ. މި ރަސްމިއްޔާތުގައި ރަށުގެ މުއައްސަސާތަކުގެ އިސް ވެރިން ބައިވެރިވެލެއްވިއެވެ. މި ބިލްބޯޑުގައި “ކިތަންމެ އިތުބާރުކުރިޔަސް ނިވާކަން ކުޑަ ފޮޓޯ އާއި ވީޑިއޯ ނަގަން ނޫނެކޭ ބުނާނަން” މި ޝިއާރުގެ ދަށުން މައުލޫމާތު ހިމަނާފައިވެއެވެ. ކުޑަހުވަދޫ ”ބޮޑާވައް މައިޒާން” ގައި މި ބޯޑު ގިނަ އަދަދެއްގެ ބަޔަކަށް ފެންނާނެހެން ބަހައްޓާފައިވަނީ މިކަމަކީ މިއަދު ރާއްޖޭގެ މުޖުތަމައުތަކުގައި އާންމުވެ ފެތުރެމުންދާ ކަމަކަށްވާތީ ކުދިބޮޑު ހުރިހާ ރައްޔިތުން މިކަމަށް އަހުލުވެރިކުރުވުމަށެވެ.

މީގެ އިތުރުން، ކުޑަކުދިންނާއި ރަށުގެ ރައްޔިތުން ތިމާވެއްޓަށް ހޭލުންތެރިކުރުމުގެ ގޮތުން ރަށުތެރެ ސާފުކުރުމާއެކު ގަސް އިންދުމުގެ ހަރަކާތެއް ކުރިއަށް ގެންގޮސްފައިވެއެވެ.

ކުޑަކުދިންގެ ދުވަހުގެ ހަރަކާތްތައް ނިންމައިލާފައިވަނީ ކުޑަކުދިންގެ ހާއްސަ ހަވީރަކުންނެވެ. 16 ސްޓޯލަށްވުރެ މަދުނުވާނޭހެން އެކި މުއައްސަސާތަކުން ސްޓޯލް ބަހައްޓައިގެން ކުރިއަށް ގެންދިޔަ މި ހަވީރު ކުޑަކުދިންގެ މެދުގައި ވަރަށް މަގުބޫލު ހަވީރަކަށް ވެގެންދިޔައެވެ. މި ހަވީރުގައި ބެންކު އޮފް މޯލްޑިވްސް ކުޑަހުވަދޫ ގޮފި، މޯލްޑިވްސް އިސްލާމިކް ބެންކު ކުޑަހުވަދޫ ގޮފި، ރަށު ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީ، ފެނަކަ، ދާލު އެއާޕޯޓު، ކުޑަހުވަދޫ ޕޮލިސް ސްޓޭޝަން، ކަނޑިންމަ ރިސޯޓު، ނިޔާމަ ރިސޯޓު، ރިއު ރިސޯޓު، އެމް.އެން.ޑީ.އެފް ކުޑަހުވަދޫ ޕޯސްޓު، ދ. ފެމެލީ އެންޑް ޗިލްޑްރެން ސަރވިސް ސެންޓަރު، ޔުނައިޓެޑް އިސްލާމިކް ސޮސައިޓީ، ރޯޑް ޑިވެލޮޕްމަންޓް ކޯޕަރޭޝަން އަދި ދ. އަތޮޅު ހޮސްޕިޓަލުން ބައިވެރިވެ ސްޓޯލް ބަހައްޓާފައިވެއެވެ.

މި ހަވީރު ކުރިއަށް ގެންދިޔަ ސަރަހައްދުގައި ދ. އަތޮޅު ތައުލީމީ މަރުކަޒުގެ ޕީ.ޓީ.އޭ ގެ ފަރާތުން ކެންޓީނުގެ ޚިދުމަތްދީފައިވެއެވެ. ކުޑަކުދިންގެ މި ހަވީރުގައި ފުލުހުންގެ ސްޓޯލުގައި ބަހައްޓާފައިވާ ވޯޓަރ ސްލައިޑަކީ މުޅި ހަވީރުގައި އެންމެ ގިނަ ކުޑަކުދިންގެ ޝައުގުވެރިކަން ހޯދި އެއްހަރަކާތެވެ. ސްޓޯލުތަކުގެ އިތުރުން ކައުންސިލުގެ ފަރާތުން، މި ހަވީރުގައި ކުދިންގެ ހުނަރު ދައްކައިލުމުގެ ފުރުސަތުދިނުމުގެ ގޮތުން ސްޓޭޖެއް ބަހައްޓާފައިވެއެވެ.

ގައުމީ ކުޑަކުދިންގެ ދުވަހުގެ މުނާސަބަތުގައި ޔުނިސެފް، އެފް.ސީ.ޕީ އަދި ކުޑަހުވަދޫ ޕޮލިސް ސްޓޭޝަނާއި ކުޑަހުވަދޫގެ މުއައްސަސާތައް ގުޅިގެން ހިންގި ހުރިހާ ހަރަކާތެއް ވެސް ވަރަށް ކާމިޔާބު ހަރަކާތެއްގެ ގޮތުގައި ފާހަގަކުރެވިފައިވެއެވެ.