އެއިޑްސް، ޓީބީ އަދި މެލޭރިއާ އާ ދެކޮޅަށް މަސައްކަތް ކުރުމަށް އެކުލަވާލާފައިވާ ގްލޯބަލް ފަންޑުން 14.25 ބިލިއަން އެމެރިކާ ޑޮލަރު އެއްކޮށްފިއެވެ.

މީޑިއާ ރިޕޯޓުތައް ބުނާ ގޮތުގައި މި އަދަދާ ހަމައަށް ފައިސާ އެއްކުރެވުނީ، އެމެރިކާގެ ރައީސް، ޖޯ ބައިޑެން އިސްނަންގަވައިގެން އެކަމަށްޓަކައި އިއްޔެ ބޭއްވި ޚާއްސަ ކޮންފަރެންސެއްގައެވެ. މިއީ މަލްޓިލޭޓަރަލް ހެލްތު އޯގަނައިޒޭޝަނަކަށް ދޭނެ ކަމަށް މިހާތަނަށް ވައުދުވި އެންމެ ބޮޑު އަދަދެވެ.

ގްލޯބަލް ފަންޑަކީ 2002 ވަނަ އަހަރު ސަރުކާރުތަކާއި، މަލްޓިލޭޓަރަލް އޭޖެންސީތަކާއި، މަދަނީ ޖަމްޢިއްޔާތަކާއި، ޕްރައިވެޓް ސެކްޓަރ ގުޅިގެން އުފައްދާފައިވާ ފަންޑެކެވެ.

އިއްޔެ ބޭއްވި އެ ކޮންފަރެންސުގައި އެންމެ ބޮޑު އަދަދެއް ދޭނެ ކަމަށް ވައުދުވީ އެމެރިކާއިންނެވެ. އެގޮތުން އެގައުމުން އެ ފަންޑަށް 6 ބިލިއަން ޑޮލަރު ދޭނެކަން އިއުލާންކޮށްފައިވާއިރު، ފްރާންސުން ވަނީ 1.6 ބިލިއަން ޔޫރޯ ދޭނެ ކަމަށް ބުނެފައެވެ. ޖަރުމަނު ވިލާތުން 1.3 ބިލިއަން ޑޯލަރު ދޭން އެއްބަސްވި އިރު ޖަޕާނުން 1.08 ބިލިއަން ޑޮލަރު، ކެނެޑާއި 1.21 ބިލިއަން ޑޮލަރު އަދި ޔޫރަޕްގެ އިއްތިހާދުން 715 މިލިއަން ޑޮލަރު ދޭން ވަނީ އެއްބަސްވެފައެވެ. މީގެ އިތުރުން ގޭޓްސް ފައުންޑޭޝަނުންވެސް ވަނީ 912 މިލިއަން ޑޮލަރު ދޭނެ ކަމަށް ވައުދުވެފައެވެ.

އެ ކޮންފަރެންސުގެ ގޯލަކަށް ވީ އެ ފަންޑަށް 18 ބިލިއަން ޑޮލަރު ހަމަކުރުމަށެވެ. ނަމަވެސް އެ ޓާގެޓް ހަމަ ނުވީ އިޓަލީއާއި އިނގިރޭސި ވިލާތުން ދޭނެ އަދަދެއް ހާމަ ނުކުރުމުން ކަމަށް ޚަބަރުތައް ބުނެ އެވެ. ރިޕޯޓުތައް ބުނާ ގޮތުގައި އެ ދެ ގައުމުވެސް އޮތީ ފަންޑަށް އެހީވާ ގޮތަށެވެ. ނަމަވެސް ފަންޑަށް ފޯރުކޮށްދޭނެ އަދަދު ފަހުން ހާމަކުރާނެ ކަމަށް އެ ދެ ގައުމުން ވަނީ ބުނެފައެވެ.