ކަނޑުގެ ސަރަހައްދު ޕެޓްރޯލްކުރުމަށް އިތުރު 17 އުޅަނދު ގެންނަން ނިންމާފައިވާކަން ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ހާމަކުރައްވައިފިއެވެ.ވަޒީރު މިކަން ހާމަކުރެއްވީ، ދައުލަތުގެ އެކި ވުޒާރާތަކުގެ މަސައްކަތްތަކާ ގުޅިގެން ރައްޔިތުންގެ ހުރި ސުވާލުތަކަށް ޖަވާބު ދިނުމަށް ކުރިއަށްގެންދާ "އަހާ" ފޯރަމްގެ 8 ވަނަ ޕްރޮގްރާމުގައި މިރޭ ކުރިމަތި ކުރި ސުވާލަކަށް ޖަވާބުދެއްވަމުންނެވެ.

ވަޒީރު ވިދާޅުވީ ރާއްޖޭގެ ކަނޑުގެ ސަރަހައްދުގެ ރައްކާތެރިކަން ކަށަވަރުކުރުމަށް، ސިފައިން ތިއްބަވަނީ އަބަދުވެސް ތައްޔާރީ ޙާލަތުގައި ކަމަށާއި ފުރިހަމަކަމާއެކު ސިފައިންގެ މަސައްކަތް ކުރެވޭނީ އެކަމަށް ބޭނުންވާ ވަސީލަތްތައް ހަމަޖައްސައިގެން ކަމަށެވެ.މިގޮތުން، އެކަން ހާސިލުކުރުމަށް، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވެރިކަމާއި ހަވާލުވެވަޑައިގެންނެވުމަށް ފަހު ޤައުމީ ދިފާޢީ ބާރުގެ ވަސީލަތްތައް އިތުރުކުރުމަށް ގިނަ މަސައްކަތްތަކެއް ކުރައްވާފައިވާކަން ފާހަގަކުރެއްވިއެވެ.

މިމޭރުމުން ވާހަކަދައްކަވައި، ވަޒީރު ވަނީ ތުރުކީން މަނަވަރެއް ހޯއްދެވުމާއި، ވައިގެ ސަރަހައްދު ބެލެހެއްޓުމަށް އަސްކަރީ ޑްރޯން ބޭނުންކުރުމުގެ އިތުރަށް އޮސްޓްރޭލިއާ ސަރުކާރުން ދެއްވި މަނަވަރު ފަދަ ވަސީލަތްތައް ހޯދެވުމުގެ މުހިންމުކަން ފާހަގަކުރައްވާފައެވެ.

ކޯސްޓްގާޑަށް ބޭނުންވާ ގިނަ އުޅަނދުތައް ހޯދުމުގެ މަސައްކަތް މިހާރުވެސް ކުރަމުންދާކަމަށާއި، މިހާތަނަށް ޕެޓްރޯލްކުރުމަށް އިތުރު 3 އުޅަނދު ހޯދާފައިވާކަމަށް ވަޒީރު ވިދާޅުވިއެވެ. ކުރިއަށް އޮތްތަނުގައި އިތުރު 17 އުޅަނދު ގެންނަވާނެކަމަށާ، އޭގެ ތެރެއިން ބައެއް އުޅަނދުތައް އަންނަ ނޮވެމްބަރު މަހު ރާއްޖެ ގެނެވޭނެކަމަށް ވަޒީރު ވިދާޅުވިއެވެ. ހަމައެހެންމެ 12 ސީއެމްބިއުލާންސް ބަނުމުގެ މަސައްކަތްވެސް ކުރިއަށްދާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ރާއްޖޭގެ ސަލާމަތާއި ރައްކާތެރިކަން އިތުރުކުރެވި، ބޭރުގެ ފަރާތަކުން ދީފާނެ ހަމަލާއަކަށް ނުވަތަ އެފަދަ އެހެން ހާލަތަކަށް ފުރިހަމައަށް ތައްޔާރަށް އޮތްކަމަށް ވަޒީރު ވިދާޅުވިއެވެ.