ބޭންކް އޮފް މޯލްޑިވްސް (ބީއެމްއެލް9 އިން އަކްރަމް ކަމާލުއްދީންގެ މައްޗަށް ކުރި ދައުވާ އަނބުރާ ގެންގޮސްފިއެވެ.

މިއީ އެ ބޭންކުގެ ކްރެޑިޓް ކާޑް ބޭނުން ކުރުމަށްފަހު ފައިސާ ނުދައްކައިގެން ކޮށްފައިވާ ދައުވާއެކެވެ.

ހައުސިން މިނިސްޓްރީގެ ކުރީގެ ސްޓޭޓް މިނިސްޓަރު އަކުރަމް ކަމާލުއްދީނުގެ މައްޗަށް ބީއެމްއެލް އިން މި މައްސަލަ އަނބުރާ ގެންދިއުމަށް ބޭންކުން ހުށަހެޅުމާ ގުޅިގެން ސިވިލް ކޯޓުން މި މައްސަލަ ނިންމި ގަޒިއްޔާގައި ވަނީ މި މައްސަލަައަކީ، އަކްރަމް ކަމާލުއްދީންގެ އެދުމަކަށް ބޭންކުން 112،300 ރުފިޔާގެ ކްރެޑިޓްކާޑް ލިމިޓެއް ދޫކޮށް، އެ ލިމިޓުގެ ދަށުން ދޫކޮށްފައިވާ ވިސާ ޕްލެޓިނަމް ކްރެޑިޓްކާޑް، އަދި އެމެރިކަން އެކްސްޕްރެސް ޕްލެޓިނަމް ކްރެޑިޓް ކާޑު، ބޭނުންކޮށްފައިވާއިރު، އެ ފަރާތުން އެއްބަސްވެފައިވާގޮތަށް ފައިސާ ދައްކާފައި ނުވާތީ ބޭންކުން ހުށަހެޅި ދައުވާއެއް ކަމަށެވެ.

އެފަރާތުން އެއްބަސްވެފައިވާގޮތަށް ފައިސާ ދައްކާފައި ނުވާތީ މި މުއާމަލާތްތަކާ ގުޅިގެން ދައްކަން ޖެހޭ އެންމެހާ ފައިސާ އިންސްޓްރެސްޓާއި ޖޫރިމަނާއާއެކު އެކީ އެއްފަހަރާ އަކުރަމް ކަމާލުއްދީނުގެ އަތުން ހޯދުމަށް ބީއެމްއެލްގެ ފަރާތުން ކޯޓަށް ވަނީ ހުށަހަޅައިފައެވެ. އެހެންނަމަވެސް އޭގެ ފަހުން މި މައްސަލަ އިތުރަށް ކުރިއަށް ގެންދަން ބޭނުން ނުވާކަމަށްބުނެ، މި މައްސަލަ ބާތިލުކޮށްދިނުމަށް ބޭންކުން ވަނީ ކޯޓުގައި އެދިފައެވެ.

އެހެންނަމަވެސް ކޯޓުން ނިންމި ނިންމުމުގައި ދައުވާ ގެންދާ ސަބަބެއް ބުނެފައެއް ނުވެއެވެ.

ބޭންކުން ދައުވާ އަނބުރާ ގެންދަން އެދިފައިވާތީ ދައުވާ އަނބުރާ ގެންދިއުމުގެ ހުއްދަ ކޯޓުން ދޭން ނުޖެހޭ ސަބަބަބެއް ފާޅުވެ، ނެތުމުންނާއި މަދަނީ އިޖުރާއަތުގެ ގާނޫނުގެ ދަށުން ދައުވާ އަނބުރާ ގެންދަން ހުރަސްއަޅާ ސަބަބެއް ފެންނާން ނެތަތީ ދައުވާކުރާ ފަރާތުން އެދިފައިވާ ގޮތުގެމައްޗަށް މި މައްސަލައިގެ ދައުވާފޯމު ބާތިލުކުރިކަމަށް، ކޯޓުން މި މައްސަލަ ނިންމި ނިންމުމުގައި ބުނެފައިވެއެވެ.