ރަތަފަންދޫގެ ފެނާއި ނަރުދަމާ ގާއިމްކުރުމުގެ އަމަލީ މަސައްކަތް ފަށައިފި

ގދ ރަތަފަންދޫގައި ފެނާއި ނަރުދަމާގެ ހިދުމަތް ޤާއިމްކުރުމުގެ މަޝްރޫއުގެ އަމަލީ މަސައްކަތް މިއަދު ފަށައިފި އެވެ.

މިއަދު އެރަށުގައި ބޭއްވި ހަފްލާއެއްގައި މި މަޝްރޫއުގެ އަމަލީ މަސައްކަތް ރަސްމީކޮށް ފައްޓަވައިދެއްވީ ރަތަފަންދޫގެ ބައެއް މުވައްސަސާތަކުގެ އިސްވެރިންނެވެ. އެގޮތުން މިއަދު ވަނީ މ މަޝްރޫއުގެ ތެރެއިން ފުރަތަމަ ހޮޅި ވަޅުލާފައެވެ.

ސާފު ބޯފެނާއި ރައްކާތެރި ނަރުދަމާއެއް ރަތަފަންދޫގެ ރައްޔިތުންނަށް ލިބޭނެ ގޮތް ހަމަޖެހީ ފެނާއި ނަރުދަމާ ގާއިމް ކުރުމުގެ މަޝްރޫއުއަކީ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދުފުޅެކެވެ.

ގދ ރަތަފަންދޫގެ ފެނާއި ނަރުދަމާ ނިޒާމުގެ މަސައްކަތް ހަވާލުކޮށްފައިވަނީ ޑުޕްލެކްސް ޕްރައިވެޓް ލިމިޓެޑާއެކުގައި އެވެ. މި މަސައްކަތް އެކުންފުންޏާއި ހަވާލުކުރީ މިދިޔަ އަހަރުގެ ފެެބްރުއަރީ މަހުގެ ތެރޭގައި އެވެ.

މި މަސައްކަތަށް ޖުމްލަ 9,649,508 ރުފިޔާ ހަރަދު ކުރުމަށް ހަމަޖެހިފައިވެއެވެ.