ޕޮލިސް ކުލަބާއި ހޭންޑްބޯލް މޯލްޑިވްސް ގުޅިގެން ރެފްރީން ތަމްރީނުކޮށްފި

ޕޮލިސް ކުލަބާއި ހޭންޑްބޯލް މޯލްޑިވްސް ގުޅިގެން ހިންގި ރެފްރީން ތަމްރީނުކުރުމުގެ ކޯސް ނިންމުމުގެ ރަސްމިއްޔާތު ބާއްވައިފިއެވެ.

ރޭ ހުޅުމާލެ ފޭސް 1 ޕޮލިސް ސްޓޭޝަންގައި ބޭއްވި ރަސްމިއްޔާތު ޝަރަފްވެރިކޮށްދެއްވީ އެސިސްޓަންޓް ކޮމިޝަނަރ އޮފް ޕޮލިސް އިސްމާޢީލް ނަވީންއެވެ. މި ރަސްމިއްޔާތުގައި ޕޮލިސް ކުލަބުގެ ރައީސް ޗީފް ސްޕްރިންޓެންޑެންޓް އޮފް ޕޮލިސް މުޙައްމަދު ރަޝީދު އާއި ޕޮލިސް ކުލަބުގެ ނައިބު ރައީސް ޗީފް އިންސްޕެކްޓަރ އޮފް ޕޮލިސް މުޙައްމަދު ޝަރީފް އާއި ހޭންޑްބޯލް މޯލްޑިވްސްގެ ނައިބު ރައީސް އަޙްމަދު މުޖުތަބާ އާއި ޕޮލިސް ކުލަބުގެ ޖެނެރަލް ސެކްރެޓަރީ ސަބް އިންސްޕެކްޓަރ އޮފް ޕޮލިސް ޢަލީ އިބްރާހިމްގެ އިތުރުން ކޯހުގައި ކިޔަވައިދެއްވި މުދައްރިބުންނާއި ކޯހުގެ ބައިވެރިން ބައިވެރިވެލެއްވިއެވެ.

މިރަސްމިއްޔާތުގައި އެސިސްޓަންޓް ކޮމިޝަނަރ އޮފް ޕޮލިސް އިސްމާޢީލް ނަވީން ދެއްކެވި ވާހަކަފުޅުގައި ކޯހެއް ފުރިހަމަކުރަންވީ ސެޓްފިކެޓެއް ހާސިލްކުރުމަށް ނޫންކަން ފާހަގަކުރައްވައި، މިފަދަ ކޯހެއް ފުރިހަމަކުރުމަށްފަހު ލިބޭ ފުރުޞަތުތަކުގައި ބޭނުން ހިފުމަށާއި އިތުރަށް ކުރިއަށް ދިއުމަށް މަސައްކަތްކުރުމަށް ކޯހުގެ ބައިވެރިންގެ ކިބައިން އެދިލެއްވިއެވެ.

މިރަސްމިއްޔާތުގައި ކޯސް ފުރިހަމަކުރި ބައިވެރިންނަށް ސެޓްފިކެޓް ބައްސަވާ ދެއްވީ އެސިސްޓަންޓް ކޮމިޝަނަރ އޮފް ޕޮލިސް އިސްމާޢީލް ނަވީންއެވެ. މި ރަސްމިއްޔާތުގައި ކިޔަވައިދެއްވި މުދައްރިބުންގެ އަގުވަޒަންކުރުމުގެ ގޮތުންވެސް ހަނދާނީ ލިޔުން ދީފައިވެއެވެ. މި ލިޔުންތައް ބައްސަވާ ދެއްވީ ޕޮލިސް ކުލަބުގެ ޗީފް ސްޕްރިންޓެންޑެންޓް އޮފް ޕޮލިސް މުޙައްމަދު ރަޝީދުއެވެ.

ހޭންޑްބޯލް ރެފްރީސް ކޯހަކީ ދިވެހި ފުލުހުންގެ ޚިދުމަތުގައި މަސައްކަތްކުރާ މުވައްޒަފުންގެ ތެރެއިން ހޭންޑްބޯލް އިން ކުރިއަށްދާން ބޭނުންވާ މުވައްޒަފުންނަށް އެފުރުޞަތު ހޯދައިދިނުމުގެ ގޮތުންނާއި ކުޅިވަރުގެ ދާއިރާއިން މީހުން ބިނާކުރުމަށްޓަކައި ޕޮލިސް ކުލަބުން ކުރަމުންދާ މަސައްކަތުގެ ތެރެއިން ހިންގި ކޯހެކެވެ.

ސެޕްޓެމްބަރު 3 ން 10 އަށް ހިންގި މި ކޯހުގައި ފުލުހުންގެ އެކި ބަހާތަކުން 15 މުވައްޒަފުން ބައިވެރިވެފައިވެއެވެ. އަދި ކޯހުގެ ބައިވެރިވު މުވައްޒަފުންގެ ތެރެއިން 13 މުވައްޒަފުންވަނީ ކަނޑައަޅާފައިވާ މިންގަޑަށް ފާސްވެ، ސެޓްފިކެޓް ހާސިލްކޮށްފައެވެ. މި ކޯސް ކުރިއަށް ގެންގޮސްފައިވަނީ ތިޔަރީ އަދި ޕްރެކްޓިކްސް ސެޝަންތަކާއެކުއެވެ.