ކެނެޑާގައި 10 މީހެއްގެ ގަޔަށް ވަޅިޖަހައި މަރާލި ދެމީހުން ހޯދަނީ

ކެނެޑާގެ މެދުތެރޭ ސެސްކާޗޫވާން ޕްރޮވިންސްގައި ވަޅިން ހަމަލާދީ 10 މީހުން މަރާލައި އިތުރު 15 މީހުން ޒަޚަމްކޮށްލި މައްސަލައިގައި ތުހުމަތު ކުރެވޭ ދެމީހަކު ހޯދުމުގެ މަސައްކަތް ކެނެޑާގެ ފުލުހުން ފަށައިފިއެވެ.

މި ހާދިސާގައި އަނިޔާވި މީހުން ފެނިފައިވަނީ ޖޭމްސް ސްމިތް ކްރީ ނޭޝަނާއި ވެލްޑޮން ގެ އަވަށްޓެރި ވިލެޖެއްގެ 13 ތަނަކުންނެވެ.

މި ހަމަލާތައް ދިން ކަމުގެ ތުހުމަތު ކުރެވޭ، ޑޭމިއަން ސެންޑަރސަން އާއި މައިލްސް ސެންޑަރސަން ނަމަކަށް ކިޔާ ދެ މީހަކު ފިލައިގެން އުޅޭ އިރު، އެ ދެ މީހުންނަކީ ހަތިޔާރު އެޅި އަދި ނުރައްކާތެރި ދެ މީހުން ކަމަށް ކެނެޑާގެ ފުލުހުން ވަނީ ބުނެފައެވެ.

އެދެމީހުން ހޯދުމުގެ މަސައްކަތް މިހާރު ފުލުހުން ކުރަމުންދާއިރު، އެސަރަހައްދުތަކުގައި ދިރިއުޅޭ މީހުން ގޭތެރޭގައި ހިޔާވަހިކަން ހޯދުމަށް ފުލުހުން ވަނީ އަންގާފައެވެ.

https://gaafu.mv/75989

އެމީހުން ހޯދުމުގެ މަސައްކަތުގައި ޗެކްޕޮއިންޓްތައް ހަދައި، ދަތުރުކުރާ މީހުންގެ އައިޑެންޓިފިކޭޝަން ފުލުހުން ދަނީ ޗެކް ކުރަމުންނެވެ. އަދި މަގުމަތިން ދިމާވާ މީހުން ވެހިކަލްތަކަށް އެރުވުމުގައި ސަމާލުވުމަށްވެސް ފުލުހުން ވަނީ އެދިފައެވެ. މި ހަމަލާތަކާ ގުޅިގެން ކުއްލި ނުރައްކަލުގެ ހާލަތުވަނީ އިއުލާން ކޮށްފައެވެ.