ޕޫޓިންގެ ނިއުކްލިއަރ ކޮންޓްރޯލް ބްރިފްކޭސް ގެންގުޅޭ ކާނަލް ގަޔަށް ބަޑިޖަހައިފި

ރަޝިއާގެ ރައީސް، ލެޑިމިއަރ ޕޫޓިންގެ ނިއުކްލިއަރ ކޮންޓްރޯލް ބްރިފްކޭސް ގެންގުޅޭ ކާނަލް ގަޔަށް ބަޑިޖަހައި ޒަޚަމްކޮށްފައި އޮއްވައި ފެނިއްޖެއެވެ.

ޚަބަރުތައް ބުނާ ގޮތުގައި، ރިޓަޔަޑް ކާނަލް ވަޑީމް ޒިމީމް ގަޔަށް ބަޑިޖަހާފައިި އޮތްވާ ފެނިފައިވަނީ އޭނާ ދިރިއުޅޭ ގޭގެ ބަދިގެ ތެރެއިންނެވެ. އޭނާ އަކީ ޕޫޓިންގެ ސިއްރު އެޖެންޓެއް ކަމަށް ރިޕޯޓުތައް ބުނެއެވެ. އޭނާ އަކީ އެގައުމުގެ ފެޑެރަލް ސެކިއުރިޓީ ސާވިސްގެ އެޖެންޓެކެވެ.

މީގެ ކުރިން ނަގާފައިވާ އޭނާ ފެންނަ ބައެއް ފޮޓޯތަކުގައި، ބްރިފްކޭހެއް ގެންގުޅޭ މަންޒަރު ފެެނެއެވެ. ރިޕޯޓުތައް ބުނާ ގޮތުގައި އެ ބްރިފްކޭހަކީ ޕޫޓިންގެ އަރިހުގައި އަބަދުވެސް އޮންނަން ޖެހޭ، އެގައުމުގެ ހުރިހާ ނިއުކްލިއަރ ހަތިޔާރެއް ކޮންޓްރޯލް ކުރެވޭ ރިމޯޓެވެ. ޕޫޓިންގެ އަރިހުގައި މި ބްރިފްކޭސް އަބަދުވެސް ގެންގުޅެފައިވަނީ ވަޑީމް އެވެ.

އުމުރުން 53 އަހަރުގެ ވަޑީމްއަށް މިވަގުތު ފަރުވާ ދެމުން އަންނަނީ އައިސީޔޫގައެވެ. މިފަދަ ހަމަލާއެއް އޭނާއާ އަމާޒުވިއިރު، އޭނާގެ މައްޗަށް ތުހުމަތު ކުރެވޭ ރިޝްވަތު ނެގުމުގެ މައްސަލައެއްގެ ތަހުގީގު ދަނީ ކުރެވެމުންނެވެ. އެ ތަހުގީގަށް އޭނާ ހުރީ ގޭބަންދުކޮށްފައެވެ.

ރިޕޯޓުތައް ބުނާ ގޮތުގައި އޭނާ ގަޔަށް ބަޑިޖަހައި ޒަޚަމްކޮށްލާފައި އޮއްވައި ފެނިފައިވަނީ އޭނާގެ ބޭބެއަށެވެ. ބަޑި ޖެހި ވަގުތު އޭނާ ހުރީ ފާޚާނާގައެވެ. ފާޚާނައިން ނުކުތް އިރު ވަޑީމް އޮތީ ލެއިން ތަތްތެޅިފައެވެ. ބަޑި ޖެހި މީހުންގެ ހަމަލާ އަމާޒުކޮށްފައިވަނީ ވަޑީމްގެ ބޮލަށެވެ.