ތިނަދޫ ޑަބްލިއުޑީސީ ހިޔަލަ ހޭންޑްބޯލް މުބާރާތް - ފަހު މެޗުވެސް ވިންގްސްއިން ކާމިޔާބުކުރީ ފަސޭހަކަމާއި އެކު!

ގދ. ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީ (ތިނަދޫ ޑަބްލިއުޑީސީ) ހިޔަލަ ހޭންޑްބޯލް ޓޯނަމެންޓް 2022ގައި ލީގް ރައުންޑުގައި ކުޅުނު ފަހު މެޗުން ފިޓްފެމިނިންގެ މައްޗަށް ވިންގްސްއިން ކުރި ހޯދައިފި އެވެ.

ތިނަދޫ އާރު އަވަށު ފުޓްސަލް ދަނޑުގައި މިރޭ ކުޅުނު މިމެޗުގައި ވިންގްސްއިން ފިޓްފެމިނިން ބަލިކުރީ 6-0 ގެ ނަތީޖާއަކުންނެވެ.

ވިންގްސް މިރޭގެ މެޗަށް ނުކުތް އިރުވެސް އޮތީ ފައިނަލްގެ ޖާގައެއް ކަށަވަރުވެފައެވެ. އެއީ މުބާރާތުގައި ކުޅެން ޖެހޭ ތިން މެޗުގެ ތެރެއިން ދެ މެޗުން މޮޅުވެފައި އޮތުމުންނެވެ. މިރޭގެ މޮޅާއިއެކު ވިންގްސް ފައިނަލަށް ދަތުރުކުރީ ކުޅުނު ހުރިހާ މެޗަކުން މޮޅުވެގެންނެވެ.

މިރޭގެ މެޗު ޑޮމިނޭޓްކޮށްގެން ކުޅުނީ ވިންގްސްއިންނެވެ. ނަމަވެސް ފިޓް ފެމިނިންއިންވެސް ވަނީ ނަތީޖާ ނެރުމަށް މަސައްކަތްތަކެއް ކޮށްފައެވެ.

މިމެޗުގެ މޮޅު ކުޅުންތެރިއަކަށް ހޮވުނީ މެޗުގައި މޮޅު ކުޅުމެއް ދެއްކި އަދި މިހާރު ހޭންޑްބޯޅައިގައި ތިނަދޫގައި ނަންވިދަމުން އަންނަ ވިންގްސް ޓީމުގެ ޒުވާން ކުޅުންތެރިޔާ ، ފާތިމަތު ޝިބާހަތު އެވެ.

މި ނަތީޖާއާއިއެކު ފިޓް ފިމެނިން މުބާރާތް ނިންމާލަން ޖެހުނީ އެއްވެސް މެޗަކުން މޮޅުނުވެ އެވެ. މުބާރާތުގައި ކުޅުނު ތިން މެޗުގެ ތެރެއިން ދެމެޗުން ބަލިވެ އެއްމެޗު ފިޓް ފެމިނިންއަށް ވަނީ އެއްވަރުވެފައެވެ.

މުބާރާތުގެ ފައިނަލްގައި ކިންގްސް ވާދަކުރާނީ ކަނބާ އެވެ. ކަނބާ ފައިނަލްގެ ޖާގައަށް ކަށަވަރުކުރީ މިރޭ ޑީއާރްސީ ބަލިކުރުމަށްފަހު އެވެ.

މި މުބާރާތަކީ އެ ކޮމެޓީން އިސްނަގައިގެން ގދ. ތިނަދޫ ގައި ދިރިއުޅޭ އަންހެން ކަނބަލުންގެ އިޖްތިމާޢީރޫޙް އާލާ ކުރުމާއި ދުޅަހެޔޮ ސިއްޙަތަކަށް މަގުފަހިކުރުމުގެ މަޤްސަގުގައި ކުރިޔަށް ގެންދަން ނިންމާފައިވާ މުބާރާތެކެވެ. މި މުބާރާތުގައި ޖުމުލަ 4 ޓީމަކުން ވަނީ ބައިވެރިވެފައެވެ.

މި މުބާރާތުގެ ޕްލެޓިނަމް ޕާޓްނަރ އަކަށް ގދ. އަތޮޅު ކައުންސިލް ހަމަޖެހިފައިވާއިރު، އެސޯސިއޭޓް ޕާޓްނަރުންނަކީ ގދ. ތިނަދޫ ކައުންސިލާއި ތިނަދޫ ސްޓޭޑިއަމްގެ އިތުރުން ހަވަރު ސްޕޯޓްސް އެވެ. ޕްރިންޓިންގ ޕާޓްނަރ އަކަށް ނޯވާޓެކް ހަމަޖައްސާފައިވާއިރު، އޮފިޝަލް މީޑިއާ ޕާޓްނަރ އަކީ ގާފު އޮންލައިން އެވެ.

މި މުބާރާތުގެ ޗެމްޕިއަންޓީމަށް 12000 ރުފިޔާގެ ފައިސާގެ އިނާމެއް ހުށަހަޅާފައިވާއިރު ރަނަރަޕް ޓީމަށް 7000 ރުފިޔާގެ ފައިސާގެ އިނާމެއް ވަނީ ހުށަަހަޅާފައެވެ.