ގދ، ތިނަދޫ ޑަބްލިއުޑީސީ ހިޔަލަ ހޭންޑްބޯލް މުބާރާތް ފަށައިފި

ގދ. ތިނަދޫ އަންހެނުންގެ ތަރައްގީއަށް މަސައްކަތްކުރާ ކޮމިޓީ (ގދ. ތިނަދޫ ޑަބްލިއުޑީސީ) އިން އިންތިޒާމުކޮށްގެން ބާއްވާ "ހިޔަލަ ހޭންޑްބޯލް ޓޯނަމެންޓް 2022" ފަށައިފިއެވެ.

މި މުބާރާތަކީ އެ ކޮމެޓީން އިސްނަގައިގެން ގދ. ތިނަދޫ ގައި ދިރިއުޅޭ އަންހެން ކަނބަލުންގެ އިޖްތިމާޢީރޫޙް އާލާ ކުރުމާއި ދުޅަހެޔޮ ސިއްޙަތަކަށް މަގުފަހިކުރުމުގެ މަޤްސަގުގައި ކުރިޔަށް ގެންދަން ނިންމާފައިވާ މުބާރާތެކެވެ. މި މުބާރާތުގައި ޖުމްލަ 4 ޓީމަކުން ބައިވެރިވެފައިވާއިރު މި މުބާރާތުގެ ހުރިހާ މެޗެއްވެސް ކުޅުމަށް ހަމަޖެހިފައިވަނީ ތިނަދޫ އާރު އަވަށު ފުޓްސަލް ދަނޑުގައެވެ.

ހަތަރު ދުވަހުގެ މުއްދަތަކަށް ކުރިއަށް ދާ މި މުބާރާތުގައި ކޮންމެ ރެއަކު ދެ މެޗު ކުޅޭނެ އެވެ. މުބާރާތް ފެށިގެން ދިޔައީ ޑީއާރުސީ ޓީމާއި ފިޓް ފެމިނިން ބައަދަލުކުރާ މެޗުންނެވެ. މިރޭ ކުޅޭ ދެވަނަ މެޗުގައި ބައްދަލުކުރާނީ ވިންގްސް ޓީމާއި ކަނބާ ޓީމެވެ.

މި މުބާރާތް ފެށުމުގެ ރަސްމިއްޔާރު ޝަރަފްވެރިކޮށްދެއްވީ ޖެންޑަރ މިނިސްޓްރީގެ ސްޓޭޓް މިނިސްޓަރ، ޒިފްލީނާ ޙަސަން އެވެ. ޒިފްލީނާގެ އިތުރުން މި ރަސްމިއްޔާތުގައި ގދ.ތިނަދޫ ކައުންސިލްގެ ރައީސް ސައުދު އަލީއާއި، ތިނަދޫ އުތުރު ދާއިރާގެ މެމްބަރު އަބްދުލް މުޣްނީވެސް ބައިވެރިވެވަޑައިގެންނެވި އެވެ.

މި މުބާރާތުގެ ޕްލެޓިނަމް ޕާޓްނަރ އަކަށް ގދ. އަތޮޅު ކައުންސިލް ހަމަޖެހިފައިވާއިރު، އެސޯސިއޭޓް ޕާޓްނަރުންނަކީ ގދ. ތިނަދޫ ކައުންސިލާއި ތިނަދޫ ސްޓޭޑިއަމްގެ އިތުރުން ހަވަރު ސްޕޯޓްސް އެވެ. ޕްރިންޓިންގ ޕާޓްނަރ އަކަށް ނޯވާޓެކް ހަމަޖައްސާފައިވާއިރު، އޮފިޝަލް މީޑިއާ ޕާޓްނަރ އަކީ ގާފު އޮންލައިން އެވެ.

މި މުބާރާތުގެ ޗެމްޕިއަންޓީމަށް 12000 ރުފިޔާގެ ފައިސާގެ އިނާމެއް ހުށަހަޅާފައިވާއިރު ރަނަރަޕް ޓީމަށް 7000 ރުފިޔާގެ ފައިސާގެ އިނާމެއް ވަނީ ހުށަަހަޅާފައެވެ.