og gaafu kuru vaahaka hithi maazee
އެޑިޓަރުގެ ނޯޓު: މި ވާހަކަ އަކީ ގާފު ކުރުވާހަކަ މުބާރާތަށް މަރިޔަމް ދީމާ ހުށައަޅާފައިވާ ވާހަކަ އެކެވެ. މިވާހަކަ ގާފު އޮންލައިންގައި ޝާއިއުކޮށްފައި މިވަނީ ވާހަކައަށް މާކްސް ދިނުމަށްފަހު، މި މުބާރާތުގެ ޤަވާއިދުގައިވާ ގޮތުގެ މަތިން ވާހަކަ އަށް ލިބޭ ވިއުސް އަށްވެސް މާކްސް ދިނުމަށް ހަމަޖެހިފައިވާތީ ކިއުންތެރިންގެ ޚިޔާލު ހޯދުމަށެވެ. ވާހަކައަށް މާކްސް ދިނުމުގައި ބަލާނީ ވާހަކަ ޝާއިއުކުރާ ތާރީޚުން ފެށިގެން 10 ދުވަހުގެ މުއްދަތުގައި އެ ވާހަކައަކަށް ލިބޭ ވިއުސްގެ މައްޗަށެވެ.
ދަންވަރު 4:00 ޖަހާފިއެވެ. ހީނާ އިނީ ކޮޓަރީ ކުޑަދޮރު ކައިރީ އިން ގޮނޑިއެއްގައި އިށީނދެލައިގެން ކުޑަދޮރު ކައިރީގައި ބޯ އަޅައިލައިގެންނެވެ. ރަށު ތެރޭގެ އެންމެން ހަމަ ނިންޖަކުން ނިދާފައި ތިބި ވަގުތެވެ. ދޫނިސޫފާ ސޫފިތަކުގެ ހިލަމެއްވެސް ނުވެއެވެ. ހީވާ ގޮތުން އެއެއްޗެހިތަށްވެސް ހާއްޔަށް ވަދެ ނިދީއެވެ. ނަމަވެސް ހީނާ އިނީ ލޮލަށް ނިދި ނައިސްފައެވެ. ނިދިވަނީ ހީނާގެ ލޮލާ ރުޅިއައިސްފައެވެ. ހީނާގެ ސިކުނޑީގައި އެނބުރެމުންދިޔައީ އޭނާގެ ހިތި މާޒީގެ ދުވަސްތަކެވެ.
ހީނާ އަކީ ކުޑައިރު ވަރަށް ދޮންކޮށް، ރީތިކޮށް ހުންނަ މަޖާ މިޒާޖެއްގެ ކުއްޖެކެވެ. ރަށުގެ ފަޤީރުންގެ ލިސްޓުގެ އެންމެ މަތީގައި އޭނާގެ އާއިލާ ހިމެނެއެވެ. ހީނާގެ މަންމަ އާއި ބައްޕަގެ ހުންނަނީ ހީނާ އެކަންޏެވެ. ގޭގެ ހުރިހާ ކަމެއް ފުއްދަންޖެހެނީ ބައްޕަ މަހަށްގޮސްގެން ލިބޭ އާމްދަނީންނެވެ. މަންމަ އަކީ އެހާ ބަލި މީހެކެވެ. މަންމަގެ ބަލި ހާލަތު ހުންނަ ގޮތުން ގޭގެ ހުރިހާ ކަމެއް ގޮތަށް ކުރަންޖެހެނީ ހީނާ އެވެ. ބައްޕައަށް ލިބޭ އާމްދަނީ މަދުކަމުން އޭނާގެ ޅަފުރާ ދިޔައީ ތަޢުލީމު ރަގަނޅަށް އުނގެނުމުގެ ފުރުސަތު ނުލިބިއެވެ. ހީނާގެ އާއިލާ ފަޤީރު ކަމުން ބަހެއް ކިޔާލާނެ މީހެއް، އެއްޗެއް ދިއްކޮށްލާނެ މީހެއް ރަށަކު ނުހުރެއެވެ. ކުރާހާވެސް ކަމަކީ އާއިލާއަށް މަލާކުރުމެވެ.
އެއްދުވަހެކެވެ. އިރުއޮއްސޭ މަންޒަރު ބަލާލަން ތުނޑިއަށް ހީނާ ދިޔަ ދުވަހެކެވެ. އޭނާ އިނީ އެތާ އިން ވިނަގަނޑު މަތީ މީހަކަށް ނުފެންނާނެ ގޮތަކަށްނިވާވެގެންނެވެ. އެހެން އިންދާ އޭނާ ސިއްސާގެން ދިޔައީ މީހަކު އޭނާގެ ނަމުން އޭނާއަށް ގޮވާލުމުންނެވެ. އެއީ ފިރިހެނެކެވެ. ފިރިހެންވަންތަ އަޑެކެވެ. މިހާ ދުވަސް ވީއިރުވެސް އަހަރެންގެ މަންމަ އާއި ބައްޕަ ފިޔަވާ އިތުރު މީހަކު އެހާ ލޯބިން ގޮވާނުލައެވެ. ހީނާ މަޑުމަޑުން ތެދުވެ ފުރަގަސް ބަލާލިއެވެ. ކުރިމަތީގައި ހުރީ ނުދަންނަ މީހެކެވެ. ހީވާ ގޮތުން ހީނާ އާއި އެއް ޢުމުރެކެވެ. ދެލޯ ބޮޑެވެ. ފަން އިސްތަށިގަނޑު އޮތީ ތުނިކޮށް ކޮށާލެވިފައެވެ. ހަށިގަނޑުން ބިޔަ މީހެކެވެ. ހީނާއަށް ހުރެވުނީ އާޝޯޙުވެ އޭނާ އާއި ދިމާލަށް ބަލަހައްޓައިގެންނެވެ. އެމީހަކު އިސްނަގައިގެން ވާހަކަ ދައްކަން ފެއްޓިއެވެ.
" ތިހާވަރަށް އަހަންނާ ދިމާލަށް ނުބަލާ! ވަރަށް ހައިރާންވެއްޖެދޯ އަހަރެން ގޮވާލީމަ. އަހަރެންނާ ބެހޭ އެއްވެސް ވާހަކައެއް ނާހާނަންތަ؟
ހީނާ: ތީ ކާކު؟ އަހަރެންގެ ނަން އިނގުނީ ކިހިނެއް؟ އަހަރެންނާ ވާހަކަ ދެއްކުމުގެ ބޭނުމަކީ ކޮބާ؟
ޒިޔާން: "އަހަރެންގެ ނަމަކީ ޒިޔާން. އަހަރެންނަކީ މިރަށަށް އުފަން، މިރަށު މީހެއް. އެކަމަކު އަހަރެން އުޅެ ބޮޑުވީ މާލޭގަ. އަހަރެންނަށް ހީނާގެ ނަން އިނގުނީ އަހަރެން މި ރަށު މީހެއްގެ ކައިރިން އެހީމަ.
ހީނާ: ކީއްކުރަން އަހަރެންގެ ނަން މީހުންގެ ކައިރިން އަހަންވީ؟ އަހަރެންގެ ނަން ހޯދައިގެން އަހަރެންނާ ވާހަކަ ދެއްކުމުގެ ބޭނުމަކީ ކޮބާ؟
ޒިޔާން: " އަހަރެން މިރަށަށް އައީ ޗުއްޓީ ހޭދަކޮށްލުމަށް. އަހަރެން އެންމެ ފުރަތަމަ މިރަށަށް އައި ދުވަހުން ފަށައިގެން އަހަރެންނަށް ވަރަށް ކަމުދިޔަ ކުއްޖެއްތީ. ޒިޔާން ވަރަށް ތިކުއްޖާ އުޅޭ ނޫޅޭގޮތްވެސް ބަލަން. ޒިޔާން އަށް ވަރަށް ކަމުދާ ސިފަތަކެއް ހުންނަ ކުއްޖެއް ހީނާ ތީ.
ހީނާ: އަހަރެންނަކީ ކާކުކަން ނޭނގޭތީ ތިހެން ތިބުނީ. އަޑުއަހާ. އަހަރެންނަކީ މިރަށުގެ އެންމެ ފަގީރު އާއިލާތަކުގެ ތެރެއިން އާއިލާއަށް އުފަން ކުއްޖެއް. އަހަރެން ފެނިލިޔަސް އަހަރެންނަށް ގޮވާލާނެ މީހެއް، ރަޙްމަތްތެރިއެއް ނުހުރޭ. ޅަފަތުގައި ރަގަނޅަށް ތައުލީމު ނުލިބި ހުރި މީހެއް އަހަރެންނަކީ މީ.
ޒިޔާން: " އަހަރެން ދެކޭ ގޮތުގަ ލޯބިވާންޖެހެނީކީ ހަމަ އެކަނި މުއްސަދިން ދެކެ އެކައްޏެއް ނޫން. އެއީ ފަގިރުންނަށްވެސް އޮންނަން ޖެހޭ ހައްގެއް. އަހަރެން ތި ކުއްޖާދެކެ ލޯބިވީކީ ރީތި ވީމަކާ ނޫން. ތިއީ ބޮޑެތި މީހުންނަށް އިހްތިރާމްކުރާ، ހީވާގި، މަސައްކަތްތެރި، ރަގަނޅު އަޙްލާގުވެރި ކުއްޖަކަށްވާތިއެވެ.
ހީނާ: އުފާކުރަން ތިގޮތަށް ވިސްނޭ މަދު މީހަކު ނަމަވެސް ދުނިޔޭގަ އުޅޭތީ
އެދުވަހަށްފަހު ޒިޔާން އާއި ހީނާގެ ރަހްމަތްތެރިކަން ދިޔައީ ބަދަހިވަމުންނެވެ. އެހެން އެތައް އިރެއް ވަންދެން ފޫހިކަމެއްނެތި ވާހަކަ ދައްކަން ތިބެއެވެ. ބައެއް ދުވަސް ދުވަހު ޒިޔާން ހީނާގެ ގެއަށްގޮސް ހީނާގެ މަންމަ އާއި ބައްޕައާ ވާހަކަ ދައްކާލަން އިދެއެވެ. މާގިނަ ދުވަހެއް ނުވަނީސް، އެ ރަޙްމަތްތެރިކަން ލޯތްބަށް ބަދަލުވެގެން ދިޔައެވެ. ހީނާއަށް ހީވީ އަހަރެންގެ ހަޔާތް އުޖާލާވީހެންނެވެ. ނަމަވެސް އެ އުޖާލާކަން ދިރިއުޅުމުގައި ދެމި އޮތީ މަދު ދުވަސްކޮޅަކަށެވެ.
ވާހަކަދައްކަން ފެށުނުތާ އަހަރެއް ނުވަނީސް ޒިޔާން ބޭނުންވީ ހީނާ އާއި ވީހާވެސް އަވަހަށް ކައިވެނި ކުރުމަށެވެ. މަންމަ އާއި ބައްޕަ އަދި ޒިޔާންގެވެސް ޢާއިލާގެ ރުހުމުގައި ހީނާ އާއި ޒިޔާންގެ ކައިވެނި ކޮށްފިއެވެ. ކައިވެނިކޮށްގެން ހީނާ ބަދަލުވާން ޖެހުނީ ޒިޔާންގެ އާއިލާ ކައިރިޔަށް މާލެއަށެވެ. ޒިޔާންގެ މައިންބަފައިންވެސް ހީނާއަށް ވަރަށް އޯގާތެރިއެވެ. އެންމެންވެސް ހީނާ ދެކެ އެހާ ލޯބިވެއެވެ. މާލެ އައުމަށްފަހު ޒިޔާން ވަޒީފާއަށް ނިކުންނަން ފަށާފިއެވެ. ޒިޔާން ވަޒީފާ އަދާކުރަމުން ދިޔައީ މާލޭ ބިސްނަސް އޮފީހެއްގެ މަތީމަގާމެއްގަ އެވެ. ފުރަތަމަ ދުވަސްކޮޅު ހީނާ އާއި، ޢާއިލާއަށްވެސް ވަގުތު ދިނެވެ. ރޭގަނޑު ހީނާ ގޮވާގެން ބޭރަށްވެސް ދެއެވެ. ހީނާ އާއިއެކު އެކި ތަންތަނަށް ދަތުރު ކުރުމަށް ބައެއް ދުވަސްތަށް އޮފް ކޮށްލައެވެ. ނަމަވެސް ފަހުން ކަންތައްތަށް ބަދަލުވާން ފެށިއެވެ. ރޭގަނޑު ގެއަށް އަންނަނީ 12 ޖަހާބޮޑުވާ ފަހުންނެވެ. ދުވާލުދާ ހަތަރުދަމު ބިޒީއޭ ކިޔާ ގެއަށް ކާންވެސް ދުރުނުވެއެވެ. ގެއަށް އައިސްވެސް ހީނާ އާއި ވާހަކައެއް ނުދައްކައެވެ. ތަކުރާރުކޮށް މިކަންތައް މިހެން ވާން ފެށުމުން ހީނާ ޒިޔާންއާއި ވާހަކަ ދެއްކިއެވެ. ޒިޔާންގެ މަންމަ އަށްވެސް މިކަންތައް ފާހަގަވެގެން ހީނާ ކައިރީގައި އެވާހަކަ ދެއްކިއެވެ. ޒިޔާން ބުނިހާވެސް އެއްޗަކަށް ބުނީ " އަހަރެން އުޅެން ބޭނުންވާގޮތަކަށް އުޅެން އަހަރެން ދޫކޮށްނުލިއްޔާ ވަރިވެގެން އަމިއްލަ ރަށަށް ދާށެވެ." އެ ޖުމްލަ ހީވީ ހީނާގެ ކަންފަތުގައި ހޮނުގުގުރި ޖެހިހެންނެވެ.
ދުވަހެއްގައިވެސް ހީނާއާއި އެގޮތަށް ޒިޔާން ވާހަކަ ނުދައްކައެވެ. ހީނާއަށް އިތުރަށް ޒިޔާން އާއި އަގަބަހުން ވާހަކަ ދައްކާލާނެހާ ހިތްވަރެއް ނުލިބުނެވެ. އޭނާވީ ދެރައިން ޒިޔާންއަށް ސިޓީއެއް ލިޔުނެވެ. ސިޓީގައި ހީނާ ބަޔާންކުރީ އޭނާ ޒިޔާން އާއި ކައިވެނިކުރީ ލޯބިންކަމާއި، އަތްބެއްގެ ހައިސިއްޔަތުން އަދާކުރަންޖެހޭ އެއްވެސް ހައްގެއް އުނިކޮށްފަ ނުހުނާނޭ ކަމާއި، އޭނާއަށް ކުށެއް ކުރެވިފަ އޮތްނަމަ އެއީ ކޮން ކުށެއްކަން އޭނާ ކައިރީ ބުނުމަށް ހީނާ އެދުނެވެ. އަދި ޒިޔާންގެ އުޅުމަށް ތިހާ ބަދަލުއައި ސަބަބު އޭނާ އެނގެން ބޭނުންވާ ކަމަށްވެސް ސިޓީގައި ބަޔާންކުރިއެވެ. ހީނާ އެރޭ ނިދީ ސިޓީ ލިޔުމަށްފަހު ޒިޔާންގެ ބާލީސް މަތީގައި ބޭއްވުމަށްފަހުގަ އެވެ. އޭނާ ހެދުނު ހޭލިއިރު ސިޓީގެ ޖަވާބު ލިޔެފައި މޭޒުމަތީގައި އޮތެވެ. ހީނާ ސިޓީކިޔާފައި ހުރިތަނަށް ގަނޑުވިއެވެ. ކުރަންވީ ކީއްކަމެއް، ހަދަންވީ ކިހިނެއް ކަމެއް އޭނާއަށް ނޭނގުނު ކަހަލައެވެ. ޒިޔާން ސިޓީގައި ލިޔެފައި އިނީ އޭނާގެ އެއްވެސް ކުށެށްނެތް ކަމާއި، ކުށް އޮތީ ޒިޔާންގެ ކަމާއި، އޭނާ ކުރީއްސުރެން ލޯބިވީ އެހެން ކުއްޖެއް ދެކެކަމަށެވެ. އެ ކުއްޖާއާ ޖެހުނު މައްސަލައެއްގާ ރަށަށް ގޮސް ހުއްޓާ ހީނާ ފެނުނީމާ ހީނާ ގުޅުނީ ހީނާ އަށް އެހީތެރިވެދޭން ބޭނުންވާތީކަމަށެވެ.
ހީނާ އަކީ އެކަނިވެރިއަކަށްވާތީ ހީނާއަށް އަޅާލަންބޭނުންވާތީ ކަމަށެވެ. ކައިވެނިކުރުމަށްފަހު ލޯބިވާ ކުއްޖާއާ ދުރަށް ދެވޭނެ ކަމަށް ހީކޮށްފައެވެ. ނަމަވެސް އޭނާއަށް އެކަމެއް ނުވިކަމަށެވެ. އަހަރެންނަށް ވަގުތު ނުދެވޭތީ އާއި، ޒިޔާންގެ ފަރާތުން އިތުރަށް ހީނާއަށް އަނިޔާ ދޭން ބޭނުން ނުވާތީ މިސިޓީ ހީނާ ކިޔާ ހިސާބުން ފެށިގެން ހީނާ އަކީ އޭނާގެ އަތްބެއް ނޫންކަމަށެވެ." ހީނާގެ އެ ނިކަމެތި ހިތަށް ކެތްނުކުރެވުނެވެ. އިތުރަށް ޒިޔާން ފެންނަ ހިސާބުގައި ހުންނަން އޭނާ ބޭނުން ނުވިއެވެ. އަވަހަށް އަންނައުނުތަށް ފޮށްޓަށްލާ އަވަހަށް ހީނާ ތައްޔާރުވީ ޒިޔާން ގެއަށް އައުމުގެ ކުރިން ގެއިން ނިކުންނާށެވެ. އިތުރަށް ޒިޔާންގެ ކުރި މައްޗަށް އަރަން ބޭނުންނުވާތީ އެވެ. އަވަހަށް ގެއިން ނުކުތުމަށްފަހު ޖެޑީއާއި ދިމާލަށް މިސްރާބު ޖެހިއެވެ. ހީނާގެ ނަސީބު ވަރަށް ގަދައެވެ.
ރަށަށް އެދުވަހު ފުރާ އޮޑިއެއް އޮތެވެ. ހީނާ އަވަހަށް ރަށަށް ފުރަން އެ އޮޑި ހަމަޖެއްސެއްސިއެވެ. އަވަހަށް ރަށަށްދާ އޮޑީގައި ހީނާ ރަށަށް ދާން ފުރިއެވެ. ރަށަށް ފޭބުމަށްފަހު ފޮށިހިފާގެން އެންމެ ފުރަތަމަވެސް ދިޔައީ މަންމަ އާއި ބައްޕަގެ މޫނު ފެނޭތޯއެވެ. މަންމަގެ އުނގުގާއޮވެ ހިތްފުރޭ ވަރަށް ރޯލާށެވެ. ހީނާ ގެއަށް ދިޔައިރު ބައްޕަ ބޭރުގައި ހުރި އަށީގައި ފުން ވިސްނުމެއްގެ ތެރެއަށް ގެއްލިފައި އޮށޯވެލައިގެން އޮތެވެ. އަހަ ދަރިފުޅާ އައީތަ ރަށަށް! ކޮބާ ޒިޔާން؟ ހީނާ ހުރީ ބައްޕަކުރި ސުވާލަށް ޖަވާބު ދޭނެ ގޮތެއް ނޭނގިފައެވެ. ހީނާ އަށް އިސްޖަހައިލެވުނެވެ. ދަރިފުޅާ ކިހިނެއްވީ؟ ބައްޕާ އަހަރެންނަކީ މިހާރު ޒިޔާންގެ އަތްބެއްނޫން. ހީނާ މަޑު ރާގައެއްގައި އޭނާ ބައްޕަ ކައިރީ ކިޔައިދިނެވެ. މިގަޑީގައި ހުރިހާ ވާހަކައެއް ކިޔާ ނުދެވޭނެ. މޫސާފުޅުގެ ދެލޯ ބޮޑުވިއެވެ. ދެން އެ ވާހަކަ ބާއްވާދޯ! ކޯބާ މަންމަ؟ ނުވެސް ފެނޭ ގައިމު. ހީނާއަށް ފެނުނީ މިވީހާތަނަށް އޭނާއަށް ފެނުނު މަންޒަރެއް ނޫނެވެ. ބައްޕަގެ ލޮލުން ކަރުނަ އޮހޮރިގެންދާ މަންޒަރެވެ. ދަރިފުޅާ މަންމަގެ ހާލު ބޮޑުވެ މަންމަ މި ދުނިޔެއާ އަލްވަދާޢު ކިޔާފި. މޫސާފުޅު ގިސްލެވޭ ހާލުު ހީނާ ކައިރީ ބުންޏެވެ. ބައްޕާ ކީއްވެ އަހަރެންނަށް ނޭނގީ؟ ގިސްލެވޭ ހާލުގައި ހީނާ ބައްޕަ ކައިޜި އެހިއެވެ. ދަރިފުޅާ ބައްޕަ އަށް މާފުކުރޭ. ދަރިފުޅަށް އިނގޭނެ ބައްޕަ އަކީ ފޯނެއް ގެންގުޅޭ މީހެއް ނޫންކަން. މިރަށު މީހެއްގެ ކައިރިން ދޭން ބުންޏަސް ނުދޭނެކަން ދަރިފުޅަށް އިނގޭނެ. ހީނާގެ ހިތަށް ހީވީ ތޫނު ތީރެއް ހެރުނުހެންނެވެ. ހީނާ ދުއްވާފާގޮސް ކޮޓަރިއަށް ވަނެވެ. މީ ކީއްވެ ވާގޮތެއް؟ އަހަރެންގެ ހަޔާތުގެ މިސާލަކީ ހަމަ ކަޅުފޮއި އަނދިރި ރެއްގެ މިސާލުތަ؟ ހުރިހާ ކަމެއް އެއްފަހަރާ ކުރިމަތި ވާންވީ ކީއްވެ؟އަހަރެންނަށް މިހެން ވާންވީ އަހަރެންނަކީ ފަގީރަކަށްވީމަތަ؟ ހަމަ އަހަރެންނަށް މީހަކު ދެކެ ލޯބިވުމުގެ ހައްގެއް ނެތީތަ؟ ހީނާގެ ހިތަށް ވެރިވަމުން ދިޔަ ސުވާލުތަށް އަމިއްލަ ނަފްސާ ކުރަމުން ދިޔައެވެ.
ހީނާއަށް ހިތި މާޒީގެ ހިޔާލުތަކުގެ ތެރެއިން ނިކުމެވުނީ ފެންޑާއެއްގެ ތެރެއިން ބުޅަލެއް ކޯޅިގަތް އަޑަށެވެ. ކަރުނަތަށް ފޮހެލުމަށްފަހު ހީނާއަށް ބަލާލެވުނީ ފުންނިންޖަކުން ނިދިފައި އޮތް އޭނާގެ ލޯބިވާ ބައްޕަގެ މޫނަށެވެ. މިހާރު ހީނާ އަކީ ރަށުގެ އޮފީހެއްގެ މަސައްކަތު މީހެކެވެ. އެތަނުން ލިބޭ އާމްދަނީއިން ހީނާ އާއި ބައްޕަގެ ހަރަދުތަށް ބެލެހެއްޓެއެވެ. މަންމަ ނެތަސް ހީނާ މިހާރު ހުރި ހަމަ އެކަނި މީހަކީ ބައްޕައެވެ. ހީނާ ހީނާގެ ދިރިއުޅުމަށް ޝުކުރުވެރި ވެއެވެ
ފަހުގެ
