ދައުލަތުން ހައިކޯޓުގައި އިސްތިއުނާފުކުރި މަހްލޫފުގެ މައްސަލައިގެ އަޑުއެހުމެއް މާދަމާ

ޔޫތު މިނިސްޓަރު އަހްމަދު މަހްލޫފްގެ މައްޗަށް އުުފުލާފައިވާ ރިޝްވަތުގެ ކުށުގެ ދައުވާ ކްރުމިނަލް ކޯޓުން ބޭރުކޮށްލުމުން ހައި ކޯޓުގައި ދައުލަތުން އިސްތިއުނާފް ކޮށްފައިވާ މައްސަލައިގެ އަޑުއެހުމެއް މާދަމާ ބާއްވަން ތާވަލުކޮށްފިއެވެ.

މަހްލޫފްގެ މައްޗަށް މި ދައުވާ އުފުލާފައި ވަނީ، އޭނާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރަކަށް ހުންނެވިއިރު ސްޕެޝަލް އިކޮނޮމިކް ޒޯން (އެސްއީޒެޑް) ގެ ބިލަށް ވޯޓު ދިނުމުގެ މުގާބިލުގައި ކުރީގެ ނައިބު ރައީސް އަހްމަދު އަދީބު އަތުން 33،000 ޑޮލަރު ނެންގެވި ކަމަށް ބުނާ މައްސަލާގައެވެ.

އެ މައްސަލަ ކްރިމިނަލް ކޯޓުން ބޭރުކޮށްލުމުން ހައި ކޯޓުގައި އިސްތިއުނާފް ކުރުމުން އެ ކޯޓުން އެ މައްސަލަ ބަލައިގަތީ މިމަހުގެ 10 ވަނަ ދުވަހު އެވެ. ހައި ކޯޓުގައި ބާއްވާ އެ މައްސަލައިގެ ފުރަތަމަ އަޑު އެހުން ތާވަލް ކޮށްފައިވަނީ މާދަމާ މެންދުރު 14:00 އަށެވެ.

އެމްއެމްޕީއާރުސީގެ ބޮޑު ޚިޔާނާތުގެ ފައިސާ ލިބުނު ކަމަށް ބެލެވޭ 283 މީހުންގެ ލިސްޓެއް ތަހުގީގީ އިދާރާތަކުން އެކުލަވާލާފައިވާއިރު، އެ ލިސްޓުގައި މަހްލޫފްގެ ނަން ވެސް އޮތެވެ. އޭގައިވާ ގޮތުން ވެސް މަހްލޫފަށް އެސްއޯއެފް މެދުވެރިކޮށް 33،000 ޑޮލަރު ވަނީ ލިބިފައެވެ.

ދައުލަތުން ކުރާ ދައުވާގައިވާ ގޮތުން، ޚިޔާނާތުގެ މޭސްތެރިޔަކަށް ހުންނެވި ކުރީގެ ނައިބު ރައީސް އަދީބު ދައުލަތަށް ދީފައިވާ ބަޔާނުގައި މަހްލޫފަށް ރިޝްވަތު ދިން ކަމަށް އަދީބު ވިދާޅުވެފައިވެއެވެ. އަދި ފައިސާއާއި ޗެކެއް އައްލާމް ލަތީފް މެދުވެރިކޮށް މަހްލޫފަށް ދީފައިވާ ކަމަށް އޭނާ ވިދާޅުވެފައިވާ ކަމުގައެވެ.

ނަމަވެސް މަހްލޫފަށް ކުރާ ދައުވާ ކްރިމިނަލް ކޯޓުން ބޭރުކޮށްލީ އަދީބުގެ ވާހަކަތަކަށް ބާރު ލިބޭނެ ހެކި ގަރީނާ މަދުވުމުން ކަމަށް އެ ކޯޓުގައި އެ މައްސަލައާއި ހަވާލުވެ ހުންނެވި ގާޒީ މުހައްމަދު މިސްބާހް ވިދާޅުވެފައިވެއެވެ.

ގާޒީ މިސްބާހު ފާހަގަ ކުރެއްވި ކަމަކީ، ފައިސާ ދިނީ އައްލާމް ލަތީފް ކަމަށް އަދީބު ވިދާޅުވިޔަސް އެ ފައިސާ ދައުރު ކުރި ގޮތަކާއި، އެ މުއާމަލާތް ހިންގި ގޮތުގެ އެއްވެސް ތަފްސީލެއް އަދީބުގެ ބަޔާނުގައި ނެތް ކަމުގައެވެ.