ތަބޫގެ 'ޕާސަނަލިޓީ ރައިޓްސް' ހިމާޔަތްކުރުމަށް ދިއްލީ ހައިކޯޓުން ބޮޑު އަމުރެއް ނެރެފި

ބޮލީވުޑްގެ މަޝްހޫރު ބަތަލާ ތަބޫގެ ނަމާއި، ފޮޓޯ، އަދި އަޑު ފަދަ ޒާތީ ސިފަތައް ހުއްދަނެތި ބޭނުންކުރުން ހުއްޓުވުމަށް، ދިއްލީ ހައިކޯޓުން ވަގުތީ އަމުރެއް ނެރެފިއެވެ.

ޚާއްޞަކޮށް އާޓިފިޝަލް އިންޓެލިޖެންސް (އޭއައި)، ޑީޕްފޭކް އަދި ފޭސް މޯފިންގ ބޭނުންކޮށްގެން އުފައްދާފައިވާ ތަކެތި ހިމެނޭހެން 150 އަށްވުރެ ގިނަ ޔޫއާރްއެލް އިންޓަނެޓުން ނެގުމަށް ކޯޓުން ވަނީ އަމުރުކޮށްފައެވެ.

މި މައްސަލަ ބެއްލެވި ފަނޑިޔާރު ޖިޔޯތީ ސިންގް ވަނީ، ގޫގުލް، މެޓާ، އެކްސް އަދި ރެޑިޓް ފަދަ ބޮޑެތި ޑިޖިޓަލް ޕްލެޓްފޯމްތަކަށް 36 ގަޑިއިރުގެ ތެރޭގައި މި ޔޫއާރްއެލްތައް ނެގުމަށް ނުވަތަ ބްލޮކްކުރުމަށް އަންގާފައެވެ.

ތަބޫ ކޯޓަށް މައްސަލަ ހުށަހެޅީ އޭނާގެ ހުއްދަނެތި ވިޔަފާރީގެ ބޭނުމަށް އޭނާގެ ނަން ބޭނުންކޮށްގެން ފޭކް އިވެންޓްތައް ހެދުމާއި، މުދާ ވިއްކުމާއި، އަދި އޭއައި ބޭނުންކޮށްގެން ބޭއަދަބީ މަންޒަރުތައް ހަދައިގެން ފަތުރަމުންދާކަމަށް ބުނެއެވެ.

ކޯޓުން ފާހަގަކުރި ގޮތުގައި، މީހެއްގެ ހުއްދަނެތި އެފަދަ ގޮތަކަށް ވިޔަފާރި ފައިދާއަށް ނުވަތަ އަބުރަށް ހުތުރުވާގޮތަށް ޓެކްނޮލޮޖީގެ ބޭނުންކުރުމަކީ އެމީހެއްގެ ޒާތީ މިނިވަންކަމާއި ގަދަރަށް އަރައިގަތުން ކަމުގައި ކޯޓުން ވަނީ ކަނޑައަޅާފައެވެ.

މި ނިންމުމަކީ ޑިޖިޓަލް ޒަމާނުގައި، ޚާއްޞަކޮށް އޭއައިގެ ސަބަބުން މަޝްހޫރު ފަރާތްތަކަށް ކުރިމަތިވާ ނުރައްކާތަކުން އެމީހުންގެ ހައްގުތައް (ޕާސަނަލިޓީ ރައިޓްސް) ހިމާޔަތްކުރުމަށް އެޅުނު ވަރަށް މުހިންމު ފިޔަވަޅެއްގެ ގޮތުގައި ގާނޫނީ ތަޖުރިބާކާރުން ސިފަކުރެއެވެ.