ކޮންމެ އަންހެނަކުވެސް އަމިއްލަ ފައިމައްޗަށް ތެދުވުމުގެ މުހިންމުކަން ޕްރިޔަންކާ ޗޯޕްޅާ ހަނދާންކޮށްދީފި

ބޮލީވުޑް އަދި ހޮލީވުޑްގެ މަޝްހޫރު ތަރި ޕްރިޔަންކާ ޗޯޕްޅާ، އަންހެނުންގެ މާލީ މިނިވަންކަމުގެ މުހިންމުކަމާ ގުޅޭގޮތުން ވަރުގަދަ މެސެޖެއް ދީފިއެވެ.

ޕްރިޔަންކާ ވަނީ ކޮންމެ އަންހެނަކުވެސް މާލީ ގޮތުން އަމިއްލަ ފައިމައްޗަށް ތެދުވުމަކީ ކިހާ މުހިންމު ކަމެއްކަން ވަރަށް ސާފުކޮށް ކިޔައިދީފައެވެ.

ޕްރިޔަންކާ ބުނެފައިވަނީ އަންހެން ކުއްޖެއްގެ ބައްޕަ ނުވަތަ ފިރިމީހާއަކީ ކިތަންމެ މުއްސަނދި، ނުވަތަ ކިތަންމެ ބޮޑު އެހީތެރިކަމެއް ފޯރުކޮށްދޭ މީހަކަށް ވިޔަސް، އެއީ އެންމެ މުހިންމު ކަންތައް ނޫން ކަމަށެވެ. އޭގެ ބަދަލުގައި، ކޮންމެ އަންހެނަކުވެސް އަމިއްލައަށް މަސައްކަތްކޮށް، ފައިސާ ހޯދައި، މާލީ ގޮތުން އެހެން މީހަކަށް ބަރޯސާނުވެ އުޅެވޭނެ މަގު ތަނަވަސްކުރުމަކީ ކޮންމެހެން ކުރަންޖެހޭ ކަމެއްކަމުގައި އޭނާ ފާހަގަކުރިއެވެ.

މި މެސެޖަކީ އަންހެނުން ބާރުވެރިކުރުވުމަށާއި، އަމިއްލަ ކެރިއަރެއް ބިނާކޮށް ކުރިއަށް ދިއުމަށް ޕްރިޔަންކާ ދިން ވަރަށް ބޮޑު ހިތްވަރެކެވެ. ދިރިއުޅުމުގައި ކޮންމެ ފަދަ ހާލަތެއް މެދުވެރިވި ނަމަވެސް، އަމިއްލަ އާމްދަނީއެއް އޮތުމަކީ އަންހެނުންނަށް ލިބޭނެ އެންމެ ބޮޑު މިނިވަންކަން އަދި އިތުބާރު ކަމަށް އޭނާގެ ވާހަކައިގައި އަލިއަޅުވާލާފައިވެއެވެ.

ޕްރިޔަންކާ އަކީ އަބަދުވެސް އަންހެނުންގެ ހައްގުތަކަށް ވަކާލާތުކޮށް، އަންހެނުން ބާރުވެރިކުރުވުމަށް ދުނިޔޭގެ ފެންވަރުގައި ގިނަ މަސައްކަތްތަކެއް ކުރަމުން އަންނަ ނަމޫނާ ޝަޚުޞިއްޔަތެކެވެ. އޭނާ ދިން މި މުހިންމު ނަސޭހަތަށް ސޯޝަލް މީޑިއާގައި ގިނަ ބައެއްގެ ތައުރީފު އަންނަނީ ލިބެމުންނެވެ.