ދީޕިކާގެ ކާމިޔާބީގެ ފަހަތުގައިވަނީ ކުޅިވަރުގެ އަޚުލާގު ކަމަށް ބައްޕަ ޕްރަކާޝް ބުނެފި

ކުރީގެ މަޝްހޫރު ބެޑްމިންޓަން ކުޅުންތެރިޔާ އަދި ބޮލީވުޑްގެ ތަރި ދީޕިކާ ޕަޑުކޯންގެ ބައްޕަ، ޕްރަކާޝް ޕަޑުކޯން ގަބޫލުކުރާ ގޮތުގައި މައިންބަފައިން ކުދިން ކުޅިވަރު ކުޅުމާމެދު ދެކެނީ ހަމައެކަނި މެޑެއްޔާއި ތަށި ހޯދުމުގެ ހަނި ނަޒަރަކުންނެވެ. ނަމަވެސް އޭނާ ބުނާ ގޮތުގައި ދީޕިކާ ބެޑްމިންޓަން ކުޅުމުގެ ތެރެއިން ހޯދި އެންމެ އަގުހުރި ފިލާވަޅުތަކަކީ ތަށްޓާއި މެޑެއްޔާ ގުޅުމެއް ހުރި ކަންކަމެއް ނޫނެވެ.

ދީޕިކާގެ ކުޑައިރުގެ ހަނދާންތައް އާކުރަމުން ޕްރަކާޝް ބުނެފައިވަނީ، ދީޕިކާ ފަތިހު 5 ޖަހާއިރު ހޭލައިގެން ފަރިތަކުރުންތަކަށް ގޮސް، އެއަށްފަހު ސްކޫލަށް ދާކަމަށެވެ. މި އާދައިގެ ސަބަބުން އަޚުލާގާއި، ގަޑީއަށް ފަރުވާތެރިވުމާއި، އަދި ބޮޑެތި އަމާޒުތަކަށް ވިސްނަން ދީޕިކާއަށް ދަސްވިކަމަށް އޭނާ ފާހަގަކުރިއެވެ.

އެގޮތުން ޕްރަކާޝް ޕަޑުކޯން ކުޅިވަރުގެ ޒަރީއާއިން ކުދިންނަށް ދަސްވާނެ ދިރިއުޅުމުގެ މުހިންމު 5 ފިލާވަޅެއް ވަނީ ފާހަގަކޮށްފައެވެ:

އަޚުލާގަކީ އާދައަކަށް ވުން : ވަގުތަށް ހޭލުމާއި ކަންކަމަށް ކަމޭހިތުމަކީ މައިންބަފައިން ކިޔައިދޭ ނަސޭހަތަކަށް ވުމުގެ ބަދަލުގައި، ކުޅިވަރުގެ ތެރެއިން އެއީ ކުއްޖާގެ ކިބައިގައި އަށަގަންނަ އާދައަކަށް ވެގެންދެއެވެ. ފަރިތަކުރުންތަކަށް ގަވާއިދުން ދިއުމުން ކާމިޔާބީ ގުޅިފައިވަނީ ފަރުވާތެރިކަން ކަމަށް ކުދިންނަށް ދަސްވެއެވެ.

ކާމިޔާބީއާ ހަމައަށް ދިއުމަށް ވަގުތު ނަގާކަން ދެނެގަތުން: ކުޅިވަރު ކުޅޭއިރު ވަގުތުން ނަތީޖާ ނުފެނިދާނެއެވެ. ގޯސްތައް ހެދި، ރަނގަޅު ކުޅުމެއް ދެއްކުމަށް އެތައް ހަފްތާއެއް ނަގާފާނެއެވެ. މީގެން ދަސްކޮށްދެނީ މޮޅު މީހަކަށް ވުމަށް ވަގުތާއި ކެތްތެރިކަން ބޭނުންވާކަމެވެ. އަވަސް ނަތީޖާއަށް އިންތިޒާރުކުރުމުގެ ބަދަލުގައި، ކާމިޔާބަކީ މަޑުމަޑުން ހޯދޭ އެއްޗެއްކަން ކުދިންނަށް ވިސްނެއެވެ.

ބަލިވުމުން ލިބޭ މުހިންމު ފިލާވަޅުތައް: މޮޅުވުމުން ނުލިބޭ އެތައް ފިލާވަޅެއް ބަލިވުމުން ލިބެއެވެ. މެޗަކުން ބަލިވުމުން މާޔޫސްކަމާ ކުރިމަތިލާން ދަސްވެ، އަދި އަލުން މަސައްކަތް ފެށުމުގެ ހިތްވަރު އުފެދިގެންދެއެވެ. ކޮންމެ ފަހަރަކު މޮޅުނުވި ނަމަވެސް، އަމިއްލަ ނަފްސަށް އޮންނަ އިތުބާރު ބޮޑުކުރަން ދަސްވެއެވެ.

ކުރާ ކަމަކަށް ފުރިހަމައަށް ސަމާލުކަން ދިނުން: ކޯޓުމަތީގައި ހުންނައިރު އެހެން ކަންކަމަށް ސަމާލުކަން ދެވޭކަށް ނޯވެއެވެ. އެންމެ ސިކުންތެއްގެ ސަމާލުކަން ގެއްލުމަކީވެސް މެޗުގެ ނަތީޖާ ބަދަލުވެދާނެ ކަމެކެވެ. މިކަމުގެ ސަބަބުން ކުދިންގެ ފޯކަސް ރަނގަޅުވެ، މިއީ ކިޔެވުމަށްވެސް އޭގެ ސަބަބުން އެދެވޭ އަސަރުތަކެއް ކުރާނެ ކަމެކެވެ.

ބޮޑެތި އަމާޒުތަކަށް ވިސްނުމުގެ ގާބިލުކަން: ކުޅިވަރުގެ ސަބަބުން ތަފާތު މީހުންނާ ބައްދަލުވެ، އެކި ތަންތަނަށް ދަތުރުކުރުމުގެ ފުރުސަތު ލިބެއެވެ. މިއީ އަމިއްލަ ނަފްސާމެދު ކުރާ އުއްމީދުތައް އާވެ، ނުކުރެވޭނެކަމަށް ހީކުރި ކަންކަން ކުރެވޭނެކަމުގެ ޔަގީންކަން ލިބިގެންދާ ކަމެކެވެ.

ޚުލާޞާކޮށް ބުނާނަމަ، ކުޅިވަރަކީ ހަމައެކަނި ޕްރޮފެޝަނަލް އެތްލީޓަކަށް ވުމަށް ކުޅޭ އެއްޗެއް ނޫނެވެ. އެއީ މުޅި އުމުރަށް ކުއްޖާގެ ކިބައިގައި ހުންނާނެ ރަނގަޅު ސިފަތަކެއް އަށަގަންނުވާ މުހިންމު ވަސީލަތެކެވެ.