--
ގިނަ ބައެއްގެ މެދުގައި އިސްތަށިގަނޑުގައި ތެޔޮލުމަކީ ވަރަށް އާންމު އާދައެކެވެ.
ޚާއްޞަކޮށް ޝޭމްޕޫލާގެން ބޯދޮވުމަށްފަހު، އިސްތަށިގަނޑު ރީތިކޮށް ބެހެއްޓުމަށްޓަކައި ގިނަ ބަޔަކު ތެޔޮ ބޭނުންކުރެއެވެ. ނަމަވެސް، ބޯދޮންނަ ކޮންމެ ފަހަރަކު ތެޔޮ ލުމަކީ އޭގެ ޒާތުގައި ރަނގަޅު ނުވަތަ ގޯސް ކަމެއް ކަމަށް ކަނޑައެޅޭކަށް ނެތެވެ. މިއީ އެކަމާ ގުޅޭގޮތުން އެނގެންޖެހޭ ބައެއް މުހިންމު ކަންކަމެވެ.
އިސްތަށިގަނޑު އޮމާންވެ، ވިދުން ގަދަވުން: ޝޭމްޕޫ ލާގެން ބޯ ދޮވުމަށްފަހު ކުޑަ ތެޔޮކޮޅެއް އުނގުޅާލުމުން، އިސްތަށިގަނޑު އޮމާންވެ ވިދުންގަދަވާނެއެވެ. ޚާއްޞަކޮށް ބޯ އަދި ބުޅި އިސްތަށިގަނޑެއް ހުންނަ މީހުންނަށް މިއީ ފައިދާހުރި ކަމެކެވެ. ދިރާސާތަކުން ދައްކާގޮތުގައި ކާށި ތެޔޮ ފަދަ ތެޔޮތަކުން އިސްތަށިގަނޑުގެ ޕްރޮޓީން ގެއްލުން ކުޑަކޮށްދެއެވެ.
ބޯތެރެ އަވަހަށް ތެޔޮވުން: ބޮލުގެ އެތެރެއަކީ އާންމުކޮށްވެސް ތެޔޮވާ ތަނަކަށް ވާނަމަ، ބޯދޮންނަ ކޮންމެ ފަހަރަކު ތެޔޮލުމުން ވަރަށް އަވަހަށް އިސްތަށިގަނޑު ތެޔޮވެ، ހަޑިވާނެއެވެ. ދާހިއްލުމާއި ހިރަފުހުގެ ސަބަބުން ގިނައިން ބޯދޮންނަން ޖެހޭ މީހުންނަށް، އިތުރު ތެޔޮ ފަށަލައެއް ލުމަކީ އެހާ ފައިދާހުރި ކަމެއް ނޫނެވެ.
ތުނި އިސްތަށިގަނޑެއް ނަމަ، ފަތާވުން: އިސްތަށިގަނޑު ތުނި މީހުން މާގިނައިން ތެޔޮލައިފިނަމަ، އިސްތަށިގަނޑުގެ ވޮލިއުމް ގެއްލި، ބަރުވެ، އަދި ތެޔޮކަމަށް ދައްކާނެއެވެ. މިފަދަ މީހުންނަށް ރަނގަޅީ ހަމައެކަނި އިސްތަށިގަނޑުގެ މެދުން ފެށިގެން ކޮޅަށް ކުޑަ ތެޔޮކޮޅެއް އުނގުޅާލުމެވެ.
ބޮލުގެ އެތެރޭގައި ތެޔޮލުމާއި އިސްތަށިގަނޑު މޮއިސްޗަރައިޒް ކުރުމަކީ ތަފާތު ދެކަމެއް: ބޮލުގެ އެތެރޭގެ ހަންގަނޑަކީ ދިރިހުރި ސެލްތަކެކެވެ. ނަމަވެސް އިސްތަށިތަކަކީ އެފަދަ އެއްޗެއް ނޫނެވެ. އެހެންކަމުން ބޮލުގެ އެތެރޭގައި ތެޔޮލުމުން އެއީ މުޅި އިސްތަށިގަނޑަށް ކާނާ ލިބޭ ކަމެއް ކަމަށް ހީކުރުމަކީ ކުށްހީއެކެވެ. އަދި ބޯތެރެ ތެޔޮވާނަމަ ނުވަތަ ހަންފޮޅޭނަމަ މާގިނައިން ތެޔޮލުމަކީވެސް ރަނގަޅު ކަމެއް ނޫނެވެ.
ޕްރޮޑަކްޓް ބިލްޑް-އަޕް އުފެދުން: ޝޭމްޕޫ ލާގެން ބޯ ދޮންނަ ކޮންމެ ފަހަރަކު ތެޔޮލުމުގެ އާދަ ތަކުރާރުކުރާނަމަ އަދި ރަނގަޅަށް އެ ނުފިލުވާނަމަ، ބޯތެރޭގައި މި ތަކެތި ޖަމާވެ، އިސްތަށިގަނޑު ބަރުވާގޮތް ވާނެއެވެ.
ޚުލާޞާކޮށް ބުނާނަމަ، ބޯދޮންނަ ކޮންމެ ފަހަރަކު ތެޔޮލުމަކީ ހުރިހާ އެންމެންނަށް އެންމެ ރަނގަޅު ގޮތަކަށް ނުވެދާނެއެވެ. އެކަން ކުރަންވާނީ ތިމާގެ އިސްތަށިގަނޑުގެ ބާވަތަށާއި، ބޯތެރޭގެ ހާލަތަށް ބަލައިގެންނެވެ.
ފަހުގެ
