ސިންގަޕޫރަކީ ސަރަޙައްދީ ފެންވަރުގައި އީޖާދީ އަދި އުންމީދީ ދަންމަރެއް: ރައީސް

ސިންގަޕޫރަކީ ސަރަޙައްދީ ފެންވަރުގައި އީޖާދީ، އަދި އުންމީދީ ދަންމަރެއްގެ ގޮތުގައި ދެމިއޮންނާނޭ ކަމަށް އުންމީދުކުރައްވާކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވީ ސިންގަޕޫރުގެ ޤައުމީ ދުވަހުގެ މުނާސަބަތުގައި އެ ޤައުމުގެ ރައީސް ތަރްމަން ޝަންމުގަރަނަމް އަށާއި ބޮޑުވަޒީރު ހިޒް އެކްސެލެންސީ ލޯރެންސް ވޮންގް އަށް ފޮނުއްވި ތަހުނިޔާ ސިޓީފުޅުގައެވެ.

ރައީސް ޝަންމުގަރަނަމް އަށް ރައީސުލްޖުމްހޫރިއްޔާ ފޮނުއްވި ތަހުނިޔާގެ ސިޓީފުޅުގައި ވަނީ، ދިވެހި ސަރުކާރާއި ރައްޔިތުންގެ ނަމުގައި، ސިންގަޕޫރުގެ ރައީސަށާއި، އެމަނިކުފާނުގެ ސަރުކާރަށާއި އެ ޤައުމުގެ ރައްޔިތުންނަށް ޤައުމީ ދުވަހުގެ ހެޔޮ އެދުންތައް ފޮނުއްވާފައެވެ.

މީގެ އިތުރުން، ސިންގަޕޫރަކީ ސަރަޙައްދީ ފެންވަރުގައި އީޖާދީ، އަދި އުންމީދީ ދަންމަރެއްގެ ގޮތުގައި ދެމިއޮންނާނޭކަމަށް އުންމީދުކުރައްވާ ކަމުގައި އެމަނިކުފާނު ވިދާޅުވިއެވެ.

އަދި، އެއް ޤައުމުން އަނެއް ޤައުމަށް ކުރާ އިޙުތިރާމާއި، އިތުބާރާއި، ސަރަޙައްދީ އަމަންއަމާންކަމާއި ކުރިއެރުމަށް ދެ ޤައުމުން ހިއްސާކުރާ ޢަޒުމުގެ މަތީގައި ބިނާވެފައިވާ، ޒަމާންވީ ރަޙުމަތްތެރިކަމުގެ އަގުވަޒަންކުރައްވާކަމުގައި އެމަނިކުފާނު ވިދާޅުވިއެވެ.

ބޮޑުވަޒީރު ވޮންގް އަށް ފޮނުއްވި ސިޓީފުޅުގައި ރައީސުލްޖުމްހޫރިއްޔާ ވަނީ، ސިންގަޕޫރާއެކު އޮންނަ ގާތް، ރަޙުމަތްތެރި ގުޅުން، ދިވެހިރާއްޖެއަށް މުހިންމުވާ މިންވަރުގެ މައްޗަށް އަލިއަޅުއްވާލައްވާފައެވެ. އެގޮތުން، ވިޔަފާރި އާއި ވުނަކުރުމާއި، ތަޢުލީމާއި ޤާބިލިއްޔަތު އިތުރުކުރުމާއި، ފަރުދީ ފެންވަރުގައި އެއް ޤައުމުން އަނެއް ޤައުމަށް ދޭ އެއްބާރުލުމުގެ ސަބަބުން، އެ ގުޅުން ބަދަހިވަމުންދާކަން އެމަނިކުފާނު ފާހަގަކުރެއްވިއެވެ.

މީގެ އިތުރުން، ދެ ޤައުމުގެ ދެމެދުގައިވާ ޒަމާންވީ ގުޅުން އިތުރަށް ބަދަހިކޮށް، އަމަންއަމާންކަމާއި، ހަމަޖެހުމާއި، ދެމެހެއްޓެނިވި ތަރައްޤީގެ ދާއިރާއިން ދެ ޤައުމުން ހިއްސާކުރާ އުއްމީދުތައް ޙަޤީޤަތަކަށް ހެދުމަށް ބޮޑުވަޒީރު ވޮންގް އާ އެކު ގާތުން މަސައްކަތްކުރެއްވުމަށް ތައްޔާރަށް ހުންނެވިކަން އެމަނިކުފާނު ހާމަކުރެއްވިއެވެ.

ދެބޭފުޅުންނަށް ފޮނުއްވި ސިޓީފުޅު ރައީސުލްޖުމްހޫރިއްޔާ ނިންމަވާލައްވާފައިވަނީ، ސިންގަޕޫރުގެ ރައީސަށާއި ބޮޑުވަޒީރަށް ދުޅަހެޔޮ ސިއްޙަތަކާއި އުފާވެރިކަން އެދިވަޑައިގެން، އެ ޤައުމަށާއި އެ ޤައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގަންނަވަމުންނެވެ.

ސިންގަޕޫރުގެ ޤައުމީ ދުވަހާ ގުޅިގެން، ރައީސުލްޖުމްހޫރިއްޔާ ވަނީ އެމަނިކުފާނުގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި ވެސް މި ޝުޢޫރުތައް ތަކުރާރުކުރައްވާފައެވެ.