ހުޅަނގު އައްސޭރިން އިސްރާއީލު ސިފައިން 13 މީހަކު ހައްޔަރުކޮށް، ފަލަސްތީނުގެ މުދަލަށް ބޮޑެތި ގެއްލުންތަކެއް ދީފި

ހިފާފައިވާ ހުޅަނގު އައްސޭރީގެ އެކި ސަރަހައްދުތަކުގައި އިސްރާއީލު ސިފައިންނާއި ވަޒަންވެރިން ހިންގަމުންދާ ލާއިންސާނީ ހަރަކާތްތަކުގެ ތެރެއިން، ފާއިތުވި ގަޑިއިރުތަކުގައި 13 ފަލަސްތީނު މީހަކު ހައްޔަރުކޮށް، އާންމުންގެ މުދަލާއި ވަސީލަތްތަކަށް ބޮޑެތި ގެއްލުންތަކެއް ދީފިއެވެ.

ފަލަސްތީނުގެ ވަފާ ނިއުސް އެޖެންސީން ރިޕޯޓްކޮށްފައިވާ ގޮތުގައި، އިސްރާއީލުން ދަނީ ހުޅަނގު އައްސޭރީގައި މީހުން ހައްޔަރުކުރުމާއި، ރޭޑްކުރުމުގެ އިތުރުން ފަލަސްތީނުގެ އިމާރާތްތައް ތަޅާލުމުގެ ވަރުގަދަ ޖަރީމާއެއްރިއަށް ގެންދަމުންނެވެ.

މީހުން ހައްޔަރުކުރުމާއި ރޭޑްތައް

އިސްރާއީލު ސިފައިން ހިންގި އޮޕަރޭޝަންތަކުގައި ތުލްކަރަމް، ގަލްގިލްޔާ، ބެތުލެހެމް އަދި ރާމަﷲ އިން މީހުން ހައްޔަރުކޮށްފައިވެއެވެ. މީގެ ތެރޭގައި ބިރްޒައިޓް ޔުނިވާސިޓީގެ ދަރިވަރަކާއި، ހުވާރާ އަސްކަރީ ކޭމްޕަށް ހާޒިރުވާން އެންގި 18 އަހަރުގެ ޒުވާނަކު ހިމެނެއެވެ. މީގެ އިތުރުން، ބެތުލެހެމްގެ ދެހެއިޝާ ރެފިއުޖީ ކޭމްޕަށް ވަދެގަނެ، ނޫސްވެރިޔާ މުއާޛު އަމަރްނާ ވެސް ވަނީ ކުޑަވަގުތުކޮޅަކަށް ހައްޔަރުކޮށްފައެވެ.

ނާބްލަސްގެ ދެކުނުގައި އޮންނަ އަލް-ލުއްބާން އަލް-ޝަރްގިއްޔާގައި އާންމުންގެ ގެތަކާ ކައިރީގައި އަޑުގަދަ ބޮމާއި ކަރުނަގޭސް ބޭނުންކޮށްގެން ބިރުދެއްކުމުގެ އަމަލުތައް ވެސް ވަނީ ހިންގާފައެވެ.

ވަސީލަތްތަކަށް ގެއްލުންދިނުން

އިސްރާއީލުގެ ވަޒަންވެރިން ވަނީ ތޫބާސްގެ ޔަރުޒާ އަދި އަރް-ރަސް އަލް-އަހްމަރުގައި ދިރިއުޅޭ 12 އާއިލާއަކަށް ފެން ފޯރުކޮށްދޭ މައި ހޮޅިއަކަށް ގެއްލުންދީ، އެ ސަރަހައްދުގައި ވަގުތީ ހިޔާވަހިކަން ގާއިމުކޮށްފައެވެ. ރާމަﷲ ގައި ވެސް ވަޒަންވެރިން ވަނީ އާންމު އާއިލާއެއްގެ އުޅަނދަކަށް ހަމަލާދީ، އެ އުޅަނދު އަތުލައިގަތުމަށް މަސައްކަތްކޮށްފައެވެ. މި ހަމަލާތަކަކީ ފަލަސްތީނު ރައްޔިތުންގެ އަސާސީ ބޭނުންތަކަށް ހުރަސްއެޅުމުގެ ގޮތުން ހިންގާފައިވާ އަމަލުތަކެކެވެ.

އިމާރާތްތައް ތަޅާލުމާއި ބިން ފޭރުން

އިސްރާއީލުގެ ބުލްޑޯޒަރުތަކުން ވަނީ ބެތުލެހެމްގެ ދެކުނުގައިވާ ބައިތު ޒަކަރިއްޔާގެ ދަނޑުބިންތައް ސާފުކޮށްފައެވެ. މިއީ އެ ސަރަހައްދުގައި އޮންނަ ޣައިރުގާނޫނީ "ގުޝް އެޓްޒިއަން" ވަޒަންވެރި ސަރަހައްދު ފުޅާކުރުމަށްޓަކައި ހިންގި ހަރަކާތެކެވެ.

މީގެ އިތުރުން، ހެބްރޯންގެ މަސާފިރު ޔައްޓާގައި ހުންނަ ސްކޫލެއްގެ ދެ ކްލާސްރޫމާއި ފާޚާނާ ބަރިއެއް ތަޅާލާފައިވާއިރު، ޖެނީންގެ އިރުމަތީގައިވާ އަރާނާގައި ފަތުރުވެރިކަމަށް ބޭނުންކުރާ ތިން އިމާރާތެއް ތަޅާލުމަށް ވެސް ވަނީ ނޯޓިސް ދީފައެވެ.