މިނިވަން ދުވަހުގެ މުނާސަބަތުގައި "ފަލަސްޠީނާއެކު ރ. ވާދޫ" ހިނގާލުން ބާއްވަނީ

މާޅޮސްމަޑުލު އުތުރުބުރި ވާދޫ ކައުންސިލުން އިންތިޒާމުކޮށްގެން، ފަލަސްޠީނުގެ ރައްޔިތުންނަށް ތާއީދުކޮށް އެ ރައްޔިތުންނާ އެކު ތިބިކަން ހާމަކުރުމަށް "ފަލަސްޠީނާއެކު ރ. ވާދޫ" ގެ ނަމުގައި ޚާއްޞަ ހިނގާލުމެއް ބޭއްވުމަށް ނިންމައިފިއެވެ.

މި ހިނގާލުމަކީ މިއަހަރުގެ މިނިވަންދުވަހުގެ މުނާސަބަތުގައި އެ ރަށުގައި ކުރިއަށް ގެންދާ ހަރަކާތްތަކުގެ ތެރެއިން ބާއްވާ ހަރަކާތެކެވެ. މި ހަރަކާތް ކުރިއަށް ގެންދިއުމަށް ހަމަޖެހިފައިވަނީ ދިވެހިރާއްޖޭގެ 61 ވަނަ މިނިވަންދުވަހުގެ މުނާސަބަތުގައި، 2026 ޖުލައި 26 ވާ އާދީއްތަ ދުވަހުގެ ހަވީރު އެވެ.

ވާދޫ ކައުންސިލުން މަޢުލޫމާތު ދޭ ގޮތުގައި، މި ހިނގާލުން ފެށުމަށް ހަމަޖެހިފައިވަނީ އެ ދުވަހުގެ ހަވީރު 5:00 ގައި ރ. ވާދޫ ބަނދަރު ސަރަހައްދުންނެވެ. މިއީ ފަލަސްޠީނުގެ މުސްލިމް އަޚުންނާއި އުޚުތުންނަށް ދިވެހި ރައްޔިތުންގެ ހިތްތަކުގައި އޮތް ލޯތްބާއި އެއްބައިވަންތަކަން ރަމްޒުކޮށްދިނުމަށް ބާއްވާ ހަރަކާތެކެވެ.

މި ހިނގާލުމުގައި ބައިވެރިވުމުގެ ފުރުޞަތު ރަށުގެ ހުރިހާ އުމުރުފުރާއެއްގެ ރައްޔިތުންނަށް ވަނީ ހުޅުވާލާފައެވެ. ވާދޫގެ ކުދިބޮޑު ހުރިހާ ރައްޔިތުން މި ހިނގާލުމުގައި ބައިވެރިވެ، ފަލަސްޠީނުގެ ރައްޔިތުންނަށް އެހީތެރިކަމާއި ތާއީދު އޮތްކަން ހާމަކުރުމަށް ކައުންސިލުން ވަނީ ދައުވަތު އަރުވާފައެވެ.

ފަލަސްޠީނުގެ ނަސްލު ނައްތާލުމަށް ޔަހޫދީން ހިންގަމުންދާ ލާއިންސާނީ ޖަރީމާތަކުގެ ތެރެއިން، މިދިޔަ ބުރާސްފަތި ދުވަހު އެކަނިވެސް ޣައްޒާގެ އުތުރަށް ދިން ވައިގެ ހަމަލާއެއްގައި ދެ މީހަކު ޝަހީދުވެފައިވާ ކަމަށް ސިއްޙީ އިދާރާތަކުން ބުނެއެވެ. މީގެ އިތުރުން، އިސްތިޢުމާރުކޮށްފައިވާ ހުޅަނގު އައްސޭރީގައި ޔަހޫދީން ބަޑިޖަހައި ފަލަސްޠީނުގެ އިތުރު ތިން މީހަކު ޝަހީދުކޮށްލާފައިވާ ކަމަށް ކަމާބެހޭ ފަރާތްތަކުން ވަނީ ކަށަވަރުކޮށްދީފައެވެ.

އިސްރާއީލް އަސްކަރިއްޔާއިން ދަނީ އެމީހުންގެ ހަމަލާތަކަކީ ހަމާސްގެ ހަނގުރާމަވެރިންނަށް އަމާޒުކޮށްދޭ ހަމަލާތަކެއް ކަމަށް ބުނަމުންނެވެ. ނަމަވެސް، އެމެރިކާގެ ފުރިހަމަ ތާޢީދާއެކު ދެމުންދާ މި ހަމަލާތައް އަމާޒުވަމުންދަނީ އާންމުން ދިރިއުޅޭ ސަރަޙައްދުތަކަށެވެ. ފަލަސްޠީނުގެ ރަސްމީ ތަފާސްހިސާބުތަކުން ދައްކާގޮތުގައި، މިދިޔަ އޮކްޓޯބަރު މަހުން ފެށިގެން ހިންގަމުންދާ ޖަރީމާތަކުގައި މިހާތަނަށް 1,160 އަށްވުރެ ގިނަ މީހުން ވަނީ ޝަހީދުވެފައެވެ. ސިއްހީ ވުޒާރާއިން ފާހަގަކުރާ ގޮތުގައި މީގެ ތެރޭގައި ގިނައީ ކުށެއްނެތް އާންމުންނެވެ.

ހުޅަނގު އައްސޭރީގެ އަވަށެއްގައި ހިނގި ހަމަނުޖެހުންތަކާ ގުޅޭގޮތުން "ވާފާ" ނިއުސް އެޖެންސީން ރިޕޯޓްކޮށްފައިވާ ގޮތުގައި، އިސްރާއީލް އަސްކަރިއްޔާއާއި ހަރުކަށި ވަޒަންވެރިން ފަލަސްޠީނުގެ ރައްޔިތުންނަށް ހަމަލާދީފައިވަނީ އެ ސަރަޙައްދުގައި ރޯވި އަލިފާންގަނޑެއް ނިއްވަން އުޅުނު ވަގުތެއްގައެވެ. މި ޙާދިސާގައި ޔަހޫދީ ވަޒަންވެރިއަކު ދިން ބަޑީގެ ހަމަލާތަކުގައި ދެ މީހަކު ޝަހީދުވިއިރު، ޔަހޫދީ ސިފައިން ވަނީ އިތުރު މީހަކު ޝަހީދުކޮށްލާފައެވެ.

ހަރުކަށި ޔަހޫދީން ފަލަސްޠީނުގެ ބިންތަކުގައި ޤަވާއިދާ ޚިލާފަށް އާބާދީތައް ބިނާކުރުން އިތުރުކޮށް، ވަޒަންވެރިން ހިންގާ ޢުދުވާންތައް ވަރުގަދަކުރުމާ ގުޅިގެން ހުޅަނގު އައްސޭރީގެ މަސްރަޙު ވަނީ އިންތިހާއަށް ނުތަނަވަސްވެފައެވެ. މިއަދުވެސް ހުޅަނގު އައްސޭރީގައި ޔަހޫދީން ދިން ބަޑީގެ ހަމަލާތަކުގައި ފަލަސްޠީނުގެ ހަތަރު މީހަކު ވަނީ ޝަހީދުވެފައެވެ.

ބައިނަލްއަޤްވާމީ މުޖުތަމަޢުން ދެކޭގޮތުގައި ހުޅަނގު އައްސޭރީގައި ޔަހޫދީން ބިނާކުރަމުންދާ އާބާދީތަކަކީ ބައިނަލްއަޤްވާމީ ޤާނޫނުތަކާ ކަނޑައެޅިގެން ޚިލާފު ޢަމަލުތަކެކެވެ. ނަމަވެސް އިސްރާއީލުން ދަނީ ބައިނަލްއަޤްވާމީ ޤާނޫނުތަކަށް ގޮންޖަހައި، ފަލަސްޠީނުގެ އިތުރު ބިންތައް ފޭރި، އާންމު ރައްޔިތުންނާ ދެކޮޅަށް ހިންގާ ލާއިންސާނީ ޢަމަލުތައް ކުރިއަށް ގެންދަމުންނެވެ.