--
"ޑެޑްޕޫލް އެންޑް ވޮލްވެރީން" އިން ބޮކްސް އޮފީހުގައި 1.3 ބިލިއަން ޑޮލަރުގެ ބޮޑު ކާމިޔާބީއެއް ހޯދުމަށްފަހު، 'ވޭޑް ވިލްސަން' ގެ ރޯލުން މަޝްހޫރުވި އެކްޓަރު ރަޔަން ރެނޯލްޑްސް ވަނީ ފޭނުންނަށް އުފާވެރި ޚަބަރެއް ދީފައެވެ.
ނިއުޔޯކްގައި ބޭއްވި ފެނޭޓިކްސް ފެސްޓް ގައި ބައިވެރިވެ ވާހަކަދައްކަމުން ރަޔަން ވަނީ މާވަލް ސްޓޫޑިއޯސްގައި ޑެޑްޕޫލްގެ އައު ފިލްމެއްގެ މަސައްކަތް ރޭވިގެން ކުރިއަށްދާކަން ކަށަވަރުކޮށްދީފައެވެ.
ފިލްމާ ގުޅޭގޮތުން ވާހަކަދައްކަމުން ރަޔަން ބުނީ، ކޮމިކްސްތަކުގައި ހުރި ނަމަވެސް މިހާތަނަށް ފިލްމުތަކުން ނުފެންނަ ވަރަށް އަސަރުގަދަ އަދި ޚާއްޞަ ވާހަކަތަކެއް ކުރިއަށް އޮތް ފިލްމުން ފެނިގެންދާނެ ކަމަށެވެ. ޚާއްޞަކޮށް ޑެޑްޕޫލް ކެރެކްޓާ އުފެއްދި ފޭބިއަން ނިސިއޭޒާ އާއި މަޝްހޫރު ކޮމިކް ލިޔުންތެރިޔާ ޖެރީ ދުގަން ގެ ކޮމިކްސްތަކުގައިވާ މުހިންމު ބައިތަކަކަށް އޭނާ ވަނީ އިޝާރާތްކޮށްފައެވެ.
ރަޔަން މީގެ ކުރިން ހާމަކޮށްފައިވާ ގޮތުގައި، ކުރިއަށް އޮތް ތަނުގައި ޑެޑްޕޫލް އެކަނި ފެންނަ 'ސޯލޯ' ފިލްމުތަކަށްވުރެ ބޮޑަށް، އޭނާ ބޭނުންވަނީ ގިނަ ސުޕަހީރޯއިން އެކުލެވޭ ޓީމު ފިލްމުތަކުން ޑެޑްޕޫލް ދެއްކުމަށެވެ. މީގެ ތެރޭގައި "އެކްސް-ފޯސް" ކޮމިކްސްގެ ވާހަކަތަކެއް ފިލްމަށް ބަދަލުކުރުމުގެ ވިސްނުން ހުރިކަމަށް ރިޕޯޓްތައް ބުނެއެވެ.
މިއާއެކު، ސިނަމާތަކަށް އަންނަން އޮތް މާވަލްގެ ބޮޑު ފިލްމު "އެވެންޖާސް: ޑޫމްސްޑޭ" އިންވެސް ޑެޑްޕޫލްގެ ކެމިއޯ ފެނިގެންދާނެ ކަމަށް ޚަބަރުތައް ބުނެއެވެ.
ފަހުގެ
