އާރް. މާދަވަންގެ އާ ފިލްމުގެ ޓްރެއިލާ ދައްކާލައިފި: އިންޑިއާގެ މަޝްހޫރު އީޖާދުވެރިޔާގެ ބަޔޮގްރަފީއެއް!

މަޝްހޫރު އެކްޓަރު އާރް. މާދަވަން ލީޑް ރޯލުން ފެނިގެންދާ، ކުރިއަށް އޮތް ބަޔޮގްރަފިކަލް ޕީރިއަޑް ޑްރާމާ "ޖީ ޑީ އެން" ގެ ރަސްމީ ޓްރެއިލާ އާންމުކޮށްފިއެވެ.

ކްރިޝްނާކުމާރު ރާމާކުމާރު ޑައިރެކްޓްކުރާ މި ފިލްމަކީ އިންޑިއާގެ ފާހަގަކޮށްލެވޭ އީޖާދުވެރިޔާ އަދި އިންޖިނިއަރު ޖީ.ޑީ. ނައިޑޫގެ ހަޔާތުގެ މައްޗަށް ބިނާކޮށް އުފައްދާ ފިލްމެކެވެ.

ގާތްގަނޑަކަށް ތިން މިނެޓުގެ މި ޓްރެއިލާއިން ފެނިގެންދަނީ އިންޑިއާގެ މިނިވަންކަމުގެ ކުރީގެ ދުވަސްވަރު، ޖީ.ޑީ. ނައިޑޫ އީޖާދުވެރިއެއްގެ ގޮތުންނާއި ވިޔަފާރިވެރިއެއްގެ ގޮތުން ކުރިއަށްދާން ކުރި އާދަޔާޚިލާފު ދަތުރެވެ. އަދި އޭނާގެ ޒުވާން ދުވަސްވަރުގެ އީޖާދުތަކާއި، ދިމާވި ބޮޑެތި ގޮންޖެހުންތަކާއި ހުރަސްތަކުން އަރައިގަތުމަށް ކުރި ހިތްވަރު ވެސް ޓްރެއިލާއިން ދައްކުވައިދެއެވެ.

ޖީ.ޑީ. ނައިޑޫއަކީ އިންޑިއާގެ ރައްޔިތުންގެ ބޭނުންތަކަށް ފެތޭނެ ފަދަ އަގުހެޔޮ ޓެކްނޮލޮޖީތައް އުފެއްދި ލާމަސީލު ޝަޚްސިއްޔަތެކެވެ.

މާދަވަންގެ އިތުރުން މި ފިލްމުގެ މުހިންމު ރޯލުތަކުން ސަތުޔަރާޖް، ޕްރިޔާމަނީ، ޖަޔަރާމް އަދި ދުޝާރާ ވިޖަޔަން ފަދަ ހުނަރުވެރި ތަރިން ފެނިގެންދާނެއެވެ.

ފިލްމުގެ މިއުޒިކް ތައްޔާރުކޮށްފައިވަނީ ގޯވިންދު ވަސަންތާ އެވެ. އަދި ފިލްމުގެ ސްކްރީންޕްލޭ ލިޔެފައިވަނީ ޑައިރެކްޓަރު ކްރިޝްނާކުމާރުގެ އިތުރުން މާދަވަންއެވެ. އަދި މިއީ މާދަވަން އާއި އޭނާގެ އަންހެނުން ސަރީތާގެ "ޓްރައިކަލާ ފިލްމްސް" އާއި "ވާގީޒް މޫލަން" ގުޅިގެން ޕްރޮޑިއުސްކުރާ ފިލްމެކެވެ.

މާދަވަން އެންމެ ފަހުން ފެނިގެންގޮސްފައިވަނީ މިއަހަރުގެ މާރިޗު 19 ގައި ރިލީޒްކުރި ރަންވީރު ސިންގްގެ ފިލްމު "ދުރަންދަރް" އިންނެވެ.