202 އެތްލީޓުންނާއެކު މާސްޓަރސް އެތްލެޓިކްސް ޗެންޕިއަންޝިޕް 2026 ފަށައިފި

މާސްޓަރސް އެތްލެޓިކްސް މޯލްޑިވްސްގެ ފަރާތުން އިންތިޒާމްކޮށް، ރާއްޖޭގައި ބާއްވާ "މާސްޓަރސް އެތްލެޓިކްސް ޗެންޕިއަންޝިޕް 2026" މިއަދު ފަށައިފިއެވެ.

މުބާރާތް ފެށުމުގެ ގޮތުން މިއަދު ހެނދުނު އެންމެ ފުރަތަމަ ކުރިއަށް ގެންގޮސްފައިވަނީ އަންހެނުންގެ 5000 މިޓަރު ދުވުމެވެ. އަދި މިއިވެންޓް ކުރިއަށް ގެންގޮސްފައިވަނީ 50 އަހަރާއި، 55، 60، 65 އަދި 70 އަހަރުން މަތީގެ އެތްލީޓުން އެކީގައެވެ. އަދި ފިރިހެނުންގެ 40 އަހަރައީ 45 އަހަރުން މަތީގެ ޑިސްކަސް ތުރޯއިންގެ އިތުރުން އަހަންހެނުންގެ 40 އަހަރާއި 45 އަހަރުން މަތީގެ ޝޮޓްޕުޓް ތްރޯއިންގ އިވެންޓް ވެސް ވަނީ ކުރިއަށް ގެންގޮސްފައެވެ.

ވޯލްޑް މާސްޓަރސް އެތްލެޓިކްސްގެ މިންގަނޑުތަކަށް ފެތޭގޮތައް ބާއްވާ މި މުބާރާތުގައި މިއަހަރު ރާއްޖޭގެ އިތުރުން އިތުރު އަށް ގައުމެއްގެ 16 ކުލަބަކުން 202 އެތްލީޓުން ވާދަކުރާއިރު، އޭގެތެރޭގައި އިންޑިއާ، ސްރީލަންކާ، ނޭޕާލް، ބަންގްލަދޭޝް، ޖަޕާން، ސިންގަޕޫރު، ހަންގޭރީ އިތުރުން ޑެންމާކްގެ އެތްލީޑުން ހިމެނެއެވެ.

07 މެއި 2026 އިން 09 މެއި 2026 ގެ ނިޔަލަށް މާލޭ ސިޓީ ކުޅިވަރު އެކުވެނި ސިތެޓިކް ޓްރެކުގައި ކުރިއަށްދާ މިމުބާރާތް މިއަހަރު އަށް އުމުރުފުރައަކަށް ހުޅުވާލެވިފައިވާއިރު، އޭގެ ތެރޭގައި ހިމެނެނީ 35 އަހަރުން މަތި، 40 އަހަރުން މަތި، 45 އަހަރުން މަތި، 50 އަހަރުން މަތި އަދި 55 އަހަރުން މަތި، 60 އަހަރުން މަތި، 65 އަހަރުން މަތި އަދި 70 އަހަރުން މަތީގެ އުމުރުފުރައެވެ.

މުބާރާތުގެ އިވެންޓުތައް ކުރިއަށް ގެންދިއުމަށް ހަމަޖެހިފައިވަނީ ކޮންމެ ދުވަހެއްގެ ވެސް ހެނދުނު 07:00 އިން 10:00 އަށް އަދި މެންދުރު ފަހު 16:00 އިން 18:00 އަށެވެ. މީގެ އިތުރުން މިމުބާރާތުގައި ބޭއްވުމަށް ހަމަޖެހިފައިވާ އިވެންޓްތަކަކީ 100 މީޓަރު، 200 މީޓަރު، 1500 މީޓަރު، 5000 މީޓަރު، 10،000 މީޓަރު، 4×400 މީޓަރު (މިކްސް ރިލޭ)، 4×800 މީޓަރު (މިކްސް ރިލޭ)، ޝޮޓް ޕުޓް ތްރޯއިންގ، ޑިސްކަސް ތްރޯއިންގ އަދި ޖެވަލިންގ ތްރޯއިންގ އެވެ.