ނަރީޝްގެ ޒާޔާއަށް: ރައީސް މުއިއްޒުގެ މޭޔަރުކަމުގައި ގޯސްހެއްދެވިނަމަ، 2 އަހަރުވީއިރު އެވާހަކަ ނުދެއްކީ ކީއްވެގެންތޯ؟

ރައީސުލްޖުމްހޫރިއްޔާ ޑރ. މުހައްމަދު މުއިއްޒު މާލެ ސިޓީ ކައުންސިލްގެ މޭޔަރު ކަމުގައި ހުންނެވި ދުވަސްވަރު ހައްދަވާފައިވާ ގޯސްތަކުގެ ވާހަކަ، މިހާރުގެ އެމްޑީޕީ މޭޔަރު އާދަމް އާޒިމް ނުދައްކަވަނީ ކީއްވެތޯ ބުނެ، ކައުންސިލްގެ ކުރީގެ ޑެޕިއުޓީ މޭޔަރު އަހުމަދު ނަރީޝް، ހުޅުމާލެ އުތުރު ދާއިރާގެ އިންތިހާބީ ކައުންސިލަރު ފާތިމަތު ޒަހިއްޔާ (ޒާޔާ) ގެ ވާހަކަތަކަށް ރައްދުދެއްވައިފި އެވެ.

ނަރީޝް މިހެން ވިދާޅުވީ، އިދިކޮޅު އެމްޑީޕީން ރޭ ބޭއްވި މުޒާހަރާގައި ޒާޔާ ދެއްކެވި ވާހަކަތަކަށް ރައްދުދެއްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.

އެމްޑީޕީ މުޒާހަރާގައި ޒާޔާ ވިދާޅުވީ، މާލޭގެ މޭޔަރު ކަމުގެ މަގާމުގައި ރައީސް ޑރ. މުއިއްޒު ހުންނެވި ދުވަސްވަރު ހިންގާފައިވާ ވައްކަމުގެ މައްސަލަތައް ބަލައި، އެކަމުގެ "ކުޅި ދައްކާލާނެ" ކަމަށާއި، އެމްޑީޕީއަށް ވުރެ ބޮޑަށް ދިވެހި ރައްޔިތުންދެކެ ލޯބިވާ، ރައްޔިތުންގެ ހައްގުތަކަށް ވަކާލާތު ކުރާނެ އެހެން ޕާޓީއެއް ނޯންނާނެ ކަމަށެވެ.

މިވާހަކަތަކަށް ރައްދުދެއްވައި ނަރީޝް ވަނީ، މިއަދުވެސް މޭޔަރަކަށް ހުންނެވީ އެމްޑީޕީއަށް ނިސްބަތްވާ ބޭފުޅެއްކަމަށާއި، މަގާމުގައި 2 އަހަރާއި 4 މަސް ވެގެންދާއިރު އެވާހަކަ ނުދަައްކަވަނީ ކީއްވެކަމަށް ބުނެ ސުވާލު އުފައްދާފައެވެ.

މިކަންކަން އެމްޑީޕީން ނުބަލާ އެ ތިބެނީ ރައީސް އާއި ދިމާއަށް ބުނެވޭނެ އަދި ކުރެވޭނެ ކަމެއް ނެތުމުން ކަމަށާއި، އެމަނިކުފާނަކީ އެފަދަ އަމަލުތައް ކުރައްވާނެ ބޭފުޅެއް ނޫން ކަމަށްވެސް ނަރީޝް ވިދާޅުވިއެވެ.