އެސޯސިއޭޝަން ޗެމްޕިއަންޝިޕް: 19 އަހަރުންދަށް ފިރިހެން ސިންގަލް ޗެމްޕިއަންކަން މައިޝާން ހޯދައިފި

ކެރަމް އެސޯސިއޭޝަން އޮފް މޯލްޑިވްސްގެ ފަރާތުން އިންތިޒާމުކޮށްގެން މިހާރު ކުރިއަށްދާ 13 ވަނަ އެސޯސިއޭޝަން ޗެމްޕިއަންޝިޕް ކެރަމް މުބާރާތުގެ ޖޫނިއާ ފިރިހެން 19 އަހަރުންދަށް ސިންގަލް ޗެމްޕިއަންކަން އަހުމަދު މައިޝާން ހޯދައިފިއެެވެ.

ހުޅުމާލޭ ކެރަމް ހޯލުގައި މިއަދު ހަވީރު ކުޅުނު ފައިނަލުގައި 19 އަހަރުންދަށުގެ ފިރިހެން ސިންގަލް ފައިނަލުގައި އަބްދުﷲ ކިޔާން ބިން ޝާޒް އާއި ވާދަކޮށް މައިޝާން ޗެމްޕިއަންކަން ހޯދީ ވާދަވެރި ކުޅުމަކަށްފަހު 2-1 ގެ ނަތީޖާއަކުންނެވެ.

އެގޮތުން މެޗުގެ ފުރަތަމަ ސެޓް ފަސޭހަކަމާއެކު 0-25 ގެ ނަތީޖާއަކުން މައިޝާން ކާމިޔާބުކުރި ނަމަވެސް ޖެހިގެންއައި ދެވަނަ ސެޓް 19-11 ގެ ނަތީޖާއަކުން ކާމިޔާބުކޮށް ކިޔާން ވަނީ މެޗުގެ ނަތީޖާ އެއްވަރުކޮށްފައެވެ. މިއާއެކު މެޗުގ ނަތީޖާ ނެރުމަށް ކުޅުނު ތިންވަނަ ސެޓް ވާދަވެރި ކުޅުމަކަށްފަހު މައިޝާން ކާމިޔާބުކުރީ 13-15 ގެ ނަތީޖާއަކުންނެވެ.

މުބާރާތުގެ ފައިނަލުން މައިޝާން ޖާގަހޯދީ ސެމީފައިނަލް ފުރަތަމަ މެޗުގައި ފަހަތުން އަރައި 2-1 ގެ ނަތީޖާއަކުން އަހުމަދު ޝަމާލް ސައުދުއްﷲ ބަލިކުރުމަށްފަހުއެވެ. އަދި ކިޔާން ފައިނަލުން ޖާގަ ހޯދީ ސެމީފައިނަލް ދެވަނަ މެޗުގައި ފަސޭހަކަމާއެމު ސީދާ ދެ ސެޓުން އިސްމާއިލް ޝަމްހާން ޝާހް ބަލިކުރުމަށްފަހު އެވެ.

އެޕްރީލް 15 އިން ފެށިގެން ހުޅުމާލޭ ކެރަމް ހޯލުގައި ކުރިއަށްދާ މިމުބާރާތުގެ ޖޫނިއާ 19 އަހަރުން ދަށުގެ ފިރިހެން ކެޓަގެރީގައި 32 ކުޅުންތެރިން ވާދަކޮށްފައިވާއިރު، މި އުމުރުފުރާގެ މެޗުތައް ކުރިއަށް ގެންގޮސްފައިވަނީ ސިންގަލް އެލިމިނޭޝަން އުސޫލުންނެވެ.