އެސޯސިއޭޝަން ޗެމްޕިއަންޝިޕް: 15 އަހަރުންދަށް ފިރިހެން ސިންގަލް ޗެމްޕިއަންކަން ކިޔާން ހޯދައިފި

ކެރަމް އެސޯސިއޭޝަން އޮފް މޯލްޑިވްސްގެ ފަރާތުން އިންތިޒާމުކޮށްގެން މިހާރު ކުރިއަށްދާ 13 ވަނަ އެސޯސިއޭޝަން ޗެމްޕިއަންޝިޕް ކެރަމް މުބާރާތުގެ ޖޫނިއާ ފިރިހެން 15 އަހަރުންދަށް ސިންގަލް ޗެމްޕިއަންކަން އަބްދުﷲ ކިޔާން ބިން ޝާޒް ހޯދައިފިއެެވެ.

ހުޅުމާލޭ ކެރަމް ހޯލުގައި މިއަދު މެންދުރު ކުޅުނު ފައިނަލުގައި 15 އަހަރުންދަށުގެ ފިރިހެން ސިންގަލް ފައިނަލުގައި ޒާހިލް ޒާލިފް އާއި ވާދަކޮށް ކިޔާން ޗެމްޕިއަންކަން ހޯދީ ވާދަވެރި ކުޅުމަކަށްފަހު 12-8 ގެ ނަތީޖާއަކުން މެޗު ކާމިޔާބުކޮށްގެންނެވެ.

މުބާރާތުގެ ފައިނަލުން ޒާހިލް ޖާގަހޯދީ ސެމީފައިނަލް ފުރަތަމަ މެޗުގައި ވާދަވެރި ކުޅުމަކަށްފަހު 20-15 ގެ ނަތީޖާއަކުން މާކިން ބިން މަދަދުﷲ ބަލިކުރުމަށްފަހު އެވެ. އަދި ކިޔާން ފައިނަލުން ޖާގަ ހޯދީ ސެމީފައިނަލް ދެވަނަ މެޗުގައި ފަސޭހަކަމާއެމު 25-05 ގެ ތަފާތުބޮޑު ނަތީޖާއަކުން އަންދްރޭ ބްރައިސަން ބަލިކުރުމަށްފަހު އެވެ.

އެޕްރީލް 15 އިން ފެށިގެން ހުޅުމާލޭ ކެރަމް ހޯލުގައި ކުރިއަށްދާ މިމުބާރާތުގެ ޖޫނިއާ 15 އަހަރުން ދަށުގެ ފިރިހެން ކެޓަގެރީގައި 26 ކުޅުންތެރިން ވާދަކޮށްފައިވާއިރު، މި އުމުރުފުރާގެ މެޗުތައް ކުރިއަށް ގެންގޮސްފައިވަނީ ސިންގަލް އެލިމިނޭޝަން އުސޫލުންނެވެ.