ހުރާ ގެއެއްގައި ރޯވެ، ބޭނުން ނުކުރެވޭ ވަރަށް އަނދައިފި

ކ. ހުރާ މީހުން ދިރިއުޅެ ގެއެއްގައި އަލިފާނުގެ ހާދިސާއެއް ހިނގައި، އެ ގެ ބޭނުންނުކުރެވޭ ވަރަށް އަނދައިފި އެވެ.

މައުލޫމާތު ލިބިފައިވާ ގޮތުގައި މި ހާދިސާ ހިނގާފައިވަނީ ރޭ 12:30 ހާއިރު އެވެ.

ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މައުލޫމާތުދިން ގޮތުގައި، މި ހާދިސާގައި އެ ގޭގައި ދިރިއުޅޭ މީހެއްގެ އެއް އަތް ފިހިގެން ވަނީ ފަރުވާ ދީފައެވެ.

އެންޑީއެމްއޭއިން ބުނިގޮތުގައި، މި ހާދިސާގެ ސަބަބުން ހާލުގައި ޖެހުނު 15 މީހުންނަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން މިހާރު ވަނީ ފަށާފައެވެ. މި މަސައްކަތް ކުރިއަށް ގެންދަނީ ހުރާ ކައުންސިލާ ގުޅިގެންނެވެ.

މި ހާދިސާ ހިނގަން ދިމާވި ސަބަބު މިހާތަނަށް އެނގިފައެއް ނުވާއިރު، މި ގޭގައި ރޯވި އަލިފާން ނިއްވާލެވުނީ ރޭ 2:00 ޖަހާކަންހާއިރު އެވެ.