ޕްރައިމް ގުދަނުގައި ރޯވެ އަނދަނީ: އެމްއޭސީއެލްގެ ފަޔާފައިޓަރުންވެސް އެސަރަހައްދަށް!

މާލޭގެ ގުދަނެއްގައި ރޯވެ އަނދަމުންދާ ސަރަހައްދުގައި މޯލްޑިވްސް އެއާޕޯޓްސް ކޮމްޕެނީ ލިމެޓެޑް، އެމްއޭސިއެލްގެ އުޅަނދުތަކާއި ފަޔާފައިޓަރުން ހަރަކާތްތެރިވާން ފަށައިފި އެވެ.

އެސަރަހަައްދުގައި ތިބި ގާފު ނޫހުގެ ނޫސްވެރިން މައުލޫމާތު ދޭގޮތުގައި އެގުދަނުގައި ރޯވި އަލިފާންގަނޑު ނިންވާލުވުމަށް އެމްއޭސީއެލްގެ ފަޔާޓްރަކަކާއި ފަޔާފައިޓަރުންތަކެއް މިހާރު ވަނީ އެސަރަހައްދަށް ގޮސް ހަރަކާތްތެރިވާން ފަށާފައި އެވެ.

އެގޮތުން އެގުދަނަކީ ކެމިކަލް ރައްކާކުރާ ގުދަނެއްކަން މިހާރު ކަށަވަރުވެފައިވާއިރު އަލިފާންގަނޑު ކޮންޓްރޯލް ނުކުރެވި ގިނަ އިރު ވެގެންދަނީ ގުދަނުގައި ހުރި ކެމިކަލްތަކުގައި އަލިފާން ރޯވުމާއި ގުޅިގެންކަން މައުލޫމާތު ލިބެއެވެ.

އެމްއެންޑީއެފްގެ ފަޔާ ފައިޓަރުންނަށް އެހީވުމަށް އެއާޕޯޓުގެ ފަޔާ ޓްރަކަކާއި ފަޔާފައިޓަރުން އައިސްފައިވަނީ ކެމިކަލާއި ގުޅުންހުރި އަލިފާން ނިއްވުމުގެ އާލާތްތައް މިވަގުތު ހުރީ އެމްއޭސީއެލްގެ ފަޔާ އެންޑް ރެސްކިއު ސާވިސްގައި ކަމުންނެވެ.

މި ހާދިސާއާއި ގުޅިގެން ފުލުހުން ބުނީ މާލެ، މާފަންނު، ފުލޫނިޔާމަގުގައި ހުންނަ ގުދަނެއްގައި އަލިފާނުގެ ހާދިސާއެއް ހިނގައިގެން ފުލުހުންނާއި ފަޔަރ އެންޑް ރެސްކިއު ސަރވިސަސްއިން ހަރަކާތްތެރިވަމުން ދާކަމަށެވެ.

އަދި އެމްއެންޑީއެފުންވެސް ވަނީ މ.ތޮއިބާ މިސްކިތް ކައިރީ ހުރި ގުދަނެއްގައި އަލިފާން ރޯވެގެން، އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވަމުންދާކަން ކަށަވަރުކޮށްދީފައި އެވެ.