އިންޑިއާ ކަނޑުގައި އޮތް އިރާނުގެ މަަނަވަރަށް އެމެރިކާއިން ހަމަލާދިނީ ޑިއެގޯ ގާސިޔާއަށް ހަމަލާ ދޭނެ ކަމުގެ ބިރު އޮތުމުން - ރިޕޯޓު

އިންޑިއާ ކަނޑުގައި އޮތް އިރާނުގެ މަަނަވަރަށް އެމެރިކާއިން ހަމަލާދިނީ ޑިއެގޯ ގާސިޔާއަށް ހަމަލާ ދޭނެ ކަމުގެ ބިރު އޮތުމުންކަމަށް މިކަމުގެ މައުލޫމާތު އެނގޭ އޮފިޝަލުންތަކަކާއި ހަވަލާދީ ރިޕޯޓުތައް ބުނަން ފަށަައިފި އެވެ.

ލަންކާއާއި މާދުރުނޫން ސަރަހައްދެއްގައި އިންޑިއާ ކަނޑުގައި އޮތް އީރާނުގެ ހަނގުރާމަ މަތީ މަނަވަރު އައިރިސް ޑެނާއަށް މިދިޔަ ބުދަ ދުވަހުގެ ފަތިހުގެ ވަގުތެއްގައި އެމެރިކާގެ ސަބްމެރިންއަކުން ވަނީ ވަރުގަދަ ހަމަލާއެއްދީ މުޅި މަނަވަރު ފައްތާލާފައި އެވެ. މި މަނަވަރަށް ހަމަލާދިން އިރު އެވަގުތު އެބޯޓުގައި 180 އަށްވުރެ ގިނަ ސިފައިންނާއި ފަޅުވެރިން ތިބި އިރު މި ހަމަލާގައި ސަލާމަތްވެފައިވަނީ އެންމެ 30 އެއްހާ އިރާނު ސިފައިންނާއި ފަޅުވެރިންނެވެ.

މި ހަމަލާއާއި ގުޅިގެން އެމެރިކާގެ އިސް އޮފިޝަލުންތަކަކާއި ހަވާލާދީ ބޭރުގެ ރިޕޯޓުތައް ބުނާގޮތުގައި އެމެރިކާއިން އިންޑިއާ ކަނޑުގައި މިފަދަ ހަމަލާއެއް ދިނީ ރާއްޖޭގެ އެންމެ އުތުރުން އައްޑޫ ސިޓީއާއި 450އެއްހާ ނޯޓިކަލް މޭލު ދުރުގައި އޮތް އެމެރިކާގެ އަސްކަރީ ބޭސް ޑިއެގޯ ގާސިއާއަށް އިރާނުގެ ހަމަލާއެއް އަމާޒުވެދާނެ ކަމުގެ ބިރު އޮތުމުންނެވެ. އެގޮތުން ޑިއެގޯ ގާސިޔާއަކީ އެމެރިކާއިން އިރާނަށް ހަމަލާދޭން ބޭނުންކުރީ ބީ2 ބޮމްބާސް ތިބޭ މައި މަރުކަޒުކަމަށް ރިޕޯޓުތައް ބުނެއެވެ. އަދި މީގެ ކުރީންވެސް އިރާނަށް ހަމަލާދިނުމަށްޓަކައި ޑިއޭގޯ ގާސިޔާ ބޭނުންކުރި ކަމަށް ރިޕޯޓުތައް ބުނެއެވެ.

އިރާނުގެ މަނަވަރަށް އެމެރިކާއިން ދިން ހަމަލާއަކީ މިހާތަނަށް ބޮޑުހަނގުރާމައަށްފަހު ކަނޑުމަތީގައި ދީފައިވާ އެންމެ ރަހުމުކުޑަ ހަމަލާއެވެ. މި ހަމަލާގެ މަންޒަރު ފެންނަ ވީޑިއޯއިން އެމެރިކާ ސަރުކާރުވެސް ވަނީ ހާމަކޮށްފައެވެ.

މި ހަމަލާއަށްފަހު ކަނޑުވި ފަޅުވެރިންނާއި ސިފައިންނަށް އެހީތެރިކަން ފޯރުކޮށްދިނީ ލަންކާ އަސްކަރިއްޔާއިންނެވެ. އެގޮތުން އެމީހުން ލަންކާއަށް ގެންގޮސް ފަރުވާ ދެމުންދާއިރު މަރުވ ސިފައިންނާއި ފަޅުވެރިންގެ ހަށިތައްވެސް ވަނީ މިހާރު ލަންކާއަށް ގެންގޮސްފައި އެވެ.