އިރާނަށް ހަމަލާދޭން ޔޫކޭގެ އަސްކަރީ ބޭސްތައް ބޭނުންކުރުމުގެ ހުއްދަ ދިނުމާއިއެކު އެމެރިކާގެ ބޮމްބާތައް ޔޫކޭގެ ބޭސްތަކަށް ޖައްސަން ފަށައިފި

އިރާނަށް ހަމަލާދޭން އިނގިރޭސިވިލާތުގެ އަސްކަރީ ބޭސްތައް ބޭނުންކުރުމުގެ ހުއްދަ ދިނުމާއިއެކު އެމެރިކާގެ ބޮމްބާތައް އެގައުމުގެ ބޭސްތަކަށް ޖައްސަން ފަށައިފި އެވެ.

އިރާނަށް ހަމަލާދިނުމަށް އިނގިރޭސި ވިލާތުގެ އަސްކަރީ މަރުކަޒުތައް ބޭނުންކުރުމުގެ ހުއްދަ ބޮޑުވަޒީރު ސްޓާމަރ، އެމެރިކާގެ ރައީސް ޓްރަމްޕަށް ދެއްވުމާ ގުޅިގެން، އެމެރިކާގެ ބީ-1 (B-1) ބޮމްބާއެއް އިނގިރޭސިވިލާތަށް ޖައްސާފައިވާކަމަށް އިނގިރޭސި މީޑިއާތަކުން ދަނީ ރިޕޯޓުކުރަމުންނެވެ.

އެގޮތުން މި ބީ-1 (B-1) ބޮމްބާ ޖައްސާފައިވަނީ އިނގިރޭސި ސިފައިންގެ އެންމެ ބޮޑު އެއް ބޭސް ކަމަށްވާ ގްލޯސްޓާޝަޔަރ އަށެވެ.

އެގައުމުގެ ޓޯރީ ޕާޓީގެ ލީޑަރު ކެމީ ބަޑެނޮޗް ހިމެނޭ ގޮތަށް އިނގިރޭސިވިލާތުގެ ގިނަ ސިޔާސީ ފަރާތްތަކުން ވަނީ އަސްކަރީ މަރުކަޒުތައް ބޭނުން ކުރުމުގެ ހުއްދަ އެމެރިކާގެ ރައީސް ޑޮނަލްޑް ޓްރަމްޕަށް ދިނުން ލަސްވުމުން ސްޓާމަރ އަށް ފާޑުކިޔާފައި އެވެ. އެކަމަކޔ ސްޓާމަރ ވަނީ އޭނާގެ ނިންމުން ދިފާއުކޮށް، ހަނގުރާމައަކީ ގާނޫނާ ހިލާފު ހަނގުރާމައަކަށް ވެދާނެ ކަމަށާއި، ކުރިއަށް ގެންދެވޭނެ، ވިސްނުންތެރި ޕްލޭނެއް ނެތް ކަމަށް ބުނެފައި އެވެ.

މިދިޔަ ހޮނިހިރު ދުވަހު އިސްރާއީލާއި އެމެރިކާއިން އިރާނަށް ވަރުގަދަ ހަމަލާތަކެއް ދޭން ފަށައި އެގައުމުގެ އެންމެ މަތީ ލީޑަރު އާޔަތުالله އަލީ ޚާމަނާއީ އާއި ލީޑަރޝިޕްގެ އިސްވެރިންތަކެއް ވަނީ އަވަހާރަކޮށްލާފައި އެވެ. މި ހަމަލާތައް އިސްރާއީލާއި އެމެރިކާއިން ފެށީ އިރާނުން ނިއުކްލިއާ ހަތިޔާރު އުފައްދާ ކަމަށާއި އެކަމުގެ ބިރު މުޅި ދުނިޔެއަށް އޮތް ކަމަށްބުނެ އެވެ. މި ހަމަލާތަކާއިއެކު އިރާނުން ވަނީ ވަރުގަދަ ބަދަލު ހަމަލާތަކެއް ފަށާފައި އެވެ.

މި ހަމަލާތައް އިސްރާއީލުގެ އިތުރުން މެދުއިރުމަތީގައި އެމެރިކާގެ ބޭސްތައް ގާއިމްކޮށްފައިވާ ހުރިހާ ގައުމަކަށް އިރާނުން ދެމުންދާއިރު މި ހަމަލާތައް އިރާނުން ހުއްޓާލަން މިއަދު ވަނީ އެއްބަސްވެފައި އެވެ. ހުއްޓާލަން އެއްބަސްވެފައިވަނީ އިރާނުގެ އަވަށްޓެރި ގައުމުތަކަށް ދެމުންދާ ހަމަލާތަކެވެ. އިސްރާއީލަށް ހަމަލާތައް ހުއްޓާނުލާން ނިންމައި އިސްރާއީލަށް ދޭ ހަމަލާތައް އިތުރަށް ވަރުގަދަ ކުރަން ވަނީ ނިންމާފައި އެވެ.