ދުބާއީ އެއާޕޯޓުގެ ރަންވޭއަށް އިރާނުގެ ޑްރޯން ހަމަލާއެއް އަމާޒުވެ ބާރުގަދަ ގޮވުމެއް!

އިރާނުގެ ޑްރޯނެއް ދުބާއީ އެއާޕޯޓުގެ ރަންވޭއަށް ވެއްޓިއްޖެ އެވެ.

އަލްޖަޒީރާއިން މިއަދު އާންމުކުރި ވީޑިއޯއަކުން ވަނީ މިކަން ކަށަވަރުވެފައ އެވެ. އެގޮތުން ޑްރޯން ރަންވޭއަށް ވެއްޓޭ މަންޒަރާއި ބާރުގަދަ ގޮވުމެއްގެ މަންޒަރު އެވީޑިއޯއިން ފެނެއެވެ. ނަމަވެސް ލިބުނު ގެއްލުންތަކުގެ ތަފްސީލް އަދި މިހާތަނަށް ދުބާއީންވެސް ހާމަކޮށްފައި ނުވެއެވެ.

މެދުއިރުމަތީގެ ހާލަތު ރަނގަޅު ވަމުންދިޔުމާއިއެކު މިއަދު ދުބާއީ އެއާޕޯޓުގެ އޮޕަރޭޝަންތައް ފެށުމަށް އައީ ތައްޔާރުވަމުންނެވެ. ނަމަވެސް މި ހަމަލާއާއި ގުޅިގެން އޮޕަރޭޝަންތައް އަނެއްކާވެސް މެދުކަނޑާލަން ވަނީ ނިންމާފައި އެވެ.

މިދިޔަ ހޮނިހިިރު ދުވަހު އިސްރާއީލާއި އެމެރިކާއިން އިރާނަށް ވަރުގަދަ ހަމަލާތަކެއް ދޭން ފަށައި އެގައުމުގެ އެންމެ މަތީ ލީޑަރު އާޔަތުالله އަލީ ޚާމަނާއީ އާއި ލީޑަރޝިޕްގެ އިސްވެރިންތަކެއް ވަނީ އަވަހާރަކޮށްލާފައި އެވެ. މި ހަމަލާތައް އިސްރާއީލާއި އެމެރިކާއިން ފެށީ އިރާނުން ނިއުކްލިއާ ހަތިޔާރު އުފައްދާ ކަމަށާއި އެކަމުގެ ބިރު މުޅި ދުނިޔެއަށް އޮތް ކަމަށްބުނެ އެވެ. މި ހަމަލާތަކާއިއެކު އިރާނުން ވަނީ ވަރުގަދަ ބަދަލު ހަމަލާތަކެއް ފަށާފައި އެވެ.

މި ހަމަލާތައް އިސްރާއީލުގެ އިތުރުން މެދުއިރުމަތީގައި އެމެރިކާގެ ބޭސްތައް ގާއިމްކޮށްފައިވާ ހުރިހާ ގައުމަކަށް އިރާނުން ދެމުންދާއިރު މި ހަމަލާތައް އިރާނުން ހުއްޓާލަން މިއަދު ވަނީ އެއްބަސްވެފައި އެވެ. ހުއްޓާލަން އެއްބަސްވެފައިވަނީ އިރާނުގެ އަވަށްޓެރި ގައުމުތަކަށް ދެމުންދާ ހަމަލާތަކެވެ. އިސްރާއީލަށް ހަމަލާތައް ހުއްޓާނުލާން ނިންމައި އިސްރާއީލަށް ދޭ ހަމަލާތައް އިތުރަށް ވަރުގަދަ ކުރަން ވަނީ ނިންމާފައި އެވެ.

މެދުއިރުމަތީގެ ގައުމުތަކަށް އިރާނުން ދިން ހަމަލާތަކުގެ ތެރެއިން އެންމެ ގިނަ ހަމަލާތައް އަމާޒުވި އެއް ގައުމަކަށް ޔޫއޭއީ ވާނެ އެވެ. އެގޮތުން ޔޫއޭއީގެ ދުބާއީ އާިއ އަބޫ ދާބީއަށް ވަރުގަދަ ހަމަލާތަކެއް ވަނީ ދީފައި އެވެ.