އަވަށްޓެރިންނަށް ހަމަލާދެވުނީތީ މާފަށް އެދެން، އިރާނަށް ހަމަލާދޭން ބޭސްތައް ބޭނުން ނުކުރާހާ ހިނދަކު ހަމަލާ ނުދޭނަން - އިރާން

އިރާނުން މެދުއިރުމަތީގެ ގައުމުތަކަށް ދެމުންދިޔަ ހަމަލާތައް 6 ދުވަސް ފަހުން ހުއްޓާލައިފި އެވެ.

މިކަން ރަސްމީކޮށް އިއުލާނުކުރެއްވީ އީރާނުގެ ރައީސް މަސޫދު ޕެޒެޝްކިއަން އެވެ. އެގޮތުން އޭނާ ވިދާޅުވީ އެގައުމުގެ ވަގުތީ ލީޑަޝިޕް ކައުންސިލުން އިއްޔެ ފާސްކޮށްފައި ވަނީ، އަވަށްޓެރި ގައުމުތަކަށް ދެން ހަމަލާއެއް ނުދޭން ކަމަށެވެ. ނަމަވެސް އެގައުމުތަކުގައި ހުރި އެމެރިކާގެ އަސްަކަރީ ބޭސްތަކުގެ ބޭނުން ހިފައި އިރާނަށް ހަމަލާއެއް ދީފި ނަމަ އަލުން ހަމަލާތައް ފަށާނެ ކަމަށް ރައީސް ޕެޒެޝްކިއަން ވިދާޅުވިއެވެ.

މީގެ އިތުރުން ރައީސް ޕެޒެޝްކިއަން ވަނީ ފާއިތުވި ދުވަސްތަކުގައި ހިނގި ހަމަލަތާކަށް އަވަށްޓެރި ގައުމުތަކުގެ ކިބައިން މައާފަށް ވެސް އެދިވަޑައިގެންފަ އެވެ. އަދި އެއީ އެގައުމުތަކާއި ދެކޮޅަށް ދިން ހަމަލާތަކެއް ނޫން ކަމަށާއި ހަމަލާތައް އަމާޒުކުރީ އެމެރިކާގެ އަސްކަރީ ބޭސްތަކަށް ކަމުގައި ޕެޒެޝްކިއަން ތަކުރާރުކުރެއްވި އެވެ.

މިދިޔަ ހޮނިހިރު ދުވަހު އިސްރާއީލާއި އެމެރިކާއިން އިރާނަށް ވަރުގަދަ ހަމަލާތަކެއް ދޭން ފަށައި އެގައުމުގެ އެންމެ މަތީ ލީޑަރު އާޔަތުالله އަލީ ޚާމަނާއީ އާއި ލީޑަރޝިޕްގެ އިސްވެރިންތަކެއް ވަނީ އަވަހާރަކޮށްލާފައި އެވެ. މި ހަމަލާތައް އިސްރާއީލާއި އެމެރިކާއިން ފެށީ އިރާނުން ނިއުކްލިއާ ހަތިޔާރު އުފައްދާ ކަމަށާއި އެކަމުގެ ބިރު މުޅި ދުނިޔެއަށް އޮތް ކަމަށްބުނެ އެވެ. މި ހަމަލާތަކާއިއެކު އިރާނުން ވަނީ ވަރުގަދަ ބަދަލު ހަމަލާތަކެއް ފަށާފައި އެވެ.

މި ހަމަލާތައް އިސްރާއީލުގެ އިތުރުން މެދުއިރުމަތީގައި އެމެރިކާގެ ބޭސްތައް ގާއިމްކޮށްފައިވާ ހުރިހާ ގައުމަކަށް އިރާނުން ދެމުންދާއިރު މި ހަމަލާތައް އިރާނުން ހުއްޓާލަން މިއަދު ވަނީ އެއްބަސްވެފައި އެވެ. ހުއްޓާލަން އެއްބަސްވެފައިވަނީ އިރާނުގެ އަވަށްޓެރި ގައުމުތަކަށް ދެމުންދާ ހަމަލާތަކެވެ. އިސްރާއީލަށް ހަމަލާތައް ހުއްޓާނުލާން ނިންމައި އިސްރާއީލަށް ދޭ ހަމަލާތައް އިތުރަށް ވަރުގަދަ ކުރަން ވަނީ ނިންމާފައި އެވެ.