ހައްޖު ކޯޕަރޭޝަންގެ ކްލިނިކްގެ ހިދުމަތް ހައްޖާއި އުމްރާ އަށް ދާ ހުރިހާ ދިވެހިންނަށް ލިބިގެންދާނެ!

ހައްޖާއި އުމްރާވެރިންނަށް ހާއްސަކޮށްގެން މައްކާގައި ގާއިމްކޮށްފައިވާ މެޑިކަލް ކްލިނިކުން ހައްޖާއި އުމްރާއަށްދާ ހުރިހާ ދިވެހިންނަށް ފަރުވާ ލިބޭނެ ކަމަށް ޙައްޖު ކޯޕަރޭޝަންގެ ޑެޕިއުޓީ މެނޭޖިންގް ޑިރެކްޓަރު އަލްއުސްތާޛް ޢަލީ ޝަރީފް ވިދާޅުވެއްޖެ އެވެ.

އަލީ ޝަރީފް މިހެން ވިދާޅުވީ ދައުލަތުގެ މީޑިއާ "ޕީއެސްއެމް" އަށް ދިން އިންޓަވިއުއެއްގަ އެވެ.

ޑީއެމްޑީ ވިދާޅުވީ މި ކްލިނިކްއަކީ ސައުދީގެ ހެލްތް މިނިސްޓްރީން ގަބޫލުކުރާ ފެންވަރުގެ ކްލިނިކެއް ކަމަށެވެ. އަދި މި ކްލިނިކް ހިންގުމަށް ސައުދީގެ ނޭޝަނަލް ހޮސްޕިޓަލް އާއި ހައްޖު ކޯޕަރޭޝަނާއި ދެމެދު އެއްބަސްވުމެއް ގާއިމްކޮށްފައިވާކަންވެސް ޑީއެމްޑީ ފާހަގަކުރެއްވި އެވެ.

ދިވެހިންނަށް އަބަދުވެސް ރަނގަޅުވާނީ ދިވެހި ޑޮކްޓަރުންކަމަށްވުމުން ހައްޖާއި އުމްރާއާއި ދިމާކޮށް މައްކާއަށް ދިއުމުގެ ފުރުސަތު ދިވެހި ޑޮކްޓަރުންނާއި ނަރުހުންނަށް އޮންނަނީ ހުޅުވާލާފަ އެވެ. އަދި ހައްޖު ކޯޕަރޭޝަންގައި ގާއިމުކުރެވިފައިވާ މެޑިކަލް ޕޫލްގައި ރަޖިސްޓްރީވުމުން ދިވެހި ޑޮކްޓަރުންނަށާއި ނަރުހުންނަށް މިދަތުރުތަކުގައި މައްކާއަށް ދިއުމުގެ ފުރުސަތު ފަހިވެފައިވާކަމަށް ހައްޖު ކޯޕަރޭޝަނުން ފާހަގަކުރެ އެވެ.

"އަސްލު އޮންނަނީ ހައްޖު ކޯޕަރޭޝަނުން ހޮސްޕިޓަލްތަކަށް ހުޅުވާލީމަ ހޮސްޕިޓަލުން ހޮވޭ ޑޮކްޓަރުން ނަރުހުން މިއަންނަނީ. ވަރަށް މާތް އަޅުކަމަކަށް އަންނަ ބޭފުޅުންނަށް ހިދުމަތެކޭ އަޅުގަނޑަށް މިކޮށްދެވެނީއޭ އަޅުގަނޑު ޤަބޫލުކުރަނީ." މި ކްލިނިކްގެ ހިދުމަތްދޭ ޑޮކްޓަރު ސާލިމާ ވިދާޅުވިއެވެ.

މި ކްލިނިކް ގާއިމްކޮށްގެން ފަރުވާދެމުންދާތާ މިހާރު ދެ އަހަރު ވަމުންދާއިރު މި ކްލިނިކްގެ ފައިދާ ގިނަ އުމްރާވެރިންތަކަކަށް ދަނީ ލިބެމުންނެވެ.