ދަތުރުވެރިޔާ އުމްރާ ގްރޫޕުގެ ހަވާލުގައި ރަމަޟާން މަހު އުމްރާއަށްދާ މީހުން ފުރައިފި

ދަ ޓްރެވެލަރ ނުވަތަ ދަތުރުވެރިޔާ އުމްރާ ގްރޫޕުގެ ހަވާލުގައި މި ރަމަޟާން މަހު އުމްރާއަށް ދާ މީހުން މިރޭގެ ވަގުތެއްގައި ސައުދީއަރަބިއްޔާ އަށް ފުރައިފި އެވެ.

މި ރަމަޟާން މަހު އުމްރާއަށް ދަތުރުވެރިޔާ ގްރޫޕުގެ ހަވާލުގައި 262 އުމްރާވެރިން މިރޭ ވަނީ ސައޫދީއަށް ދިޔުމަށް ފުރައިފައެވެ. އަދި މި ގްރޫޕުގެ އެޑްވާންސް ޓީމު މިހާރު ތިބީ މައްކާގައި އުމްރާވެރިންނަށް ބޭނުންވާ ހުރިހާ އިންތިޒާމްތައް ހަމަޖެއްސުމުގެ މަސައްކަތުގައެވެ.

ދަތުރުވެރިޔާގެ ރަމަޟާން އުމްރާ އަކީ ރަމަޟާން މަހުގެ ފަހު 15 ދުވަސް އަދި ޝައްވާލްމަހުގެ 6 ދުވަސް ހިމެނޭގޮތަށް 21 ދުވަސް މައްކާ އަދި މަދީނާގައި ހޭދަކުރާނެ އެވެ. މި ދަތުރުގައި އުމްރާވެރިންނަށް 5 އުމްރާ ކުރުމުގެ ފުރުސަތު ލިބިގެންދާނެ އެވެ.

ދަތުރުވެރިޔާހެ ހަވާލުގައި އުމްރާއަށްދާ ހުރިހާ މީހުން މިރޭ ފުރިއިރު، އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާތީ އޭގެތެރެއިން 21 މީހަކަށްވެސް ދަތުރުވެރިޔާ ގްރޫޕުން ވަނީ ޖާގަދީފައެވެ.

އަމިއްލަ ޢުމްރާ ގްރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާއަށް ގެންގޮސްފައިނުވާ މައްސަލައެއް ވަނީ ފެންމަތިވެފައެވެ. މައުލޫމާތު ލިބިފައިވާގޮތުގައި 'އަލް އަބްރާރު ޕްރައިވެޓް ލިމިޓެޑް' ނަމަކަށް ކިޔާ މި ގުރޫޕުން ރަމަޟާން މަހުގެ ފަހު 15 ގައި އުމްރާއަށް ދިޔުމަށް 110 މީހުން ފައިސާ ދައްކާފައިވެއެވެ.

ދަތުރުވެރިޔާ އުމްރާ ގްރޫޕަކީ މިހާރު ރާއްޖޭގެ ގިނަބައެއްގެ މަގުބޫލުކަން ހޯދާފައިވާ އިތުބާރުހުރި އުމްރާ ގްރޫޕެކެވެ. ދަތުރުވެރިޔާ އުމްރާ ޕެކޭޖުތައް އެކުލަވާލެވިފައިވަނީވެސް ލުއިފަސޭހަ ގޮތްތައް އިހުތިޔާރު ކުރެވޭ ގޮތަށެވެ. އެގޮތުން ބަހާލައިގެން ފައިސާ ދެއްކުމާއި، ގްރޫޕްތަކަށް ޑިސްކައުންޓާއި ކޮޓަރި ހަމަޖައްސައިދެއެވެ.