އެޕްލިކޭޝަން ޑެޑްލައިނެއް ނެތި ސްޓޫޑެންޓް ލޯނަށް އެދުމުގެ ފުރުޞަތު މުޅި އަހަރަށް ހުޅުވާލަނީ

ސްޓޫޑެންޓް ލޯނަށް އެދި އެޕްލިކޭޝަން ހުށަހެޅުމުގެ ފުރުސަތު މުޅި އަހަރަށް ހުޅުވާލަން ނިންމާފައިވާ ކަމަށް މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަޙްމަދު ވިދާޅުވެއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވަޒީރު ޑރ. ޢަލީ ޙައިދަރު އަހްމަދު ވިދާޅުވީ، 2026 ގެ ލޯނު ސްކީމަށް އެދުމުގެ ފުރުޞަތު ހުޅުވާލުމަށްޓަކައި ޕޯޓަލް ތައްޔާރުކުރުމާއި އުސޫލު އެކުލަވާލުމުގެ މަސައްކަތް އެވުޒާރާއިން ކުރަމުން އަންނަ ކަމަށެވެ.

ސްކީމުގެ ކަންކަން ހަރުދަނާކުރުމަށްޓަކާ ކުރާ މަސައްކަތުގެ ތެރެއިން އެޕްލިކޭޝަން ޑެޑްލައިނެއް ނުބާއްވައި ލޯނަށް އެދުމުގެ ފުރުޞަތު މުޅި އަހަރަށް ހުޅުވާލާގޮތަށް ހަމަޖައްސާފައިވާކަމަށް ވަޒީރު ވިދާޅުވިއެވެ. މިއީ ލޯނަށް އެދޭ ދަރިވަރުންނަށް ލިބިގެންދާނެ ފަސޭހައެއް ކަމަށް ވަޒީރު ވިދާޅުވި އެވެ.

ސްޓޫޑެންޓް ލޯނަށް އެދި ހުށަހެޅުމުގެ ފުރުޞަތު މި ފެށޭ ބަންދުދުވަސްތަކަށްފަހު ހުޅުވާލާނެ ކަމަށް ވަޒީރު ވިދާޅުވި އެވެ. އަދި ލޯނަށް އެދެން ބޭނުންވާ ދަރިވަރުން ދުރާލާ ލިޔުންތައް ފުރިހަމަކޮށް ތައްޔާރުވުމަށް ވަޒީރު ވަނީ އިލްތިމާސްކުރައްވާފައެވެ.

ސްޓޫޑެންޓް ލޯނުގެ ފައިސާ އަނބުރާ ދައްކާއިރު އެއްވެސް އިތުރު ސަރވިސް ޗާޖެއް ނުނަގާގޮތަށް މިދިޔަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ނިންމާފައެވެ. މިއަހަރު ދޫކުރާ ލޯންތަކަށްވެސް އިތުރު ސަރވިސް ޗާޖެއް ނުނަގާނެ ކަމަށް ވަޒީރު ވަނީ ވިދާޅުވެފައެވެ.